Isifundo ngokutlhalana
(Mt 19:1-12; Lk 16:18)
1UJesu wasuka lapho waya esifundeni seJudiya nangaphetjheya kweJordani. Godu iinqubuthu zambungelela, wazifundisa njengemhleni.
2AbaFarisi abathileko beza kuye, bamlinga bathi: “Kumthetho bona indoda itlhale umkayo na?”
3Yena wabaphendula wathi: “UMosi waniyala wathini na?”
4Bamphendula bathi: “UMosi wayivumela indoda bona itlole incwadi yesahlukaniso, imthokoze-ke.”
5Godu uJesu wathi kibo: “UMosi wanitlolela umthetho lowo ngebanga leenhliziyokazi zenu ezilikhuni. 6Kodwana ekuthomeni kwendalo uZimu wababumba, kwaba ngomduna nomsikazi. 7Umtlolo uthi, ‘Indoda izakutjhiya uyise nonina inamathele emfazinayo 8bese baba nyamanye.’ Nje-ke abasesebabili, sele bamunye. 9Yeke lokho okuhlanganiswe nguZimu akungabi nomuntu ozakwahlukanisa.”
10Kwathi nasele bangekumbeni abafundi bambuza godu ngendaba le. 11Wathi kibo: “Loyo otlhala umkakhe athathe omunye, uhlobongile kumkakhe. 12Godu nakube umfazi utlhala indodakhe, athathwe ngenye, uhlobongile.”
UJesu ubusisa abantwana
(Mt 19:13-15; Lk 18:15-17)
13Abantu bebaletha abantwana kuJesu bona abasingathe, kodwana abafundi bakhe babakhalimela. 14UJesu nakabona lokho, wasilingeka wathi kibo: “Vumelani abantwana beze kimi, ningabakhandeli ngombana umbuso kaZimu ungowabanjengalaba. 15Ngiqinisile ngiyanitjela bona nanyana ngubani ongamukeli umbuso kaZimu njengomntwana, ngeze angena kiwo.” 16Nje-ke wathatha abantwana wabasingatha, wabeka izandla phezu kwabo wababusisa.
Umuntu osigwili
(Mt 19:16-30; Lk 18:18-30)
17Kuthe uJesu asathoma ikhambo lakhe, indoda yamgijimela yafese yawa eenyaweni zakhe yambuza yathi: “Mfundisi olungileko, ngingenza njani bona ngizuze ipilo engapheliko na?”
18UJesu wathi: “Ungibizelani bona ngilungile na? Akakho noyedwa olungileko, ngaphandle koZimu yedwa tere. 19Uyayazi imiyalo ethi, ‘Ungabulali, ungahlobongi, ungebi, ungafakazi amanga, ungagalaji, hlonipha uyihlo nonyoko.’ ”
20Yathi kuye: “Mfundisi, ngikulonde koke lokho kwebutjheni bami.”
21UJesu wayiqala, wayithanda wathi kiyo: “Yinye kwaphela into otlhayela ngayo: Khamba, uthengise koke onakho unikele abadududu, uzakuba nomnotho ezulwini. Ngemva kwalapho-ke ungilandele.” 22Kwathi lokha nayizwa lokho, ubuso bayo bakhena. Yakhamba idanile ngombana beyinomnotho omnengi.
23UJesu wathalaza wathi ebafundini bakhe: “Maye kubudisi kanganani kilabo abanomnotho kobana bangene embusweni kaZimu!”
24Abafundi bakhe barareka ngamezwakhe la. UJesu wathi kibo godu: “Bantwana, kubudisi ukungena embusweni kaZimu! 25Kulula ukuziluma indololwani kunobana isigwili singene embusweni kaZimu.”
26Abafundi barareka khulu, bathi omunye komunye: “Alo, nakunjalo ngubani ongasindiswa na?”
27UJesu wabaqala wathi: “Emuntwini lokhu kuyinto engekhe yenzeka, kodwana ingasi kuZimu. Koke kuyenzeka kuZimu.”
28UPitrosi wathi kuye: “Qala, sitjhiye koke kobana sikulandele.”
29UJesu wathi: “Ngiqinisile ngiyanitjela bona akakho noyedwa otjhiye umuzi, abafo, abodade, umma, ubaba, abantwana namasimu ngebanga lami nevangeli, 30ongekhe amukela ikhulu elibuyelelwe ngekhulu esikhathinesi, imizi, abafo, abodade, abomma, abantwana namasimu kanye nokuzunywa nesikhathini esizako kanye nepilo engapheliko. 31Kodwana abanengi abangebokuthoma bazokuba ngebokugcina, kuthi bokugcina babe ngebokuthoma.”
UJesu ukhuluma kwesithathu ngokufa kwakhe
(Mt 20:17-19; Lk 18:31-34)
32Bebasendleleni basiya eJerusalema, uJesu akhamba phambili. Abafundi bakhe bebamangale, nalabo ebebabalandela bebesaba. Godu wadosela abalitjhumi nambili ngeqadi, wabatjela bona kuzokwenzekani kuye. 33Wathi: “Qalani! Siyakhamba siya eJerusalema. INdodana yoMuntu izakukhatjhelwa ebaphristini abakhulu nebafundisini bomthetho. Bona bazoyigweba kobana ibulawe, bayinikele kabatjhili. 34Bazoyiphoqa, bayikhafulele, bayibethe bebayibulale. Ngemva kwamalanga amathathu izakuvuka.”
Isibawo sakaJakopo noJwanisi
(Mt 20:20-28)
35UJakopo noJwanisi, amadodana kaZebediya, beza kuJesu bathi kuye: “Mfundisi, sifuna bona usenzele nanyana yini esiyikhombelako.”
36Wathi kibo: “Nifuna bona nginenzeleni na?”
37Bathi kuye: “Vuma bona embuswenakho omunye wethu ahlale ngesigomeni sakho omunye ngesinceleni sakho.”
38UJesu wathi kibo: “Aniyazi into eniyikhombelako le. Ningayisela ikapho engiyiselako namkha nibhajadiswe ngombhabhadiso engibhajadiswe ngawo na?”
39Bamphendula bathi: “Iye, singakghona.”
UJesu wathi kibo: “Nizakusela ikapho le engiyiselako, nibhajadiswe ngombhabhadiso engibhajadiswe ngawo, 40kodwana nakukuhlala ngesigomeni nangesinceleni sami akusingekwami. Iinkhundlezo zingezalabo ezilungiselwe bona.”
41Kuthe bona abalitjhumi bezwe lokho, bararana noJakopo noJwanisi. 42UJesu wababizela kuye wathi kibo: “Niyazi bona labo okuthiwa babusi babatjhili banamandla phezu kwabo, neenkhulu zabo eziphezulu zinegunya phezu kwabo. 43Kodwana akusinjalo ngani. Esikhundleni salokho, nanyana ngubani ofuna ukuba mkhulu phakathi kwenu kumele abe sisebenzi, 44naloyo ofuna ukuba ngewaqangi hlangana nani, kufanele abe likhoboka labo boke. 45Ngitjho neNdodana yoMuntu ayikezeli ukuzokwenzelwa, kodwana ukuzokwenzela nokunikela ipilwayo kobana ibe sihlengo sabanengi.”
UBhartimewu osiphofu uyabona
(Mt 20:29-34; Lk 18:35-43)
46Bafika eJerikho. UJesu nabafundi bakhe kanye nesiqubuthu esikhulu nabaphuma ngedorobheni, bekuhlezi isikhombeli esisiphofu eqadi kwendlela esinguBhartimewu, indodana kaThimewu. 47Nasele sizwile bona nguJesu weNazaretha, sarhuwelela sathi: “Jesu, Ndodana kaDavida, yewungirhawukele!”
48Abanengi basikhalimela bathi asithule; kodwana sasolo sirhuwelela sithi: “Ndodana kaDavida, yewungirhawukele!”
49UJesu wajama wathi: “Yenisibize.”
Basibiza-ke, bathi kiso: “Qina amandla, sikima, uyakubiza.”
50Salahla ingubaso, seqa seza kuJesu.
51UJesu wasibuza wathi: “Ufuna bona ngikwenzeleni na?”
Isiphofu sathi kuye: “Rabi, ngifuna ukubona.”
52UJesu wasiphendula wathi: “Khamba, ukukholwa kwakho kukusindisile.”
Khonokho sabona, salandela uJesu endleleni.
