UMIKHA 7

₁Maye mina!

Nginjengomuntu ofunana namadiribe

angawagoma sele kuvuniwe.

Ngifunana namakhiwani sele athintithekile.

₂Kunjalo-ke ukufunana nomuntu olungileko enarheni

nomuntu kaZimu phakathi kwabantu.

Boke baqothele ukuphalaza iingazi,

omunye nomunye uzumana nendlela

yokugolana nomfowabo ngenede.

₃Iinkhulu zakhona zamukela umlandu ngokukhongozela;

abagwebi bakhupha iingwebo ngokufunjathiswa;

ngitjho nomgwebi omkhulu akanabulilelo ugweba umathanda.

₄Loyo okuthiwa ngongcono kunabo uhlaba njengomunga,

nokuthiwa ulunge khulu unjengesibuya sameva.

Imini yokuhlunguphazwa kwabo seyifikile,

ababalaleleko bazababamba.

Nje-ke bazazizwa inga bayatjha.

₅Ungamethembi umakhelwana,

ungabeki ithemba lakho emnganinakho;

ngitjho nanyana kungaba ngotjhidelene kangangani nawe,

ulonde ikulumakho.

₆Ngombana indodana inyaza uyise,

indodakazi iphikisana nonina,

umalukazana ukhombana nonosokana ngomuno.

Izitha zomuntu kuba babantu bekhabo.

₇Kodwana mina ngiqalelela uSomnini ngethemba,

ngilinda uZimu uMsindisami,

uZimami uzangitjheja.

₈Ungabukisi ngami wena sitha sami!

Nanyana ngiwile nje,

kodwana ngizakuvuka.

Nanyana ngihlezi ebumnyameni nje,

kodwana uSomnini uzakuba kukhanya kwami.

₉Ngebanga lokobana ngitjhaphele uSomnini,

ngizakugugubala ngaphasi kobukhali bakhe,

bekube kumhla angikhupha emlandwini;

mhlana abuyisa ilungelo lami.

Uzangikhuphela ekukhanyeni;

ngizakubona ukulunga kwakhe.

₁₀Yeke isitha sami sizakubona lokhu

bese siphathwa ziinhloni,

njengombana sathi kimi:

“Uphi-ke uSomnini uZimakho?”

Ngizasiqalela phasi;

yeke sizakugadangwa njengedaka eendledlaneni.

₁₁Imini yokuqinisa imithangalakho izakufika –

imini yokurhayilwa ngesihlungu.

₁₂Mhlokho umdlelezelakho uzakufika

azabele wena Asiriya namadorobhakho.

Uzakufika azabele iingcenye zoke zenarhakho;

iye, ukusuka emlanjeni ukuya emlanjaneni

nokusuka entabeni ukuya entatjaneni.

₁₃Inarha izakuba libhudu

ngebanga lezenzo zabahlali bayo.

₁₄Somnini, yelusa abantu bakho ngentongakho,

umhlambi welifa lakho.

Uwuvikele emahlathini weentaba zeKarameli;

uvumele udle eBhatjhani neGiliyadi njengekadeni.

₁₅Benze babone imikarisomraro,

njengamhlana wena Somnini ubakhupha eGibhide.

₁₆Izizwe zizakubona lokhu bese ziyakhena,

kuphele ukuthi zona zinamandla.

Zizakuvala imilomo yazo ngezandla,

zivaleke iindlebe.

₁₇Abantwaba bazakurhurhuba njengenyoka;

bakhase njengeembandana ehlabathini.

Bazakuphuma batatazela erholweni labo;

bahlengezele phambi kwakho Somnini Zimethu,

bazakwesaba ngebanga lakho.

₁₈Ngubani uZimu onjengawe,

othethelela isono,

ongayeleli imitjhapho yeendlalifa zakhe,

nonganamavunda kodwana othabela ukwethembeka,

₁₉ozasirhawukela godu,

agadangele izono zethu

ngaphasi kwenyawo na?

Iye, uzakujikijela yoke imitjhapho

yabantu bakho ekuzikeni kwelwandle.

₂₀Uzakuba ngoqinisileko kuJakopo

nothembekileko ku-Abrahamu,

njengombana wafunga kibobaba ekadeni.