UJOTJHUWA 21

₁Iinhloko zemindeni yamaLevi zeza ku-Elazara umphristi nakuJotjhuwa umsa kaNuni neenhlokweni zemindeni yaboyise beenkoro zama-Israyeli ₂baseTjhilo enarheni yeKanana zathi kibo: “USomnini wayala ngoMosi bonyana sinikelwe amadorobho wokuhlala kanye namadlelo wefuywethu.”

₃Yeke ngomyalo kaSomnini ama-Israyeli athatha elifeni lawo amadorobho namadlelo wakhona awanikela amaLevi. ₄Ifumbe yawela emindenini yamaKhehathi. Yeke hlangana namaLevi aziinzukulwana zaka-Aroni umphristi amanye amaKhehathi afumana amadorobho alitjhumi nantathu ngefumbe ekorweni yakwaJuda, yakwaSimiyoni neyakwaBhenjamini. ₅Godu amanye amaKhehathi afumana amadorobho alitjhumi ngefumbe emindenini yekoro yakwa-Efrayimu, yakwaDani kanye nesiquntwini sakwaManase. ₆AmaGeritjhoni afumana amadorobho alitjhumi nantathu ngefumbe emindenini yekoro yakwa-Isakari, yakwa-Atjheri, yakwaNafitali kanye nesiquntwini sakwaManase eBhatjhani. ₇AmaMerari ngokwemindenawo afumana amadorobho alitjhumi nambili ekorweni yakwaRubeni, yakwaGadi kanye neyakwaZebuloni. ₈Ngaleyondlela ama-Israyeli anikela amaLevi amadorobho lawo kanye namadlelo wakhona ngefumbe njengombana uSomnini ayala ngoMosi.

_9-10Njengombana ifumbe nayiwako yathoma emindenini yamaKhehathi okuziinzukulwana zaka-Aroni ekorweni yamaLevi, amadorobho abalwe ngenzasi athathwa ekorweni yakwaJuda neyakwaSimiyoni anikelwa iinzukulwanezo. ₁₁Amadorobho lawo bekuyiKhiriyathi-Ariba, okutjho iRhebroni, ngeentatjaneni zakwaJuda kanye namadlelwayo magegana nayo. (U-Ariba lo gade kunguyise ka-Anakhi.) ₁₂Kodwana amasimu wedorobho nemizanalo kwanikelwa uKalebi umsa kaJefune njengelifa lakhe.

₁₃Ngaphandle kweRhebroni, okulidorobho lobuphephelo, kanye namadlelwayo, iinzukulwana zaka-Aroni umphristi zanikelwa iLibhina namadlelwayo, ₁₄iJatiri namadlelwayo, i-Etjhitemowa namadlelwayo, ₁₅iRholoni namadlelwayo, iDebhiri namadlelwayo, ₁₆i-Ayini namadlelwayo, iJutha namadlelwayo neBhethe-Tjhemetjhi namadlelwayo. Wolithoba amadorobho lawo aphuma eenkorweni ezimbili, okutjho yakwaJuda neyakwaSimiyoni. ₁₇Ekorweni yakwaBhenjamini kwathathwa iGibiyoni namadlelwayo, iGeba namadlelwayo, ₁₈i-Anatothi namadlelwayo ne-Alimoni namadlelwayo. Kwaba madorobho amane. ₁₉Amadorobho wabaphristi abaziinzukulwana zaka-Aroni, gade alitjhumi nantathu sele awoke kanye namadlelwawo.

₂₀Amanye amaKhehathi angewomndeni wamaLevi, abelwa amadorobho ekorweni yakwa-Efrayimu. ₂₁Anikelwa iTjhekemu, okulidorobho lobuphephelo namadlelwayo ngeentatjaneni zakwa-Efrayimu, iGezeri namadlelwayo, ₂₂iKhibitsayimu namadlelwayo neBhethe-Rhoroni namadlelwayo. Kwaba madorobho amane. ₂₃Ekorweni yakwaDani kwathathwa i-Elitekhe namadlelwayo, iGibetoni namadlelwayo, ₂₄i-Ayaloni namadlelwayo neGathi-Rimoni namadlelwayo. Kwaba madorobho amane. ₂₅Esiquntwini sekoro yakwaManase kwathathwa iTanaki namadlelwayo neJibiliyamu namadlelwayo. Kwaba madorobho amabili. ₂₆Amadorobho wemindeni yamaKhehathi amanye gade alitjhumi nawo woke amadlelwawo.

₂₇AmaGeritjhoni, okungeminye yemindeni yamaLevi, anikelwa amadorobho esiquntwini sekoro yakwaManase. Wona gade kuyiGolana eseBhatjhani namadlelwayo (okulidorobho lobuphephelo), iBhetjhitera namadlelwayo. Kwaba madorobho amabili. ₂₈Ekorweni yakwa-Isakari anikelwa iKhitjhiyoni namadlelwayo, iDaberathi namadlelwayo, ₂₉iJarimuthi namadlelwayo ne-Eni-Ganimu namadlelwayo. Kwaba madorobho amane. ₃₀Ekorweni yakwa-Atjheri anikelwa iMitjhali namadlelwayo, i-Abidoni namadlelwayo ₃₁iRhelikhathi namadlelwayo neRerhobho namadlelwayo. Kwaba madorobho amane. ₃₂Ekorweni yakwaNafitali anikelwa iKhedetjhi eseGalile namadlelwayo (okulidorobho lobuphephelo), iRhamothi-Dori namadlelwayo neKharitani namadlelwayo. Kwaba madorobho amathathu. ₃₃Amadorobho wemindeni yamaGeritjhoni gade alitjhumi nantathu sele awoke namadlelwawo.

₃₄KumaLevi aseleko, imindeni yamaMerari yanikelwa amadorobho alandelako: Ekorweni yakwaZebuloni anikelwa iJokhineyamu namadlelwayo, iKharita namadlelwayo, ₃₅iDimina namadlelwayo neNahalali namadlelwayo. Kwaba madorobho amane. ₃₆Ekorweni yakwaRubeni anikelwa iBhetseri namadlelwayo, iJatsa namadlelwayo, ₃₇iKhedemothi namadlelwayo neMefathi namadlelwayo. Kwaba madorobho amane. ₃₈Ekorweni yakwaGadi anikelwa iRamothi eseGiliyadi namadlelwayo (okulidorbho lobuphephelo), iMarhanayimu namadlelwayo, ₃₉iRhetjhibhoni namadlelwayo neJazeri namadlelwayo. Kwaba madorobho amane sele awoke. ₄₀Sele awoke amadorobho abelwa imindeni yamaMerari okumaLevi aseleko, gade alitjhumi nambili.

₄₁Woke amadorobho wamaLevi agade aphakathi kwama-Israyeli bekamatjhumi amane nobunane kanye namadlelwawo. ₄₂Elinye nelinye lamadorobho lawo gade linamadlelo magegana nalo. Iye, bekunjalo-ke kiwo woke amadorobho lawo.

₄₃Ngaleyondlela uSomnini wanikela ama-Israyeli inarha yoke afunga bona uzoyinikela aboyisemkhulu. Kwathi bona ayithumbe, ahlala kiyo. ₄₄USomnini wanikela ama-Israyeli ukuphumula mahlangothi woke njengombana afunga kiboyisemkhulu. Akunasitha nasinye esajamelana nawo ngombana uSomnini wanikela zoke izitha ezandleni zawo. ₄₅Akunasithembiso nasinye esihle uSomnini asenza ekumbeni yama-Israyeli esingazange siphumelele. Koke kwenzeka.