UJesu uthandazela abafundi bakhe
1Kuthe bona uJesu aqede ukukhuluma lokhu, waqala phezulu ezulwini wathi: “Baba, isikhathi sesifikile; phazimulisa iNdodanakho khona iNdodana izakukuphazimulisa. 2Uyinikele amandla phezu kwawo woke umuntu, khona izakunikela ukuphila okungapheliko kibo boke obaphe yona. 3Ukuphila okungapheliko ngilokho bona bazi wena wedwa Zimu weqiniso nokwazi uJesu Krestu, omthumileko. 4Ngikuphazimulisile ephasini ngokuqeda umsebenzi onginikele wona bona ngiwenze. 5Kwanjesi Baba, ngiphazimulise phambi kwakho ngephazimulo egade nginayo kuwe iphasi lingakabi ukubakhona.
6“Ngilazisile ibizo lakho kilabo ongiphe bona ephasini. Bebavele bangebakho wangipha bona; begodu balilondile ilizwi lakho. 7Nje-ke bayazi bona koke ongiphe khona kuvela kuwe. 8Ngibaphe umlayezo onginikele wona, bawamukela. Bayazi ngeqiniso bonyana ngivela kuwe, begodu bayakholwa bona ungithumile.
9“Ngiyabathandazela. Angithandazeli iphasi, kodwana labo ongiphe bona ngombana ngebakho. 10Koke enginakho ngekwakho nokwakho koke ngekwami. Nje-ke iphazimulwami ibonakaliswe ngabo. 11Kwanjesi angisesekho ephasini, kodwana bona basesephasini mina sengiza kuwe. Ngalokho Baba oCwengileko, balonde ebizweni lakho, iye, ibizo owangipha lona, khona bazakuba munye njengami nawe. 12Lokha nangisesenabo ngibavikele bengabalonda ngebizo lakho owangipha lona. Akakho noyedwa wabo owalahlekako ngaphandle kwaloyo ebekufanele bona alahleke, khona kuzakuzaliseka imitlolo.
13“Kwanjesi sengisiza kuwe, kodwana ngikhuluma lokhu ngisesephasinapha khona bazakuba nethabo lami elipheleleko ngaphakathi kwabo. 14Ngibanikele ilizwi lakho, iphasi labahloya ngombana abasese ngebephasi njengombana nami ngingasi ngewephasi. 15Angikubawi bona ubasuse ephasinapha, kodwana bona ubavikele komumbi. 16Abasingebephasi njengombana nami ngingasingewephasi. 17Bacwengise ngeqiniso; ilizwi lakho liliqiniso. 18Njengombana ungithumele ephasini, nami ngibathumela ephasini. 19Ngebanga labo ngiyazicwengisa, khona nabo bazakucwengiswa ngeqiniso.
20“Angithandazeli bona kwaphela, kodwana ngithandazela nalabo abazakukholwa kimi ngebanga lomlayezwabo, 21kobana boke njalo babe munye njengombana nawe Baba ukimi nami ngikuwe. Kwanga nabo bangaba kithi khona iphasi lizakukholwa bona ungithumile. 22Ngibaphe iphazimulo owanginikela yona khona bazakuba munye njengombana simunye: 23Mina ngikibo, wena ukimi. Nje-ke bazakuba munye ngokupheleleko ukuze iphasi lazi bona ungithumile begodu ubathandile njengombana ungithandile mina.
24“Baba, bengithanda bonyana labo ongiphe bona babe nami lapha ngikhona, khona bazakubona iphazimulwami. Iye, iphazimulo ongiphe yona ngombana wangithanda iphasi lingakabi ukubakhona. 25Baba olungileko, iphasi akhange likwazi kodwana mina ngikwazile begodu laba bayazi bona ungithumile. 26Ibizo lakho ngilazisile kibo, ngizasolo ngiraga ngokwenza njalo ukuze ithando onalo kimi libe nakibo nokobana nami ngibe kibo.”
