UJOBHO 18

₂“Uzakuratharatha kuze kube nini?

Buyela emikhumbulwenakho!

Emva kwalokho singakhuluma.

₃Kubayini usithathe njengeenkomo,

sibe bokeke emehlwenakho?

₄Wena ozirathula ngetukuthelwakho.

Utjho bona inarha ingalahlwa ngebanga lakho,

namkha kususwe idwala linye endawenalo na?

₅Ngambala umkhanyo weenkhohlakali uzakucinywa,

iye, amalahle womlilo wokhohlakeleko amthuthu.

₆Umkhanyo ufiphele ngetendeni lakhe

nesibani sakhe lapho akhona siyacima.

₇Ancitjhisiwe amabhadulwakhe anamandla,

amaqhingakhe ayamkhuba.

₈Iinyawo zakhe zimrholela ngenedeni,

urhohlomela ngemgodini.

₉Isithiyo simbamba ngesithende,

isifu siyamurhorheja.

₁₀Ufihlelwe ikawule equlwanini,

iye, ubekelwe unoqhaka endleleni.

₁₁Ivalo limethusa ngapha nangapha,

limhlala eenthendeni.

₁₂Amandlakhe aqothulwa yindlala,

ihlekelele imlele nje, eqadi kwakhe;

₁₃iqothula isikhumba sakhe

izibulo lokufa liqede amalungu womzimbakhe.

₁₄Udzwetjulwa ebuphephelweni betende lakhe,

alethwe ekosini yevalo.

₁₅Etendeni lakhe kunomlilo,

isibabuli sisabalele endawenakhe yokuhlala.

₁₆Imirabhakhe ngaphasi iyomelela

neempande zakhe ngehla ziyabuna.

₁₇Ukukhunjulwa kwakhe kuyaphela ephasini,

ibizo lakhe alisaphathwa enarheni.

₁₈Ususwa ekukhanyeni, aphoselwe ebumnyameni,

aqotjhwe ephasini.

₁₉Akanabantwana namkha isizukulwana ebantwini bakwabo,

sekutlhogeka ngitjho noseleko lapha gade ahlala khona.

₂₀Bangetjingalanga bayakhena mhlana awako,

bepumalanga bangenwa kukwesaba,

₂₁bathi, ‘Unje-ke umuzi womgulukudu!

Le, bekuyindawo yomuntu ongazi uZimu!’ ”