UJOTJHUWA 23

₁Kwathi ngemva kwesikhathi eside uSomnini aphumuze ama-Israyeli ezitheni zawo zoke eziwabhodileko, noJotjhuwa bekaluphele namalanga sele ayile, ₂wabiza woke ama-Israyeli, abaphathi bakhona, iinhloko zemindeni, abagwebi kanye neenkhulu, wathi kibo: “Niyangibona bonyana sele ngiluphele namalanga ayile, ₃begodu nibone koke uSomnini uZimenu akwenze kizo zoke izizwezi ngenca yenu ngombana nguye onilweleko. ₄Qalani-ke, iinkoro zenu ngizabele ilifa ngefumbe, okuyinarha yezizwe ezisaseleko kanye nalezo engazirhayilako ukusuka eJordani ukuyokufika elwandle eliKhulu ngetjingalanga. ₅USomnini uZimenu uzaziqotjha izizwezo phambi kwenu, zisuke endlelenenu, nizakuthumba inarhazo njengombana uSomnini uZimenu anithembisa. ₆Ngalokho qinani khulu nigcine benenze koke okutlolwe ngencwadini yomthetho kaMosi, ningaphambukeli ngesigomeni namkha ngesinceleni, ₇ukuze ningahlangahlangani nezizwezi eziseleko phakathi kwenu. Ningaphathi amabizo wabozinyana bazo emilonyenenu, ningafungi ngabo, ningabalotjhi namkha nibakhothamele, ₈kodwana kakarelani kuSomnini uZimenu njengombana nenzile bekube kunamhlanje. ₉Iye, nguSomnini oqotjhe phambi kwenu izizwe ezikulu nezinamandla, nje-ke bekube kunamhlanje akunamuntu owakhe wajama phambi kwenu. ₁₀Umuntu munye kini ukghona ukugijimisa amadoda ayikulungwana ngombana nguSomnini uZimenu nguye onilwelako njengombana anithembisa. ₁₁Yeke nakelelani khulu ukukhathalela uSomnini uZimenu ₁₂ngombana nanifulathela uSomnini, nihlanganyele nemisalela yezizwe eziphakathi kwenwezi, nikhozisane nazo ngokuthatha abafazi kizo nazo zithathe abafazi kini, ₁₃yazini kuhle bonyana uSomnini uZimenu akazukuragela phambili ngokuqotjha izizwezo phambi kwenu. Zizakuba sisifu nesithiyo kini, zibe sibebhu emihlanenu nameva emehlwenenu, kufikela benibhubhe enarheni ehle kangaka uSomnini uZimenu aniphe yona le.

₁₄“Nje-ke mina sele ngizakuhlongakala. Kumele nazi ngeenhliziyo zenu zoke nangemiphefumulwenu yoke bonyana akunalitho elakhe langaba yipumelelo kikho koke okuhle uSomnini uZimenu anithembisa khona. Koke kwenzeka njengokwesithembiso, akunalitho elingazange libe yipumelelo. ₁₅Kodwana njengombana koke okuhle uSomnini uZimenu anithembisa khona kwanehlela, ngokunjalo uSomnini uzanehlisela koke okumbi, kufikela lapha anithanyela khona endaweni ehle kangaka aniphe yona le. ₁₆Iye, naniphambukako esivumelwaneni sakaSomnini uZimenu aniyala ngaso bese nidlhemadlhema ngemva kwabozinyana nibalotjhe benibakhothamele, itukuthelo yakaSomnini izakuvutha phezu kwenu, nibhubhe msinyana enarheni ehle kangaka uSomnini aniphe yona le.”