ULEVITIKUSI 12

₁USomnini wakhuluma noMosi wathi ₂akakhulume nama-Israyeli athi kiwo: “Lokha umfazi osidisi nabeletha umntwana omsana, uzakuba ngosilapheleko amalanga alikhomba. Njengemalangenakhe wokubona inyanga, uzakuba ngosilapheleko. ₃Akuthi ngelanga lobunane kusokwe isana. ₄Umfazi lo kufuze ahlalele ubudlezana amanye amalanga amatjhumi amathathu nantathu ngaphambi kobana ahlambuluke eengazini zokubeletha kwakhe. Akukafaneli athinte litho elicwengileko begodu angangeni endaweni ecwengileko bekuphelele amalangakhe wokuhlanjululwa.

₅“Nakube ubeletha umntwana omntazana, uzakuba ngosilapheleko njengemalangenakhe wokubona inyanga, kodwana kube ziimveke ezimbili. Uzakuhlalela ubudlezana amanye amalanga amatjhumi asithandathu nasithandathu ngaphambi kobana ahlambuluke eengazini zokubeletha kwakhe.

₆“Lokha amalangakhe wokuhlanjululwa sele aphelele, kungaba ngewomntwana omsana namkha omntazana, kufuze alethe imvana enomnyaka munye kumphristi emnyango wetende lokuhlanganela kube mhlabelo wokutjhiswa. Alethe godu izuba lommango namkha izutjana lekhaya kube mhlabelwakhe wehlambululo. ₇Uzakwenza umhlabelo lowo phambi kwakaSomnini, azenzele itethelelo. Ngokunjalo uzakuba ngohlambulukileko ekusilaphaleni kwakhe kweengazi.

“Lowo-ke, mthetho womfazi obeletha umntwana omsana namkha omntazana. ₈Nakube akanamandla wokuletha imvana, akalethe amazuba amabili wommango namkha amazutjana amabili wekhaya, elinye libe ngelomhlabelo wokutjhiswa bese elinye liba ngelomhlabelo wehlambululo. Yeke umphristi uzamenzela itethelelo, abe ngohlambulukileko.”