ULUKASI 14

₁Ngelinye lamaSabatha lokha uJesu nayokugoma ngekumbeni yomFarisi odumileko, begade atjhejwe ngelihlo elibukhali. ₂Lapho ngaphambi kwakhe bekunendoda ebegade iphethwe sisifo samanzi. ₃UJesu wabuza abaFarisi nezazimthetho wathi: “Kumthetho ukupholisa ngeSabatha namkha njani na?”

₄Kodwana bazithulela. Yeke uJesu wathatha indoda leyo, wayipholisa, wathi ikhambe. ₅Yeke wababuza wathi: “Nakube omunye wenu unomntwana namkha ikomo ewele ngemgodini ngeSabatha, angekhe ayoyikhupha khonokho na?”

₆Kodwana boke batlhoga umlomo.

₇Kwathi uJesu nabona bonyana abamenywa bazikhethela iindawo ezihloniphekileko etafuleni, wabatjela umfanekiso lo: ₈“Lokha omunye nakumemela emtjhadweni, ungahlali endaweni ehloniphekileko ngombana kungenzeka bona kukhona omenyiweko oqakatheke khulu kunawe. ₉Kuthi kusesenjalo onimemileko, eze afese athi kuwe, ‘Akhe utjhidele umuntu lo esihlalweneso,’ yeke uzakuhlaziseka ukhambe uyokuhlala endaweni enyazekako. ₁₀Kodwana nawumenyiweko, hlala endaweni enyazekako khona kuzakuthi okumemileko nezako, athi kuwe, ‘Mngani, yewenyukele endaweni engcono.’ Ngaleyondlela uzakuhlonitjhwa phakathi kwabo boke abamenyiweko. ₁₁Ngambala woke oziphakamisako uzakuthotjiswa naloyo ozithobako uzakuphakanyiswa.”

₁₂Yeke uJesu wathi komumemileko: “Lokha nawenza isidlo semini namkha sakusihlwa, ungamemi abangani bakho, abafowenu, iinhlobo zakho namkha abomakhelwana bakho abanjingileko ngombana nawenza njalo, nabo bazakumema ngaleyondlela uzakuvuzwa. ₁₃Kodwana nawenza umnyanya, mema abadududu, abarholopheleko, abangakwazi ukukhamba neemphofu, ₁₄khona-ke uzakubusiswa. Nanyana bangekhe bakuvuze, uzakuvuzwa ekuvusweni kwabalungileko.”

₁₅Kwathi lokha omunye wabagade bahlezi naye etafuleni ezwe lokho, wathi kuJesu: “Ubusisiwe umuntu ozakugoma emnyanyeni embusweni kaZimu!”

₁₆UJesu wathi kuye: “Umuntu othileko bekalungiselela umnyanya omkhulu, wamema nabantu abanengi. ₁₇Ngesikhathi somnyanya, wathuma ikhoboka lakhe kobana liyokuthi kabamenyiweko, ‘Yizani, koke sekulungile!’ ₁₈Kodwana ngokufanako, boke bathoma ukuzilandula. Wokuthoma wathi, ‘Ngiqeda ukuthenga isimu, yeke kumele ngiyoyibona. Uzangilibalela, angiphumeleli.’ ₁₉Wesibili wathi, ‘Ngiqeda ukuthenga itjhumi leenkomo ezibotjhelwako, yeke ngisendleleni yokuzibona bona zidosa njani. Uzangilibalela, angiphumeleli.’ ₂₀Khonapho omunye naye wathi, ‘Ngiqeda ukuthatha, ngaleyondlela angiphumeleli ukuza.’

₂₁“Ikhoboka labuyela ekosinalo layokubika. Umninikhaya wathukuthela khulu, wayala ikhoboka lakhe wathi, ‘Phuma msinyana ungene eendledlaneni nemikghotheni yedorobho ubize abadududu, abarholopheleko, iimphofu neengoga.’ ₂₂Ikhoboka lathi, ‘Kosami, ngiwuphethile umyalwakho, kodwana kusese nendawo.’ ₂₃Yeke ikosi yathi ekhobokeni layo, ‘Phuma uye eendleleni nemikghotheni yemaphandleni, ubabize ukuze ikumbami igcwale. ₂₄Ngiyanitjela bona akakho noyedwa kilabo abamenyiweko ozakufumana ukunandipha komnyanyami!’ ”

₂₅Isiqubuthu esikhulu besikhamba noJesu, khonapho waphendukela kiso wathi: ₂₆“Nanyana ngubani oza kimi kodwana angazondi uyise nonina, umkakhe nabantwana, abafowabo nabodadwabo, ngitjho nepilwakhe, angeze aba mfundi wami. ₂₇Nanyana ngubani ongatjathi isiphambano sakhe angilandele, angekhe aba mfundi wami.

₂₈“Akhe sithi omunye wenu ufuna ukwakha umtlomogo. Akazokuhlala phasi ntange alinganise iindleko ukuze abone bonyana unemali eyaneleko yokuwakha bewuphele na? ₂₉Ngambala nakube ubeka isisekelo kodwana angasakghona ukuqedelela, boke abakubonako lokho bazamphoqa ₃₀bathi, ‘Umrhali lo uthome ukwakha, kodwana wangakghona ukuqeda!’

₃₁“Namkha akhe sithi ikosi izilungiselela ukuya epini ukuyokulwa nenye ikosi. Ayizokuhlala phasi ntange bese icabangisise bona izakukghona ngamadoda aziinkulungwana ezilitjhumi ukujamelana nenamadoda aziinkulungwana ezimatjhumi amabili na? ₃₂Nayingakghoniko, izakuthumela abazenda ekosini leyo isesekude, ikhombele bonyana kukhulunyiswane ngokuthula. ₃₃Ngokunjalo-ke, nanyana ngubani wenu ongatjhiyi koke anakho angeze aba mfundi wami.”

₃₄“Itswayi lilungile, kodwana nasele liqwatjhile, lingavuselelwa njani na? ₃₅Alikalungeli iqulwani ngitjho nanyana kungaba msuqwa, liyalahlwa. Oneendlebe zokuzwa akezwe.”