Ukubhujiswa kwe-Aradi
1Ikosi ye-Aradi egade imKanana ihlala ngesewula yenarha, yezwa bona u-Israyeli uza ngendlela yange-Atarimu. Yasahlela ama-Israyeli beyathumba amanye wawo. 2Ama-Israyeli enza isifungo kuSomnini athi: “Nange mbala uSomnini anganikela abantwaba esandleni sethu, amadorobhabo sizowabhubhisa nya.”
3USomnini wezwa isibawo sama-Israyeli, wanikela amaKanana esandleni sawo. Ama-Israyeli abhubhisa amaKanana lawo nya kanye namadorobhawo. Nje-ke ibizo lendawo leyo labizwa bona yiRhorima.
Inyoka yekoporo
4Ama-Israyeli asuka entabeni yeHori alunga ngendlela eya elwandle lomGaba ukuze abhode inarha yakwa-Edomu. Khonapho endleleni banyefa ummongo. 5Abantu banyefula uZimu noMosi bathi: “Nisikhupheleni eGibhide bona sizokufela erhalawumbenapha? Akunakudla! Namanzi awekho lapha! Begodu sese sidinwe nakukudlanyana okungazisikokhu!”
6Nje-ke uSomnini wathumela iinyoka ezinesihlungu ebantwini, zabaluma; kwafa ama-Israyeli amanengi. 7Abantu beza kuMosi bafese bathi: “Sonile ngombana sinyefule uSomnini kanye nawe. Yeke sithandazela kuSomnini bona asuse iinyokezi kithapha.”
Nje-ke uMosi wabathandazela-ke. 8USomnini wathi kuMosi: “Yenza umfanekiso wenyoka enesihlungu uyiphakamise ibe liphawu okuzakuthi omunye nomunye olunyiweko nakayiqalako, aphiliswe.”
9UMosi wenza inyoka yekoporo, wayiphakamisa kobana ibe liphawu. Bekuthi nanyana ngubani olunywa yinyoka nakaqala inyoka yekoporo, aphile.
Ikhambo ukusuka e-Obhothi ukuya ePisiga
10Ama-Israyeli afuduka ayokuhloma amatendawo nge-Obhothi. 11Afuduka godu e-Obhothi ayokuhloma e-Iye-Habharimu, eserhalawumbeni elingepumalanga yakwaMowabi. 12Ukusuka lapho afuduka ayokuhloma emlanjaneni iZeredi. 13Ukusuka lapho afuduka godu ayokuhloma ngale kwe-Arinoni, ngerhalawumbeni elinabela ngemkhawulweni wama-Amori. Kwakhona i-Arinoni le, isemkhawulweni hlangana neMowabi nendawo yama-Amori. 14Kungalokho encwadini yezipi zakaSomnini kuthiwa:
“ ... eWahebe eseSufa
emilanjaneni ye-Arinoni
15namadonga wemirhoba
enabela ngebuhlalweni be-Ari,
izeyame ngemikhawulo yakwaMowabi.”
16Ukusuka lapho ama-Israyeli aragela phambili aya eBheri, ekumthombo lapha uSomnini akhuluma khona noMosi wathi: “Buthelela abantu ndawonye ukuze ngibaphe amanzi.”
17Nje-ke ama-Israyeli avuma nasi ingoma:
“Gobhoza mthombo!
Vumani njalo 18ngomthombo
owenjiwe barholi,
warhujwa ngitjho nangani makhosi wabantu
ngentonga yombusi nangamadondolwawo.”
Asuka erhalawumbenapho aya eMatana, 19ukusuka eMatana aya eNarhaliyeli, eNarhaliyeli aya eBhamothi. 20Ukusuka eBhamothi kwayiwa emrhobeni ongesifundeni sakwaMowabi lapha esiqongweni sePisiga umuntu angabona khona iJetjhimoni.
Ama-Israyeli asahlela uSirhoni no-Ogi
21Ama-Israyeli athumela iinthunywa kuSirhoni ikosi yama-Amori athi: 22“Sivumela bonyana sidlule enarhenakho. Angeze satlaya emasimini namkha esidiribeni begodu asizukusela amanzi wemithombakho. Sizokukhamba endleleni ekhanjwa makhosi, size sidlule emkhawulwenakho.”
23Kodwana uSirhoni akhange avumele u-Israyeli bona adlule emkhawulwenakhe. Wahlanganisa loke ibutho lakhe waphuma bonyana asahlele u-Israyeli erhalawumbeni. Wafika eJahatsi walwa no-Israyeli. 24Ama-Israyeli alwa naye ngesabula amhlula abe athumba inarhakhe ukusukela emlanjeni i-Arinoni bekwaba semlanjeni iJabokhi. IJabokhi bekumkhawulo oqinisiweko wama-Amoni. 25Ama-Israyeli athatha woke amadorobho wakhona, ahlala ngemadorobheni wama-Amori, ngeRhetjhibhoni nemizanayo yoke.
26IRhetjhibhoni bekulidorobho lakaSirhoni ikosi yama-Amori. USirhoni lo, gade alwe nekosi yaphambilini yakwaMowabi bewayemuka inarhayo yoke bekube semlanjeni i-Arinoni. 27Ngikho nje iimbongi zithi:
“Yizani eRhetjhibhoni ukuze lakhiwe,
idorobho lakaSirhoni aliqiniswe.
28Phambilini kwaphuma umlilo eRhetjhibhoni,
iye, amalangabi edorobheni lakaSirhoni.
Aginya i-Ari kwaMowabi,
nabanini beendunduma hlangana ne-Arinoni.
29Maye kuwe Mowabi!
Niphelile nina balotjhi bakaKemotjhi!
Wenze amadodanakhe aba bakhoseli,
namadokazakhe aba bathunjwa
bekosi yama-Amori, uSirhoni.
30Amasimabo atjhabalele
ukusukela eRhetjhibhoni ukuya eDibhoni,
begodu ukusukela eNatjhimu ukuya eNofarhi.”
(INofarhi le iseduze neMedeba.) 31Ngendlela leyo-ke ama-Israyeli ahlala enarheni yama-Amori.
32UMosi wathumela bona kuyokuhlolwa iJazeri. Ama-Israyeli athumba imizanayo, aqotjha nama-Amori agade alapho. 33Nje-ke ama-Israyeli ajika akhuphuka ngendlela eya eBhatjhani. U-Ogi ikosi yakhona yaphuma nebutho layo loke bonyana ibasahlele ngepi e-Edreyi. 34Kodwana uSomnini uZimu wathi kuMosi: “Ungamesabi ngombana ngimnikele esandleni sakho, iye, yena nebutho lakhe kanye nenarhakhe. Uzakwenza kuye njengombana wenze kuSirhoni ikosi yama-Amori ebe yakhe eRhetjhibhoni.”
35Mbala ama-Israyeli abulala u-Ogi namadodanakhe kanye nabantu bakhe boke, kwangabi khona noyedwa wakhe osindako. Ngendlela leyo athumba inarhakhe.
