UMATEWU 28

₁Ngemva kweSabatha, ngamasa welanga lokuthoma leveke, uMariya Magdalina nomunye uMariya bakhamba bayokuhlola ethuneni. ₂Khonokho kwaba khona ukusikinyeka kwephasi okukhulu ngombana kwehla ingilozi kaSomnini ivela ezulwini, yaya ethuneni yafese yageda ilitje yalisusa, yahlala phezu kwalo. ₃Ubujamo bayo bebunjengombani, izambatho zayo zimhlophe njengeliqhwa. ₄Abalindi besaba khulu bebaqhaqhazela, baba njengabantu abafileko.

₅Ingilozi yakhuluma nabafazi yathi: “Ningesabi ngombana ngiyazi bona nifuna uJesu obekabethelwe esiphambanweni. ₆Akakho lapha; uvukile njengombana agade atjhwile. Yizani nganeno nizokubona lapha bekalele khona. ₇Nanisuka lapha nirhabe niyokutjela abafundi bakhe, nithi, ‘Uvukile ekufeni, nje-ke usendleleni yokuya eGalile ngaphambi kwenu. Nizakumbona lapho.’ Qalani nginitjelile.”

₈Yeke abafazi basuka msinyana ethuneni banokwesaba, kodwana khonapho baphuphuma ithabo, bagijima bayokutjela abafundi bakhe.

₉Msinyana uJesu wahlangana nabo wathi: “Lotjhani!” Batjhidela, bambamba eenyaweni, bamkhothamela. ₁₀Yeke uJesu wathi kibo: “Ningesabi. Khambani niyokutjela abafowethu bonyana baye eGalile, bazangibona lapho.”

₁₁Kwathi abafazi basesendleleni, abanye babalindi bangena ngedorobheni bayokubikela abaphristi abakhulu ngakho koke okwenzakeleko. ₁₂Nasele abaphristi abakhulu bahlangene nabaphathi benza neqhinga, banikela amajoni imali enengi, ₁₃bathi kiwo: “Nifike nithi, ‘Sithe sisabanjwe sithongwana phakathi kobusuku, abafundi bakhe bafika beba isidumbu sakhe.’ ₁₄Nakube umbiko lo ufika kumbusi, sizamanelisa ukuze nina ningangeni ekingeni.”

₁₅Yeke amajoni athatha imali, enza njengombana bekayaliwe. Nje-ke umbiko lo warhatjheka emaJudeni woke ngitjho nanamhlanjesi.

₁₆Abafundi abalitjhumi nanye baya eGalile entabeni lapha uJesu abatjele bona baye khona. ₁₇Kwathi nabambonako, bamkhothamela kodwana abanye bazaza. ₁₈Yeke uJesu watjhidela kibo wathi: “Nginikelwe woke amandla ezulwini nephasini. ₁₉Ngalokho khambani niye ebantwini boke nanyana kukuphi, nibenze abafundi; babhabhadiseni ebizweni lakaBaba neNdodana noMoya oCwengileko, ₂₀nibafundise ukwenza koke enginiyale ngakho. Ngambala nginani njalo bekube sekupheleni kwesikhathi.”