UMATEWU 26

₁Kwathi bona uJesu aqede ukutjho zoke izintwezi, wathi ebafundini bakhe: ₂“Niyazi bona sekusele amalanga amabili kwaphela bona kube liPhasika, yeke iNdodana yoMuntu izakukhatjhelwa kobana ibethelwe esiphambanweni.”

₃Khonapho abaphristi abakhulu nabaphathi babantu bahlangana etatawini lomphristi omkhulu ebekuthiwa nguKhayafasi. ₄Balumba amano wokugola uJesu ngobuqili bese bayambulala. ₅Bathi: “Singakwenzi ngesikhathi somnyanya lokhu, nakungasinjalo kuzakuvuka umguruguru phakathi kwabantu.”

₆Kwathi uJesu aseseBhethaniya emzini wendoda ebekuthiwa nguSimoni onekhwekhwe, ₇kweza umfazi kuye aphethe umjeka uzele amakha wemali enengi, wawathela ehlokwakhe asahlezi etafuleni. ₈Lokha abafundi nababona isenzweso basilingeka khulu, bathi: “Kusoziswelani na? ₉Amakha la bekangathengiswa ngemali enengi, yabelwe abadududu!”

₁₀UJesu wakulemuka lokho ebebakutjho, yeke wathi kibo: “Nimtshwenyelani umfazi lo na? Ungenzele into ehle. ₁₁Abadududu nizokuhlala ninabo njalo, kodwana mina angekhe nahlala ninami. ₁₂Lokha nathela amakha la phezu kwami, ulungiselela umzimbami ukuyokubulungwa.

₁₃“Ngiqinisile ngiyanitjela bona kuphi nakuphi lapha ivangeleli litjhunyayelwa khona ephasini loke, lokho akwenzileko kuzakufakazwa ngakho, kube sikhumbuzo ngaye.”

₁₄Yeke omunye wabalitjhumi nambili, ibizo lakhe elinguJudasi Iskariyodi, waya kubaphristi abakhulu, ₁₅wababuza wathi: “Nizangipha ini nangimnikela ezandleni zenu na?” Babala amatjhumi amathathu weempaparwana zesiliva bamnikela zona. ₁₆Kusukela lokho uJudasi wafuna ithuba elihle lokukhaphela uJesu kibo.

₁₇Ngelanga lokuthoma lomnyanya wesiKwa esinganaNgumelo, abafundi beza kuJesu bathi: “Ufuna bona sikulungiselephi isidlo sePhasika na?”

₁₈Wathi kibo: “Ngenani ngedorobheni niye emuntwini othileko nimtjele nithi, ‘Umfundisi uthi, isikhathi sakhe sesifikile. Yena nabafundi bakhe bazokugidingela iPhasika lapha kwakho.’ ”

₁₉Yeke abafundi benza njengombana uJesu abayalile, balungisa iPhasika.

₂₀Kwathi nakuhlwako, uJesu wahlala nabalitjhumi nambili etafuleni. ₂₁Kuthe basagoma njalo, uJesu wathi kibo: “Ngiqinisile ngiyanitjela bona omunye wenu uzongikhaphela.”

₂₂Abafundi badana khulu bathoma ukumbuza ngamunye ngamunye, bathi: “Kghani iKosi itjho mina na?”

₂₃UJesu waphendula wathi: “Loyo ofake isandla sakhe ngesitjeni kanye nami, nguye ozongikhaphela. ₂₄INdodana yoMuntu izokukhamba njengombana kutloliwe ngayo. Kodwana maye kiloyo okhaphela iNdodana yoMuntu! Bekuzokuba ngcono emuntwini loyo ngathana azange abelethwe!”

₂₅Yeke uJudasi, ekunguye obekazomkhaphela wathi: “Kghani kungaba ngimi Rabi, na?”

UJesu wamphendula wathi: “Iye, nguwe.”

₂₆Kwathi basagoma njalo, uJesu wathatha isikwa, wathokoza, wasihlephula, wanikela abafundi bakhe, wathi: “Thathani nigome; lokhu mzimbami.”

₂₇Wathatha ikapho, wathokoza kuZimu, wabanikela wathi: “Selani noke nje ₂₈ngombana lokhu kuziingazi zami zesivumelwano ezaphalakela abanengi, malungana nokulitjalelwa kwezono. ₂₉Ngiyanitjela bona angekhe bengisasela isithelo sesidiribesi ukusuka gadesi bekube mhlana ngisisela ngobutjha nginani embusweni kaBaba.”

₃₀Kwathi sele bavume ingoma yokudumisa, baphuma baya entabeni ye-Oliva.

₃₁Yeke uJesu wathi kibo: “Khona namhlanjesi ebusuku noke nizokukhubeka ngami ngombana imitlolo ithi,

₃₂“Kodwana ngemva kokuvuka kwami ekufeni, ngizanandulela ngiye eGalile.”

₃₃UPitrosi wathi: “Ngitjho nanyana bangakhubeka boke laba ngebanga lakho, mina angisoze!” ₃₄UJesu wathi kuPitrosi: “Ngiqinisile ngithi kuwe khona ebusuku banamhlanjesobu ngaphambi kobanyana umkukurumbu ulile, uzabe sele ungilandule kathathu.”

₃₅Kodwana uPitrosi waqinisa wathi: “Ngitjho nanyana ngingafa kanye nawe, angeze bengithome ngikulandule.” Boke abafundi batjho okufanako.

₃₆Yeke uJesu wakhamba nabafundi bakhe baya endaweni ebizwa bona yiGetsemani, wathi kibo: “Yijani nihlezi lapha, ngisaya laphaya ngiyokuthandaza.” ₃₇Wakhamba noPitrosi namadodana amabili kaZebediya. Wathoma ukutlhuwa nokukhathazeka, ₃₈wathi kibo: “Umphefumulwami ubhodwe lisizi bekube sekufeni. Hlalani lapha nilinde kanye nami.”

₃₉Waya phambidlana, waguqa, wahloma ihloko phasi wathandaza wathi: “Baba, nakube kuyakghoneka, bengithi ikapho le ayisuswe kimapha! Nokho kungabi ngokuthanda kwami, kodwana kube yintando yakho.”

₄₀Yeke wabuyela ebafundini bakhe, wabafumana balele; wathi kuPitrosi: “Hawu madoda, nibhalelwe kulinda nami i-awara elilodwa na? ₄₁Yelelani nithandaze ukuze ningaweli ekulingweni. Ummoya uyavuma, kodwana inyama ibuthakathaka.”

₄₂UJesu wakhamba kwesibili wayokuthandaza, wathi: “Baba, nangabe ikapho le angekhe yasuswa kimi ngaphandle kobana ngiyisele, akwenzeke intando yakho.” ₄₃Kwathi nabuyako, godu wafumana abafundi balele ngombana amehlwabo gade azele ubuthongo.

₄₄Yeke wabatjhiya wakhamba, wathandaza ihlandla lesithathu, atjho wona amezwi lawo. ₄₅Wabuyela ebafundini wathi: “Nisalele, nisaphumulile na? Qalani, isikhathi sesifikile bona iNdodana yoMuntu ikhatjhelwe ezandleni zezoni. ₄₆Sikimani sikhambeni. Nango umkhaphelami asiza!”

₄₇Kwathi asakhuluma, uJudasi ongomunye wabalitjhumi nambili, wafika akhamba nesiqubuthu esikhulu sihlome ngeensabula nangeembhuku, sithunywe baphristi abakhulu nabaphathi babantu. ₄₈Nje-ke umkhapheli bekenze nabo isiga wathi: “Loyo engizamncwanga, nguye enimfunako. Mbambeni!”

₄₉UJudasi walunga thwi kuJesu, wathi: “Lotjha Rabi!” Wamncwanga.

₅₀UJesu waphendula wathi: “Mngani, uzokwenzani lapha na?”

Yeke amadoda atjhidela, abamba uJesu ambopha. ₅₁Khonokho omunye wabagade banoJesu warhwatjha isabulakhe, warharhabula isisebenzi somphristi omkhulu, wasisusa indlebe. ₅₂Kodwana uJesu wathi kuye: “Buyisela isabulakho endawenayo ngombana boke abarhwatjha isabula bazakufa ngesabula. ₅₃Udlumbana bona angeze ngakghona ukubiza uBaba, khonokho athumele ibutho leengilozi elingaphezu kweenkulungwana ezimatjhumi alikhomba nambili na? ₅₄Kodwana ngalokho, imitlolo ingazaliseka njani ethi kumele kwenzeke ngayo yona indlela le na?”

₅₅Khonokho uJesu wakhuluma nesiqubuthu wathi: “Ngirhola izilwi bona ningabeze nize ngeensabula nangeembhuku ukuzongibamba na? Bengihlala ethempelini nematatawini imihla yoke, ngifundisa, azange kheningibambe. ₅₆Kodwana koke lokhu kwenzekile ukuze kuzaliseke imitlolo yabaphorofidi.”

Yeke boke abafundi bamsukela babaleka.

₅₇Labo ababamba uJesu, bamusa kuKhayafasi, umphristi omkhulu, lapha bekuhlangene khona abafundisi bomthetho nabaphathi. ₅₈Kodwana uPitrosi wamlandela akudanyana, bewangena ngesirhodlweni somphristi omkhulu. Wangena wahlala phasi nabaqaphi afuna ukubona bonyana kuzokwenzekani. ₅₉Abaphristi abakhulu nebandla loke lafuna ubufakazi bamala ukujamelana noJesu ukuze bakwazi ukumbulala. ₆₀Kodwana abazange bafumane litho, ngitjho nanyana kweza abofakazi abanengi bamala nje.

Ekugcineni kwasikima abantu ababili ₆₁bathi: “Umrhali lo uthe, ‘Ngingabhuruza ithempeli lakaZimu ngilakhe ngobutjha ngamalanga amathathu.’ ”

₆₂Khona umphristi omkhulu wasikima wathi kuJesu: “Uzose uthule nje ungaphenduli na? Uthini ngobufakazi obujamelene nawe obulethwa madoda la, na?” ₆₃Kodwana uJesu wazithulela.

Umphristi omkhulu wakhuluma naye godu, wathi: “Ngikufungisa isifungo ngoZimu ophilako ngithi: Sitjela bona unguMesiya, iNdodana kaZimu na?”

₆₄UJesu waphendula wathi: “Iye, kunjengombana utjhwile. Kodwana ngiyanitjela noke nje bona ngokuzako nizokubona iNdodana yoMuntu ihlezi ngesigomeni sakaSomandla begodu isiza ngamafu ivela ezulwini!”

₆₅Khonapho umphristi omkhulu watlebhula izambatho zakhe wathi: “Selebe ahlambalazile! Sisafunelani abanye abofakazi na? Nani nizizwele ukuhlambalaza okungakaya! ₆₆Nicabangani na?” Baphendula bathi: “Ufanelwe kubulawa.”

₆₇Yeke bamkhafulela ngamathe ebusweni, bambetha ngamaguduva. Abanye bamwakala ₆₈bathi kuye: “Siphorofidela wena Krestu! Ngubani okubethileko na?”

₆₉Yeke uPitrosi bekahlezi ngaphandle ngesirhodlweni, kweza isisebenzi somntazana sathi: “Nawe gade unoJesu weGalile.”

₇₀Kodwana wakulandula lokho phambi kwabo boke, wathi: “Angazi bona ukhuluma ngani.” ₇₁Khonapho waphuma waya esangweni, lapha abonwa khona ngomunye godu umntazana owathi ebantwini ebebalapho: “Umrhali lo gade anoJesu weNazaretha.”

₇₂Godu uPitrosi wakulandula lokho wathi: “Angimazi umuntu loyo mina!”

₇₃Ngemva kwesikhatjhana abantu ebebajame lapho beza kuPitrosi, bathi kuye: “Ngambala ungomunye wabo ngombana ukukhuluma kwakho kuyakulahla.”

₇₄Yeke uPitrosi wathoma ukuthukana, afunga asithi: “Yeningisusele mina, angimazi umuntu lo!”

Khonokho umkukurumbu walila. ₇₅Yeke uPitrosi wakhumbula igama uJesu alikhulumileko lokuthi: “Ngaphambi kobana umkukurumbu ulile, uzabe sele ungilandule kathathu bona awungazi!” Nje-ke waphumela ngaphandle wakhihla isililo esibuhlungu.