UJOBHO 17

₁Ummoyami wephukile,

amalangami aphelile,

sengilungele ithuna.

₂Nakungasinjalo, ukukokomejwa kusisabelo sami

namehlwami ahlala atjheje ilunya labantu.

₃Zimu, beka isibambiso sami kuwe

ngombana ngubani ozangijamela na?

₄Mbala usithe imikhumbulo yabangani bami ekuzwisiseni,

ngalokho angeze ubavumele ebandleni lezulwini.

“Isaga sithi,

₅‘Othengisa ngomnganakhe kobana afumane isabelo,

amehlo wabantwabakhe azakufifiyela.’

₆Kodwana uZimu wenze mina ngaba siphoqo sabantu,

nabangibonako batsaka amathe.

₇Amehlwami sese afifiyela ngebanga lesizi,

angikondi ngimathambo.

₈Abazenza qotho bayarareka ngalokhu,

nokuthiwa bamsulwa badanile ngonganaZimu!

“Godu isaga sithi,

₉‘Olungileko unamathela endlelenakhe,

nonezandla ezihlanzekileko uyandlondlobala.’

₁₀Kodwana nina noke niqhiqha kimapha,

nokho angifunyani noyedwa onobuhlakani kini.

₁₁“Imihla yami idlulile,

amasu wami aphelile,

iye, iimfiso zehliziywami zitjhabalele.

₁₂Abangani bami bathi ubusuku yimini

lokha nakuba mnyama bathi kuyasa.

₁₃Ithemba lami linye, indawo yabafileko yindlwami!

Sengendlale umkghadami ebumnyameni!

₁₄Nakube ngibiza ithuna ngithi, ‘Baba’,

iimpethu ngizibize ngithi,

‘Mma nabodadwethu’,

₁₅likuphi-ke ithemba lami?

Ngubani ongabona ithemba lami?

₁₆Kghani lizakwehlela nami endaweni yabafileko?

Sizakwehlela kanyekanye ethulini na?”