UNARHUME 2

₁“Abasabaleleko uzababona

lokha nababuyako wena Juda.

Yenyukelani esithaleni, nigade indlela!

Zilungiseleleni, niziqinise!”

₂Ngambala uSomnini uzakubuya ngedumo lakaJakopo,

iye, ngedumo laka-Israyeli.

Ngambala abarhayili bazabarhayila

begodu bazakutjhabalalisa abavikeli babo.

₃Ngelanga elibekwe nguSomnini,

iinhlangu zeentsitsirimba zayo zibomvu;

iingorho zakhona zivunule okutlerebede.

Iinsimbi zeenkarana zepi ziyamenyezela,

abakhweli beenjomani baya ngapha nangapha.

₄Batjhayela iinkarana inga mahlanya eendleleni,

zehla zenyuka nommango woke.

Zifana neenhlothi ezivuthako;

zigijima zitsekeze njengombani.

₅Amabutho kaSomnini akhethekileko ziingorho,

akhamba ahlula endlelenawo.

Agijimela emthangaleni wedorobho;

alungisa umgqala wawo ukugiriza umthangala.

₆Amasango wangemlanjeni avulwe petle,

isigodlo siyathuthumela ngevalo.

₇Indlovukazi isiwa ekuthunjweni ngekoloyana.

Amakhobokakazi wayo ayathunjwa;

athwala imikhono ehloko,

alile irhabiya njengamazuba.

₈INiniva injengedamu elivulelweko:

Amanzi wakhona ayagobhoza.

“Valani! Valani!”,

kodwana amanzi akavaleki.

₉Thumbani isiliva!

Thumbani igolide!

Umgodla uvulekile,

umnotho uze ngonina lapha!

₁₀INiniva idlelezelwe, yahlangulwa;

yasala ilirubhi!

Iinhliziyo zadana,

amadolo ayathuthumela,

imizimba yoke iyahlengezela;

boke ubuso buyaphaphatheka.

₁₁Gadesi liphi-ke idzaba leengwenyama,

lapha kondlelwa khona imindlwana yeengwenyama,

lapha ingwenyama eduna nesikazi zikhambakhamba khona,

lapha iingwenyama zizibusa khona na?

₁₂Iphi ingwenyama ebulele ngokwaneleko,

ukondla imindlwanayo;

ekghamela ukondla ingwenyama esikazi,

ezalisa isikhundla sayo ngeenyamazana

nedzaba layo ngeendumbu na?

“Ngijamelene nawe kosi.

Ngizakutjhisa iinkarana zakho,

isabula izakurhayila iingwenyamana zakho.

Ngizakutjhabalalisa koke okuhlangule kabanye.

Amezwi weenthunywa zakho angeze asazwakala.”