UJOTJHUWA 19

₁Ifumbe yesibili yawela ekorweni yakwaSimiyoni ukuya ngokwemindenayo. Ilifa layo laba hlangana nelifa lekoro yakwaJuda. ₂Isabelo sayo saba yiBheritjheba, iTjheba, iMolada, ₃iRhatsari-Tjhuwali, iBhala, i-Etsemu, ₄i-Elitoladi, iBhetuli, iRhorima, ₅iTsikhilagi, iBhethe-Hamarikabothi, iRhatsari-Susa, ₆iBhethe-Lebawothi neTjharurheni. Kwaba madorobho alitjhumi nantathu nemizanawo. ₇Amanye bekuyi-Ayini, iRimoni, i-Eteri ne-Atjhani. Kwaba madorobho amane nemizanawo, ₈iye, yoke imizana emagegana namadorobho lawo ukufaka phakathi iBhalathi-Bheri neRamathi-Negevu.

Lelo bekulilifa lekoro yakwaSimiyoni ukuya ngokwemindenayo. ₉Ilifa lekoro yakwaSimiyoni beliyingcenye yenarha yakwaJuda ngombana isabelo sekoro yakwaJuda besisikhulu khulu kiso. Ngalokho ikoro yakwaSimiyoni yafumana isabelo hlangana nelifa lekoro yakwaJuda.

₁₀Ifumbe yesithathu yawela ekorweni yakwaZebuloni ukuya ngokwemindenayo. Imikhawulo yelifa layo beyithoma eSaridi. ₁₁Umkhawulo omunye ukhuphukela nca ngelwandle neMarala, udlule eduze neDabetjhethi, uthinte umlanjana oseJokhineyamu. ₁₂Omunye bewusuka eSaridi utjhinge tjhuba langepumalanga ukudabula inarha yeKisilothi-Tabori unqombe eDaberathi bese ukhuphukela eJafiya. ₁₃Ukusuka lapho utjhinge tjhuba langepumalanga yeGathi-Rheferi ne-Eti-Khatsini, unqombe eRimoni bese ujikela ngeNeya. ₁₄Ngetlhagwini yeRhanatoni ujike bese uphelela emrhobeni weJifitarheli. ₁₅Ilifelo belifaka phakathi iKhathathi, iNahalali, iTjhimroni, iJidala neBhethe-Lehema. Kwaba madorobho alitjhumi nambili nemizanawo.

₁₇Ifumbe yesine yawela ekorweni yakwa-Isakari ukuya ngokwemindenayo. ₁₈Isabelo sayo safaka phakathi iJizriyela, iKesulothi, iTjhunemu, ₁₉iRhafarayimu, iTjhiyoni, i-Anarharathi, ₂₀iRabithi, iKhitjhiyoni, i-Ebetsi, ₂₁iRemethi, i-Eni-Ganimu, i-Eni-Rhada neBhethe-Patsetsi. ₂₂Umkhawulo wesabelo sayo wathinta iTabori wadlulela eTjharhatsima neBhethe-Tjhemetjhi waphelela eJordani. Kwaba madorobho alitjhumi nesithandathu nemizanawo.

₂₄Ifumbe yesihlanu yawela ekorweni yakwa-Atjheri ukuya ngokwemindenayo. ₂₅Isabelo sayo safaka hlangana iRhelikhathi, iRhali, iBhetheni, i-Akitjhafi, ₂₆i-Alameleki, i-Amadi neMitjhali. Umkhawulo wakhona bewudlula entabeni iKarameli bese urhubalale uye ngetjingalanga ukuyokufika ekugcineni komlanjana iLibinathi. ₂₇Ukuyela ngepumalanga, umkhawulo bewujikela eBhethe-Dagoni, ugege namaphethelo weZebuloni ngetlhagwini yomrhoba iJifitharhi-Eli, unqombe eBhethe-Emekhi neNehiyeli bese uragele phambili utjhinge eKabhulu ngetlhagwini. ₂₈Umkhawulo bewufaka phakathi i-Eburoni, iRerhobho, iRhamoni neKhana, ukuyokufika eTsidoni eKulu. ₂₉Usuke lapho ujike uye eRama uyokutjhayisa eTirosi okulidorobho elinemithangala; godu ujike udlule iRhosa uphelele elwandle. Amanye amadorobho bekuyiMarhalebu, i-Akziba, ₃₀i-Uma, i-Afekhi neRerhobho. Kwaba madorobho amatjhumi amabili nambili nemizanawo.

₃₂Ifumbe yesithandathu yawela ekorweni yakwaNafitali ngokuya ngemindenayo. ₃₃Umkhawulwayo ngesewula bewuthoma eRhelefi, emthini omkhulu we-owuku eTsananimu, udabule e-Adami-Nekhebi neJabhiniyeli ukuyokufika eLakhumu bese uphelela eJordani. ₃₄Ukusuka eRhelefi ujikele ngetjingalanga uye e-Azinothi-Tabori, urhubalale njalo uye eRhukhokhi ufese ugege emaphethelweni wakwaZebuloni ngesewula newakwa-Atjheri ngetjingalanga, wayokuphelela ngepumalanga eJehuda ngemlanjeni iJordani. ₃₅Amadorobhayo anemithangala kwaba yiTsidimu, iTseri, iRhamathi, iRakhathi, iKinerethi, ₃₆i-Adama, iRama, iRhatsori, ₃₇iKhedetjhi, i-Edreyi, i-Eni-Rhatsori, ₃₈iJironi, iMigidali-Eli, iRhoremu, iBhethe-Anathi neBhethe-Tjhemetjhi. Kwaba madorobho alitjhumi nethoba nemizanawo.

₄₀Ifumbe yekhomba yawela ekorweni yakwaDani ukuya ngokwemindenayo. ₄₁Umkhawulo welifa layo bewufaka phakathi iTsora, i-Etjhitawolo, i-Iri-Tjhemetjhi, ₄₂iTjhalabhini, i-Ayaloni, iJitila, ₄₃i-Eloni, iTimna, i-Ekhironi, ₄₄i-Elitekhe, iGibetoni, iBhalathi, ₄₅iJehudi, iBhene-Bherakhi, iGathi-Rimoni, ₄₆iMe-Jarikhoni neRakhoni kanye nemikhawulo emalungana neJafo. ₄₇Kodwana bakwaDani baloba umkhawulwabo. Nje-ke bakhuphuka bayokulwa neLetjhemu, bayisahlela, bayimadlha ngesabula, bayithumba bebahlala kiyo. Bayibiza bona yiDani, bayithiyelela ngoyisemkhulu uDani.

₄₉Kuthe bona baqede ukwaba inarha njengelifa ngokwemikhawulwayo, ama-Israyeli anikela uJotjhuwa umsa kaNuni isabelo phakathi kwawo. ₅₀Ngokomyalo kaSomnini ama-Israyeli amnikela idorobho alikhombelako, okuyiTimnathi-Serarhi ngeentatjaneni zakwa-Efrayimu. Wavuselela idorobhelo, wahlala kilo.

₅₁Lawo-ke mamafa u-Elazara umphristi noJotjhuwa umsa kaNuni kanye neenhloko zemindeni yaboyise beenkoro zama-Israyeli abawaba ngefumbe eTjhilo phambi kwakaSomnini emnyango wetende lokuhlanganela. Baqeda njalo-ke ukwaba inarha.