UNUMERI 30

₁UMosi wakhuluma nazo zoke iinhloko zeenkoro zakwa-Israyeli wathi: “Nakhu uSomnini ayale ngakho: ₂Lokha indoda yenza isithembiso kuSomnini namkha yenza isifungo sokuzibophelela ngepilwayo, kufuze ingawephuli amezwayo. Ayenze koke ekukhulumileko. ₃Lokha wesifazana enza isithembiso kuSomnini namkha azibophe ngesibopho ebutjheni bakhe khisibe usese ngakwabo, ₄noyise ezwe isithembiso namkha isibopho azibophe ngaso kodwana angatjho litho kuye, khona-ke zoke iinthembiso zakhe zizakujama begodu esinye nesinye isibopho azibophe ngaso naso sizakuba ngesijamileko. ₅Kodwana nangabe uyise uthi ngokuzwa ngaso bese umsola khona mhlokho, khona-ke akunasithembiso namkha isibopho umntazana azibophe ngaso esizakujama. USomnini uzamcolela ngombana uyise umsolile.

₆“Nangabe wende endodeni asese sesithembisweni sakhe namkha ekulumeni engayi ndawo ayikhulumileko wazibopha ngayo, ₇bese umyenakhe ezwe ngalokho, angatjho litho nokho ngelanga ezwa ngalo; khona-ke iinthembiso zakhe neembopho azibophe ngazo zizakujama. ₈Kodwana nangabe kuthi ngelanga indodakhe ezwa ngalo bese imsole, izakwenza bona isithembiso nekulumo engayi ndawo ayikhulumileko wazibopha ngayo, ibe lilize. USomnini uzamcolela. ₉(Mayelana nomhlolokazi namkha ibuya: Koke azibopha ngakho kuzakujama.) ₁₀Nangabe umfazi uthembisa angakwakhe namkha azibophe ngesibopho sokufunga, ₁₁indodakhe izwe ngalokho, nokho ingatjho litho kuye begodu ingamsoli, khona-ke esinye nesinye isithembiso sakhe nesibopho esinye nesinye azibophe ngaso sizakujama. ₁₂Kodwana nangabe indodakhe yenza izintwezo ilize mhlana izwa ngazo, nje-ke koke okuphume emlonyenakhe mayelana neenthembiso namkha iimbopho zakhe angeze kwajama. Indodakhe izabe yenze koke lokho ilize, yeke uSomnini uzamcolela. ₁₃Esinye nesinye isithembiso nanyana isifungo sokuzibopha ngokuzila, indodakhe ingenza bona sijame namkha isenze ilize. ₁₄Kodwana nangabe woke amalanga indodakhe ithe du ngendaba leyo, khona-ke yenza zoke iinthembiso neembopho zomfazi loyo zijame. Iye, izenze zajama ngombana akhange itjho litho kuye mhlana izwa ngazo. ₁₅Nangabe indodakhe izenza ilize ngemva kwesikhathi esithileko sele izwile ngazo yeke ngiyo ezakuthwala isiphambeko somfazi.”

₁₆Lezo-ke ziimiso uSomnini ayala ngazo uMosi mayelana nendoda nomkayo, uyise nendodakazi ebutjheni bayo nayisese sendlini kayise.