ULUKASI 22

₁Nje-ke umnyanya wesiKwa esinganaNgumelo ebekuthiwa yiPhasika besele utjhidele. ₂Abaphristi abakhulu nabafundisi bomthetho bebafuna indlela yokususa uJesu ngombana begade besaba abantu.

₃Kodwana uSathana wangena kuJudasi okuthiwa ngu-Iskariyodi, ongomunye wabafundi abalitjhumi nambili. ₄Yena wakhamba wayokukhuluma nabaphristi abakhulu neenkhulu zethempeli bona angamkhaphela njani uJesu. ₅Bathaba kwamambala, bavuma bona bazamkhokhela. ₆UJudasi wakuvuma lokho, wathoma ukufuna ithuba lokunikela ngoJesu kibo, isiqubuthu singekho.

₇Lafika-ke ilanga lomnyanya wesiKwa esinganaNgumelo lapha bekuzokuhlatjwa khona imvana yePhasika. ₈UJesu wathumela uPitrosi noJwanisi wathi: “Khambani niyokwenza amalungiselelo ukuze sigome iPhasika.”

₉Bambuza bathi: “Bewufuna siyokulungiselela kuphi na?”

₁₀Wabaphendula wathi: “Kuzakuthi naningena ngedorobheni, nihlangatjezwe mumuntu athwele umjeka wamanzi. Mlandeleni beniyokungena emzini angena kiwo, ₁₁nithi kumninimuzi loyo, ‘Umfundisi uyabuza bona liphi ilawu labayeni lapha azakugomela khona iPhasika nabafundi bakhe na?’ ₁₂Uzanikhombisa ilawu elikhulu elingaphezulu, elinepahla. Yenzani lapho-ke amalungiselelo.”

₁₃Bakhamba, bafumana kunjengombana uJesu bekabatjelile. Yeke balungiselela iPhasika.

₁₄Kwathi nakufika isikhathi, uJesu nabafundi bakhe bazigedla etafuleni. ₁₅Wathi kibo: “Bengithande khulu bona ngigome iPhasikeli nani ngaphambi kobanyana ngitlhagiswe! ₁₆Ngambala ngiyanitjela bona angekhe ngaligoma godu bekube kulapha lizaliseka khona embusweni kaZimu.”

₁₇Nje-ke wathatha ikapho, wathokoza uZimu, ngemva kwalapho wathi: “Thathani lokhu nirhamulisane, ₁₈ngombana ngiyanitjela bona angeze bengisasela godu esithelweni sesidiribe bekube kumhlana kufika umbuso kaZimu.”

₁₉Yeke wathatha isikwa, wathokoza uZimu, wasihlephula wabanikela, asithi: “Lokhu kumzimbami, onikelwe nina. Yenzani lokhu ukuze ningikhumbule.” ₂₀Ngokunjalo, kwathi ngemva kwesidlo santambama, wathatha ikapho wabanikela, asithi: “Ikapho le isivumelwano esitjha eengazini zami ezithululelwa nina.

₂₁“Kodwana qalani, isandla saloyo ozongikhaphela sinami etafulenapha. ₂₂INdodana yoMuntu izokukhamba njengombana sele kuquntiwe, kodwana maye kiloyo muntu oyikhaphelako!”

₂₃Yeke bathoma ukubuzana babodwa bonyana ingaba ngubani hlangana nabo ozokwenza lokho.

₂₄Kwaqubuka ipikiswano phakathi kwabo kobana ngubani wabo othathwa bona ngomkhulu. ₂₅UJesu wathi kibo: “Amakhosi wabatjhili abusa phezu kwabo, bese kuthi labo abanegunya phezu kwabo bazibize bona babasekeli babo. ₂₆Kodwana anikameli ukuba njalo. Esikhundleni salokho, omkhulu phakathi kwenu kumele abe njengomncani bese kuthi obusako abe njengosebenza etafuleni. ₂₇Ngubani omkhulu na? Ngiloyo ohlezi etafuleni namkha ngiloyo osebenzako na? Akusingiloyo osetafuleni? Kodwana mina ngiphakathi kwenu njengaloyo osebenzako.

₂₈“Nina ningilabo abangisekeleko ekulingweni kwami. ₂₉Nje-ke nginethwesa umbuso njengombana noBaba angethwese wona ₃₀ukuze nigome benisele etafuleni lami embuswenami, nihlale eenhlalweni zobukhosi, nigwebe iinkoro ezilitjhumi nambili zakwa-Israyeli.”

₃₁UJesu wathi: “Simoni, Simoni! Qala, uSathana ukhombele ukukuhlunga njengekoroyi, ₃₂kodwana ngikuthandazele Simoni kobana ukukholwa kwakho kungabhalelwa. Wena-ke nasele uphendukile, uqinise abafowenu.”

₃₃UPitrosi waphendula wathi: “Kosi, ngilungele ukuya nawe ngesikhungweni nekufeni!”

₃₄UJesu waphendula wathi: “Ngiyakutjela Pitrosi, ngaphambi kobana umkukurumbu ulile namhlanjesi uzabe sele ungiphike kathathu bona awungazi.”

₃₅Yeke uJesu wabuza abafundi bakhe wathi: “Mhlana nginithume ninganasikhwama, imbada namapatlagwana nakhe naswela okuthileko na?”

Bamphendula bathi: “Azange.”

₃₆UJesu wathi: “Kodwana kwanjesi onesikhwama akasithathe, nonembada ayithathe, onganasabula akathengise isambatho sakhe ayoyithenga. ₃₇Ngambala ngithi kini umtlolo lo kumele uzaliseke kimi, ‘Wabalwa kanye nezoni.’ Iye okutlolwe ngami kuyazaliseka.”

₃₈Abafundi bamphendula bathi: “Qala, Kosi, nanzi iinsabula ezimbili.”

UJesu wathi: “Kwanele.”

₃₉UJesu waphuma emzini njengokujayelekileko waya entabeni ye-Oliva, abafundi bakhe bamlandela. ₄₀Kwathi nabafika endaweni leyo, wathi kibo: “Thandazani bona ningangeni ekulingweni.”

₄₁Yeke wasuka kibo waba sebangeni elingaba kuphoswa kwelitje, waguqa, wathandaza ₄₂wathi: “Baba, nawuthandako susa ikapho le kimapha, nokho kungabi ngentandwami kodwana kwenziwe yakho.” ₄₃Kweza kuye ingilozi ivela ezulwini yamqinisa. ₄₄Kwathi asebuhlungwini njalo, waqinisela khulu emthandazweni, umjulukwakhe waba njengamathosi weengazi athontela equlwanini.

₄₅Kwathi bona asikime lapha begade athandaza khona, walunga ebafundini bakhe, wabafumana balele, badiniwe ngokudabuka. ₄₆Wathi kibo: “Nilaleleni na? Sikimani nithandaze, khona ningazukungena ekulingweni.”

₄₇Kwathi asakhuluma, kwafika isiqubuthu sirholwa mumuntu ebekuthiwa nguJudasi nebegade angomunye wabafundi abalitjhumi nambili. Weza kuJesu kobana amncwange emhlathini. ₄₈Kodwana uJesu wathi kuye: “Judasi, ukhaphela iNdodana yoMuntu ngokuyincwanga na?”

₄₉Kwathi bona abafundi ebebanoJesu babone bonyana kuzokwenzekani, babuza bathi: “Kosi, sibamadlhe ngeensabula zethu na?” ₅₀Khonapho omunye wabo wakhekhebula ngesabula indlebe yangesidleni yekhoboka lomphristi omkhulu.

₅₁Kodwana uJesu wathi: “Kwanele lokho!” Wathinta indlebe yekhobokelo, walipholisa.

₅₂Yeke uJesu wathi kubaphristi abakhulu, iinkhulu zethempeli nakubaphathi ebebazombamba: “Ngimrholi wabokanabo kobana ningabeze ningiphumele ngeensabula nangeembhuku na? ₅₃Benginani ngesirhodlweni sethempeli woke amalanga, azange niphakamisele isandla phezu kwami. Kodwana lesi sikhathi senu namandla wobumnyama.”

₅₄Yeke bambamba uJesu bakhamba naye bamusa ngekumbeni yomphristi omkhulu. UPitrosi walandela kudanyana. ₅₅Babasa umlilo ekabeni yesirhodlo, bahlala phasi botha ndawonye. UPitrosi naye weza wazokotha kanye nabo. ₅₆Ikhobokakazi lambona ahlezi emlilweni. Lamqalisisa lathi: “Umrhali lo gade anaye!”

₅₇Kodwana uPitrosi waphika wathi: “Heyi wena mfazi, angimazi umuntu loyo!”

₅₈Ngemva kwesikhatjhana omunye wambona wathi: “Wena ungomunye wabo!”

Kodwana uPitrosi waphendula wathi: “Madekhethu, ngithi angisuye!”

₅₉Ngemva kwe-awara, omunye naye wayiqinisa indaba le wathi: “Ngambala umrhali lo bekakhamba naye ngombana naye umGalile!”

₆₀Kodwana uPitrosi waphendula wathi: “Heyi wena ndoda ndina, angazi bona ukhuluma ngani!”

Khonapho asakhuluma njalo, umkukurumbu walila. ₆₁IKosi yaphenduka yaqala poro kuPitrosi. UPitrosi wakhumbula ilizwi iKosi elikhulume kuye lokuthi: “Ngaphambi kobana umkukurumbu ulile namhlanjesi, uzabe sele ungiphike kathathu.” ₆₂Waphumela ngaphandle, walila kabuhlungu.

₆₃Amadoda ebegade aqaphe uJesu amphoqa abe ambetha. ₆₄Ambopha ngetjhila emehlweni athi: “Phorofida! Ngubani okubethileko?” ₆₅Ambiza ngeenhlamba ezinengi.

₆₆Kwathi bona kuse, isigungu sabaphathi babantu, abaphristi abakhulu kanye nabafundisi bomthetho bahlangana ndawonye, uJesu walethwa phambi kwabo. ₆₇Bathi kuye: “Nakube unguKrestu, yewusitjele.”

Wabaphendula wathi: “Nanginganitjela, angekhe nangikholwa. ₆₈Begodu nanginganibuza, angekhe nangiphendula. ₆₉Kodwana kusukela gadesi, iNdodana yoMuntu izakuhlaliswa ngesidleni sakaZimu uMninimandlawoke.”

₇₀Boke bathi: “Alo-ke, uyiNdodana kaZimu na?”

Wabaphendula wathi: “Kunjengombana nisitjho.”

₇₁Yeke godu bathi: “Alo, sisafunelani obunye ubufakazi na? Angithi sele sizizwele asitjho ngomlomakhe!”