UNUMERI 17

₁USomnini wakhuluma noMosi wathi: ₂“Khuluma nama-Israyeli akunikele iintonga ezilitjhumi nambili, kube yintonga yinye ephuma kumrholi wekoro enye nenye. Utlole ibizo lomrholi phezu kwentongakhe. ₃Ibizo laka-Aroni litlolwe phezu kwentonga yekoro kaLevi. Kufuze kube nentonga yinye yehloko yekoro. ₄Beka iintongezo ngetendeni lokuhlanganela phambi komfaji wobufakazi, lapha vane ngihlangane nawe khona. ₅Intonga yomuntu engizakumkhetha izakuhluma. Ngalokho ngizakuqeda ukubelesela kokunghonghoyila kwama-Israyeli kini.”

₆UMosi wakhuluma nama-Israyeli, nje-ke omunye nomunye umrholi wamnikela intonga, zaba litjhumi nambili. Kwaba mrholi nomrholi intonga ngokuya ngokweenkoro zawo. Intonga ka-Aroni beyihlangana nazo. ₇Nje-ke uMosi wabeka iintonga phambi kwakaSomnini ngetendeni elinobufakazi.

₈Kwathi ngakusasa uMosi nakaya ngetendeni elinobufakazi, qala, intonga ka-Aroni ongowendlu kaLevi beyihlumile! Beyinamaqumbe, amakhwa nama-alimodi avuthiweko! ₉Nje-ke uMosi wakhupha zoke iintonga phambi kwakaSomnini waziletha kuma-Israyeli woke. Emva kokobana sele azibonile iintongezo, umrholi omunye nomunye wathatha yakhe.

₁₀Godu uSomnini wathi kuMosi: “Buyisela intonga ka-Aroni phambi komfaji wobufakazi bona ibe siyeleliso samahlubuka. Akuphele ukunghonghoyila kwabo kimi, nakungasinjalo bazakufa bokanyana nje.”

₁₁Mbala uMosi wenza njengombana uSomnini amyalile. ₁₂Ama-Israyeli athi kuMosi: “Qala siyafa, siphelile nasinje, iye siphele sokanyana nje. ₁₃Ngambala, omunye nomunye otjhidela ethaberinakelini lakaSomnini uzokufa! Alo, sifanele sife sokanyana nje?”