Isifo sokuvuza kwendoda
1USomnini wakhuluma noMosi no-Aroni wathi 2abakhulume nama-Israyeli bathi: “Nangabe indoda inokuvuza ebudodeni bayo, ukuvuza kwayokho kusilaphele. 3Isilaphele nanyana ukuvuza kwayo kuthonta namkha kungasathonti. Iye, ukuvuza kukusilaphala kiyo. 4Yoke imibhede ovuzako alala kiyo izakuba ngesilapheleko nezinto zoke ahlala phezu kwazo zisilaphele. 5Woke umuntu othinta umbhede womuntu onjalo kuzakufanela bona ahlanze izambatho zakhe, adude bese uhlala angosilapheleko bekuhlwe. 6Woke umuntu ohlala phezu kwananyana yini ehlezwi ngovuzako kuzakufanela bona ahlanze izambatho zakhe, adude bese uhlala angosilapheleko bekuhlwe. 7Othinta umzimba womuntu ovuzako kuzakufanela bona ahlanze izambatho zakhe, adude bese uhlala angosilapheleko bekuhlwe. 8Nakube ovuzako ukhafulela ohlambulukileko, khona-ke ohlambulukileko kufuze ahlanze izambatho zakhe, adude bese uhlala angosilapheleko bekuhlwe. 9Esinye nesinye isihlalo senjomani ekhwelwa ngovuzako sizakuba ngesisilapheleko. 10Iye, nanyana ngubani othinta into egade ihlezwi namkha ilelwe ngovuzako uzakuba ngosilapheleko bekuhlwe. Begodu othwala into enjalo kuzakufanela bona ahlanze izambatho zakhe, adude bese uhlala angosilapheleko bekuhlwe. 11Othintwa ngovuzako angakahlambi izandla zakhe, uzakuhlanza izambatho zakhe, adude bese uhlala angosilapheleko bekuhlwe. 12Isitja somdaka esithintwa ngovuzako kufuze sephulwe; kuthi zoke izitja zesigodo zihlanzwe ngamanzi.
13“Nasele ovuzako ahlanjululiwe, uzazibalela amalanga alikhomba wehlambululo bese uhlanza izambatho zakhe, adude ngemanzini agelezako, yeke uzakuba ngohlambulukileko. 14Ngelanga lobunane alethe amazuba amabili wommango namkha amazutjana amabili wekhaya kumphristi phambi kwakaSomnini emnyango wetende lokuhlanganela. 15Umphristi uzakwenza imihlabelo ngawo. Elinye libe mhlabelo wehlambululo bese kuthi elinye libe mhlabelo wokutjhiswa. Nje-ke umphristi uzamenzela itethelelo kuSomnini ngokuvuza kwakhe.”
Ukuvuza okujayelekileko kwendoda nomfazi
16“Nangabe indoda itsanyazile, kufuze idude umzimba woke bese ihlala isilaphele bekuhlwe. 17Nanyana ngiyiphi into yetjhila namkha yesikhumba etsanyazelweko, kufuze ihlanzwe bese ihlala ingesilapheleko bekuhlwe. 18Nangabe indoda ilala nomfazi bese itsanyaze, bobabili kufuze badude, babe ngabasilapheleko bekuhlwe.
19“Nangabe umfazi usesikhathini, uzakuba ngosilapheleko amalanga alikhomba, nomthintako uzakuba ngosilapheleko bekuhlwe. 20Yoke into alala phezu kwayo nasesikhathini, izakuba ngesilapheleko. Nakho koke ahlala kikho, kuzakuba ngokusilapheleko. 21Naloyo othinta umbhedakhe kufuze ahlanze izambatho zakhe, adude bese uhlala angosilapheleko bekuhlwe. 22Nothinta nanyana yini ehlezwi nguye, kufuze ahlanze izambatho zakhe, adude bese uhlala angosilapheleko bekuhlwe. 23Iye, uzakuba ngosilapheleko bekuhlwe nakube uthinta umbhede nanyana yini egade ihlezwi mfazi loyo.
24“Nangabe indoda ilala naye anjalo, ukusilaphala kwakhe kuba phezu kwayo. Indoda leyo izakuba ngesilapheleko amalanga alikhomba nombhede elala kiwo, uzakuba ngosilapheleko.”
Ukopha okudluleleko komfazi
25“Nangabe umfazi wopha iingazi amalanga amanengi kungasi sikhathi sakhe namkha ukudlula esikhathini, uzakuba ngosilapheleko njengalokha nasesikhathini mlunga nje asopha. 26Omunye nomunye umbhede alala kiwo nasophako, uzakuba ngosilapheleko njengalowo alala kiwo nasesikhathini. Nento yoke ahlala kiyo izakuba ngesilapheleko, ibe njenganyana asesikhathini. 27Woke umuntu othinta izintwezo uzakuba ngosilapheleko. Kufuze ahlanze izambatho zakhe, adude bese uhlala angosilapheleko bekuhlwe.
28“Nangabe ukopha kuphelile emfazini loyo, akazibalele yena amalanga alikhomba, emva kwalokho uzakuba ngohlambulukileko. 29Ngelanga lobunane akalethe amazuba amabili wommango namkha amazutjana amabili wekhaya kumphristi phambi kwakaSomnini emnyango wetende lokuhlanganela. 30Nje-ke umphristi uzakwenza elinye libe mhlabelo wehlambululo, elinye libe mhlabelo wokutjhiswa. Ngendlela leyo umphristi uzamenzela itethelelo kuSomnini ngokusilaphala kokopha kwakhe.
31“Ngokunjalo nizabe niyelelisa ama-Israyeli ekusilaphaleni kwawo ukuze angafi ngebanga lokusilaphala kwawo ngokurhubutjha ithaberinakeli lami eliphakathi kwenu.
32“Lowo kumthetho omayelana nomuntu ovuzako okutjho indoda etsanyazako bese iyasilaphala, 33umfazi osesikhathini, umuntu ovuzako nowophako kanye nendoda elala nomfazi osilapheleko.”
