Ipi eGibiyoni
1U-Adonitsedekhi ikosi yeJerusalema wezwa bona uJotjhuwa uthumbe i-Ayi bewayibhubhisa nya. Wezwa godu bonyana i-Ayi nekosi yakhona uyenze njengalokho akwenza ngeJerikho nekosi yakhona, nokobana abahlali beGibiyoni babe nokuthula naye begodu sele bangaphasi kwama-Israyeli. 2Yena nabantu bakhe bahlalela evalweni ngalokho ngombana iGibiyoni gade kulidorobho elikhulu, elalifana nelinye lamadorobho webukhosini. IGibiyoni beyidlula i-Ayi begodu namadoda wakhona aziingorho. 3Yeke u-Adonitsedekhi ikosi yeJerusalema wathumela ilizwi kuHohami ikosi yeRhebroni, uPiramu ikosi yeJarimuthi, uJafiya ikosi yeLakitjhi nakuDebiri ikosi ye-Egiloni wathi: 4“Khuphukani nizapha nizongisiza sisahlele iGibiyoni ngombana yenze ukuthula noJotjhuwa nama-Israyeli.”
5Amakhosi amahlanu wama-Amori lawo, okuyikosi yeJerusalema, ikosi yeRhebroni, ikosi yeJarimuthi, ikosi yeLakitjhi nekosi ye-Egiloni, ahlanganisa woke amabuthwawo ndawonye, akhuphuka, avimbezela iGibiyoni bona alwe nayo. 6Amadoda weGibiyoni athumela ilizwi kuJotjhuwa ekampeni eGiligali athi: “Ungaliseleli iinceku zakho, yewukhuphuke msinya uzosisindisa ngokusisiza ngombana woke amakhosi wama-Amori ahlala ngeentabeni abuthene kobana ajamelane nathi.”
7UJotjhuwa wakhuphukela eGiligali akhamba nawo woke amadoda wepi neengorho zoke. 8USomnini wathi kuJotjhuwa: “Ungabesabi ngombana sele ngibanikele esandleni sakho. Akunandoda nayinye phakathi kwabo ezakujama phambi kwakho.”
9UJotjhuwa wasuka eGiligali, warhwanta ubusuku boke wavelela amakhosi lawo angakatjheji. 10USomnini wenza amakhosi lawo nabantu bawo bona bahlangahlangane phambi kwama-Israyeli, abadulela eGibiyoni abagijimisa ngendlela eyehlelako yeBhethe-Rhoroni, abamadlha kufikela e-Azekha neMakheda. 11Nabalokhu babaleka phambi kwama-Israyeli, nabehlela emehlelweni weBethe-Rhoroni, uSomnini wawululela iingiditjha zesinanja phezu kwabo bekwaba se-Azekha, bafela khonapho. Abafa ngebanga leengiditjha zesinanja baba banengi ukudlula ababulawa ma-Israyeli ngesabula.
12UJotjhuwa wakhuluma noSomnini mhlana anikela ama-Amori kuma-Israyeli, wathi phambi kwawo:
“Langa, jama tsi ngehla kweGibiyoni,
nawe nyezi ngehla komrhoba we-Ayaloni.”
13Ngambala ilanga lajama
nenyezi yangakhambi,
kufikela lapha isizwe sizibuyiselela khona ezitheni zaso.
Lokhu kwatlolwa encwadini kaJatjhari. Ilanga lajama phakathi kwesibhakabhaka, azange lirhabe ukutjhinga isikhathi esingaba lilanga. 14Azange kube nelanga elifana nalo ngaphambilini namkha ngemva kwalo, kobana uSomnini ulalele ilizwi lomuntu ngombana mhlokho walwela ama-Israyeli. 15UJotjhuwa wabuyela ekampeni eGiligali nawo woke ama-Israyeli.
16Amakhosi amahlanu lawo abaleka, azifihla ngerholweni leMakheda. 17Bekubikwe kuJotjhuwa kwathiwa: “Amakhosi amahlanu afunyenwe azifihle ngerholweni leMakheda.”
18UJotjhuwa wathi: “Sunduzelani ilitje elikhulu emlonyeni werholo, nibeke amadoda awagade, 19kodwana ningahlali lapho nina ngokwenu. Gijimisani izitha zenu, nibe seenthendeni zazo, ningazivumeli zingene ngemadorobhenazo ngombana uSomnini uZimenu uzinikele esandleni senu.”
20Kwathi ngemva kobana uJotjhuwa nama-Israyeli bamadlhe khulu izithezo kufikela lapha ziphela khona nya, nalokha abasindileko sele bangene ngemadorobheni anemithangala, 21boke abantu babuyela baphephile kuJotjhuwa ekampeni yeMakheda. Akunamuntu owavula umlomakhe ngama-Israyeli.
22UJotjhuwa wathi: “Vulani umlomo werholo bese nilethe amakhosi amahlanu lawo kimapha.”
23Yeke benza njalo, bakhupha amakhosi amahlanu lawo ngerholweni bawaletha kuye. Gade kuyikosi yeJerusalema, ikosi yeRhebroni, ikosi yeJarimuthi, ikosi yeLakitjhi nekosi ye-Egiloni. 24Lokha nabaletha amakhosi lawo kuJotjhuwa, uJotjhuwa wabiza woke amadoda wakwa-Israyeli wathi eenduneni zamadoda wepi ebegade zikhambe nawo: “Tjhidelani, nibeke iinyawo zenu phezu kweentamo zamakhosi la.” Yeke zatjhidela, zabeka iinyawo zazo eentanyeni zawo. 25UJotjhuwa wathi kizo: “Ningesabi namkha niphelelwe mamandla. Qinani nibe nesibindi ngombana ngilokho uSomnini azakwenza kizo zoke izitha zenu enilwa nazo.”
26Ngemva kwalokho uJotjhuwa wawamadlha, wawabulala bewawahlomela enye nenye esigodweni sayo. Alembelela eengodwenapho bekwahlwa. 27Kodwana kwathi nakutjhinga ilanga, uJotjhuwa wayala bonyana aphanyulwe eengodweni, wawaphosela ngerholweni lapha begade azifihle khona. Kwabekwa amatje amakhulu emlonyeni werholwelo, asese lapho nanamhlanje. 28UJotjhuwa wathatha iMakheda mhlokho wayimadlha kanye nekosi yakhona ngesabula. Wabhubhisa nya koke okuphilako okungedorobhenapho. Azange atjhiye nakunye kuphunyurhile. Ikosi yeMakheda wayenza asenze ikosi yeJerikho.
Ukuthunjwa kwenarha yangesewula
29UJotjhuwa wasuka eMakheda nama-Israyeli woke wanqomba eLibhina bona alwe nayo. 30USomnini wanikela iLibhina nekosi yakhona esandleni sama-Israyeli. UJotjhuwa wayimadlha ngesabula nakho koke okuphilako okukiyo. Azange atjhiye nakunye kuphunyurhile. Ikosi yakhona wayenza asenze ikosi yeJerikho.
31UJotjhuwa wasuka eLibhina nama-Israyeli woke wanqomba eLakitjhi. Wayivimbezela wayisahlela. 32USomnini wanikela iLakitjhi esandleni sama-Israyeli. Ngelanga lesibili uJotjhuwa wayithumba, wayimadlha ngesabula nakho koke okuphilako okukiyo njengombana enza ngeLibhina.
33Kwathi lokha uHoramu ikosi yeGezeri nenyuka ukusiza iLakitjhi, uJotjhuwa wamumadlha kanye nabantu bakhe, wangatjhiya namunye wakhe ophunyurhako.
34UJotjhuwa wasuka eLakitjhi nama-Israyeli woke banqomba e-Egiloni. Bafese bayivimbezela bayisahlela, 35bayithumba khona mhlokho, bayigongoda ngesabula. UJotjhuwa wabhubhisa nya koke okuphilako okukiyo njengombana enza ngeLakitjhi.
36UJotjhuwa wasuka e-Egiloni akhamba nama-Israyeli woke, banqomba eRhebroni. Bafese bayisahlela, 37bayithumba, bayigongoda ngesabula. UJotjhuwa wabhubhisa ikosi nemizana yakhona yoke, nakho koke okuphilako okukiyo. Azange atjhiye nakunye kuphunyurhile; kwaba njengombana enza nge-Egiloni. Iye, wayibhubhisa nya nakho koke okuphilako okukiyo.
38UJotjhuwa nawo woke ama-Israyeli babuyela eDebhiri, nayo bayisahlela. 39Bayithumba nekosi yakhona kanye nemizana yakhona yoke. Bayigongoda ngesabula, babhubhisa nya koke okuphilako okukiyo. UJotjhuwa azange atjhiye nakunye kuphunyurhile. Lokho akwenza ngeRhebroni neLibhina namakhosi wakhona, wakwenza ngeDebhiri nekosi yakhona.
40Ngaleyondlela uJotjhuwa wathumba soke isifunda sesewula: iintaba, isewula yenarha, iTjhefela kanye namathomo wakhona. Wabhubhisa woke amakhosi wesifundeso. Azange atjhiye nakunye kuphunyurhile, iye, wabhubhisa nya koke okuphilako njengombana uSomnini uZimu wakwa-Israyeli ayalile. 41UJotjhuwa wabamadlha boke ukusuka eKhadetjhi-Bharineya ukuya eGaza, nayo yoke inarha yeGotjheni ukuyokufika eGibiyoni. 42Wathumba woke amakhosi lawo nenarhawo ngasikhathi sinye ngombana uSomnini uZimu waka-Israyeli walwela u-Israyeli. 43Yena nama-Israyeli woke babuyela ekampeni eGiligali.
