UJOBHO 6

₂“Maye, thana isizi lami liyalinganiseka!

Nehlekelelami ibekwe esilinganisweni sinye!

₃Kokubili bekuzakuba budisi kunetjhwabatjhwaba yelwandle!

Kungebangelo ngikhuluma ngehliziyo ebuhlungu:

₄Ngambala imisubela kaZimu oSabekako ingihlabile,

ummoyami urhamula isihlungu sayo,

ukwesabeka kwakaZimu kuyangiqoba.

₅Udumbana webaleni uyalila nakunotjani na?

Nekomo iyalila nayinefuru na?

₆Okunganandiphiko kungagomeka kunganatswayi na?

Kunokunandipha ebumhlopheni beqanda na?

₇Umphimbami uyala ukukwamukela,

amezwenu afana nokugoma okungigonyulukisako.

₈“Inga ngingazwakalisa isibawo sami,

uZimu angiphe engikurhuluphelako.

₉Kwanga uZimu angangipitliza

asuse isandla sakhe,

uqunte intambo yepilwami!

₁₀Lokho-ke kuzangiduduza godu;

ngithabe nanyana ngisebuhlungwini.

Akazukungibabalela

ngombana azange ngigodle amezwi woCwengileko.

₁₁Anginamandla wokulinda,

anginasikhathi sokwelula ipilwami!

₁₂Ngiqine njengelitje na?

Inyamami yikoporo na?

₁₃Ngambala anginamdlandla

nepumelelo itjhabalalisiwe kimi.

₁₄“Kulihlazo emuntwini onyelelela umnganakhe,

onjalo udela ukwesaba uZimu oSabekako.

₁₅Abafowethu abathembeki,

banjengomlanjana wesikhatjhana,

iye, bamilanjana egeleza ebusika:

₁₆Balithunzi elimnyama nerhwaba,

kibo kuzifihla iliqhwa.

₁₇Kuthi nakuthoma ukutjhisa banyamalale,

nakutjhisako banyelele endawenabo.

₁₈Imilanjana leyo iphumbutha indlelayo,

iphelele erhalawumbeni bese iyanyamalala.

₁₉Imilandelande yeTema yazuma imilanjana leyo;

idwendwe elisuka eTjheba larhuluphela amanzayo.

₂₀Ladana ethembeni lalo,

lafika lapho lakhungatheka.

₂₁Ninjalo-ke nina kimi:

Lokha nanibona ihlekelele, niyacimela.

₂₂“Nikhe nangizwa ngitjho okulandelako na?

‘Yeningiphe okuthileko!

Ngisikelani emnonwenenu ukuze ngifumbathise!

₂₃Ngenyelani esandleni somjamelani!’

namkha,

‘Ngihlengani ezandleni zeenrhonga!’

₂₄Yeke ngifundisani, khona ngizakuthula,

ningibonise bona ngiyitjhaphe kuphi.

₂₅Iqiniso alibulali!

Kodwana ukungisola kwenu akusizi.

₂₆Nidlumbana bona ningakhalima ngamezwi

lokha nanithatha amezwi womuntu odangeleko

njengommoya na?

₂₇Nenza ifumbe ngentandani,

nenaniselane ngomnganenu!

₂₈Akhe ningiqale emehlweni.

Ngiyafunga, angeze nganikhohlisa!

₂₉Akhe niphenduke ngiyanibawa, akungabi nobumbi.

Iye, phendukani!

Indabami inetlha,

₃₀akukho ukonakala elimini lami,

ngiyizwile ihlekelele bona injani!”