UJOBHO 33

₁Nje-ke Jobho, akhe ulalele amezwami,

ulalelisise koke engikutjhoko.

₂Qala, ngivula umlomami,

ilimu lami ngemlonyeni lifuna ukukhuluma.

₃Amezwami avuthiweko azakuveza ubuqotho behliziywami,

umlomami ukhulume okumsulwa kwaphela.

₄UMoya kaZimu uyangenzisa,

umphefumulo woSabekako ungenza ngikhulume.

₅Ngiphendula-ke, nakube uyakghona,

zilungiselele uqalane nami.

₆Phambi kwakaZimu sengizifanela nawe,

nami ngabunjwa ngomdaka.

₇Ngalokho ukungesaba kungakwethusi,

nesandla sami singakudisibezi.

₈“Kodwana ngikuzwe kuhle,

namezwakho ngisawezwa eendlebeni zami

lokha nawusithi,

₉‘Ngihlanzekile, anginasiphambeko,

ngimsulwa, anginasono.

₁₀Qala, uZimu uyangitjhijila,

ungithatha njengesitha sakhe.

₁₁Ubophelela iinyawo zami ngesimbi esigodweni,

uqalisisa zoke iindlela zami.’

₁₂Kodwana ngokutjho njalo kwakho, uphambukile.

Ipendulwami kilokho ithi,

‘UZimu mkhulu kunobhubhako.’

₁₃Kubayini usolane naye,

uthi akaphenduli nalinye ilizwi lomuntu?

₁₄Phela uZimu uyakhuluma,

kungaba ngalendlela namkha ngenye,

nanyana umuntu angakuboni lokho.

₁₅Kungaba ngebhudango, umbono webusuku:

Lokha abantu nababanjwe buthongo,

barhona emikghadinabo,

₁₆yena uvula iindlebe zabo,

abaphazamise ngeeyeleliso,

₁₇ukuze atjhidise umuntu ekoneni kwakhe,

ahlunge ukuzitjhaya kuye,

₁₈amphephise emlonyeni wethuna,

iye, ipilwakhe ekubhujisweni ngomkhonto.

₁₉Godu umuntu angakhalinywa ngesihlabi asemkghadini,

okukuqaqamba kwamathambo okungapheliko,

₂₀ihliziywakhe ithitjhelwe kugoma,

angabi nendeni emhlophe ngeenkhanakhana.

₂₁Umzimbakhe uyawohloka angasaqaleka,

namathambakhe ebegade angabonakali,

abonakale avele ngaphandle.

₂₂Umphefumulwakhe utjhidela ethuneni,

ipilwakhe ibandamela kabafileko.

₂₃“Nakunengilozi yinye phakathi kwekulungwana

ebeyingamsekela, imkhulumele,

imemezele ukulunga ngaye,

₂₄ibe nomusa kuye ithi,

‘Zimu, msindise emlonyeni wethuna,

ngimfumanele isihlengo’,

₂₅umzimbakhe uzakwenziwa butjha

ube ngaphezu kwebutjheni bakhe

iye, uzakuphuluka ube namandla wobutjha.

₂₆Uzakuthandaza kuZimu, uZimu amamukele,

uzazizwela ubukhona bakaZimu ngokuhlokoma,

uZimu abuyisele obhubhako esimeni sokulunga.

₂₇Umuntu loyo uzakusuka

aye ebantwini athi,

‘Ngonile, ngahlanakezela okulungileko,

azange ngifumane okungifaneleko.

₂₈UZimu uhlenge umphefumulwami ekufeni,

yeke ngizakuphila ngithokozele ukukhanya.’

₂₉“UZimu wenzela umuntu koke lokhu,

kube kabili, bekube kathathu,

₃₀abuyise umphefumulwakhe ekufeni,

ukuze umkhanyo wokuphila ukhanye kuye.

₃₁Yelela-ke Jobho, ungilalelisise,

thula uthi du, ngikhulume.

₃₂Nakube kunento ofuna ukuyitjho, ngiphendula,

khuluma ndoda,

ngombana ngifuna ukuvumelana nawe.

₃₃Kodwana nakube akunalitho,

khona-ke yewungilalele,

thula uthi du, ngikufundise ukuhlakanipha.”