UJOBHO 16

₂“Ngizwe izinto ezinengi ezinjalo;

nibaduduzi abambi nokanyana njalo.

₃Lesi sikhathi samezwenu amumoya na?

Nakungasinjalo, nitjhiswa yini beniphikise na?

₄Nami bengingakhuluma njengani nje,

nabegade kungini lapha ngikhonapha;

bengingabumba amezwi ngiphikisane nani,

nami ngithintithe ihloko nanginiqalako.

₅Benginganikhuthaza ngomlomami kwaphela,

induduzo yeembhena zomlomami inibangule.

₆Madoda, ukukhuluma ngobuhlungu bami, akubenzi budambe,

begodu nangithulako nakhona abusuki kimi.

₇“UZimu lo, nguye ongiqede amandla,

wakhenisa woke umkhambathami.

₈Ungenze ngaba sibonelo sehlekelele,

ukonda kwami kujamelene nami,

kufakazela amanga wabantu ngami.

₉Itukuthelo kaZimu ingirathule,

ngombana ungibambele ivunda;

wangisinela amazinywakhe,

umjamelanami wangiqala ngamehlo abukhali.

₁₀Abantu bangikhamisela imilomo,

bangiphoqa ngokungiwakala emhlathini,

bangihlalela isicathana.

₁₁UZimu unginikelele ngemigulukudu,

wangilahlela ezandleni zeenkhohlakali.

₁₂Bengizihlalele, wangiqovaqova,

wangithi bhi ngentanyana wangidabudabula.

Wangijamisa ngaba sinenjwa,

₁₃imisubelakhe yawela ngapha nangapha kwami,

yangihlaba iziso.

Ngaphandle kwesirhawu

yachithela inyongwami equlwanini.

₁₄Ungivula iintunja ngeentunja,

angithelekele njengengorho.

₁₅“Ngithungelele umgodla esikhumbeni sami,

ihlokwami izele ngomlotha.

₁₆Ubuso bami buba bumbi ngesililo

neenkopheni zami kunobumnyama obunzima tshu,

₁₇nanyana kungananturhu ezandleni zami,

nomthandazwami uhlambulukile.

₁₈Wena phasi, ungafihli iingazi zami,

isililo sami asingafumani ukuphumula.

₁₉Nanyana ngingaba njengombana nginje,

kwanga ngingaba nofakazi phakathi kweendalwa zezulu,

ozokukhuluma indabami keliphezulu,

₂₀iye, umkhulumelami, omnganami,

lokha amehlwami achiphizela uZimu ngeenyembezi.

₂₁Yena uzakuncengela obhubhako phambi koZimu,

njengomuntu nancengela umnganakhe.

₂₂Mbala, sekusele iminyakana embalwa

ngaphambi kobana ngikhambe indlela engabuyiko.