UJWANISI 15

₁“Mina ngisidiribe samambala, uBaba mlimi. ₂Ususa kimi yoke ipande engatheliko, kuthi leyo naleyo ipande ethelako ayihlunge khona izakuthela khulu. ₃Senihlambulukile ngelizwi engilikhulume kini. ₄Hlalani kimi, nami ngizakuhlala kini. Njengombana ipande angekhe yathela ngokwayo kwaphela nayihlezi esidiribeni sayo. Kunjalo-ke nani angekhe nathela naningakahlali kimi.

₅“Mina ngisidiribe, nina niziimpande. Ohlala kimi, nami ngihlala kuye, loyo-ke uzakuthela khulu ngombana ngaphandle kwami angekhe nenze ilitho. ₆Loyo ongahlali kimi uzakulahlwa njengepande, ome; iimpande ezinjalo ziyabuthelelwa ziphoswe ngemlilweni, zitjhiswe. ₇Nanihlala kimi namezwami ahlala kini, nizakubawa nanyana yini enikufunako, nizakwenzelwa. ₈UBaba uphazimuliswa kuthela kwenu iinthelo ezinengi, khona nizakuba bafundi bami. ₉Nginithande njengombana uBaba angithandile; nje-ke hlalani ethandweni lami. ₁₀Nanilonda imiyalwami, nizakuhlala ethandweni lami njengombana nami ngilonde imiyalo kaBaba ngahlala ethandweni lakhe.

₁₁“Nginitjele lokhu ukuze ukuthaba kwami kube kini nokobana ukuthaba kwenu kuphelele. ₁₂Umyalwami ngilo: Thandanani njengombana nami nginithandile. ₁₃Ithando elikhulu umuntu angaba nalo kudela ipilwakhe ngebanga labangani bakhe. ₁₄Niziinini zami nanenza lokho enginiyala ngakho. ₁₅Anginibizi godu bona niziinceku ngombana inceku ayazi bona ikosayo yenzani. Nina nginibiza bona nibangani ngombana nginazise koke engikuzwe kuBaba. ₁₆Azange ningikhethe nina, kodwana mina ngikhethe nina. Nganikhetha bona niyokuthela iinthelo nokobana iinthelwezo zihlale ukuze nanyana yini eniyibawa ngebizo lami uBaba aninikele yona. ₁₇Nginiyala ngezintwezi kobana nithandane.”

₁₈“Nangabe iphasi liyanihloya, yazini bona lihloye mina qangi. ₁₉Nangabe beningebephasi, iphasi belizanithanda njengabalo. Kodwana nginikhethe kilo iphasi, anisingebalo; ngikho iphaseli linihloyile nje. ₂₀Khumbulani ilizwi engilikhulume kini nangithi, ‘Ayikho inceku ekulu kunekosayo.’ Nakube mina bangizumile, nani bazonizuma. Nangabe balonde ilizwi lami nelenu bazalilonda. ₂₁Kodwana bazakwenza zoke izintwezi kini ngombana ningebami nangebanga lokobana bangakhange bamazi ongithumileko. ₂₂Ngathana azange ngize ngikhulume nabo, ngabe banganaso isono; kodwana manje abasenayo incancabe ngesono sabo. ₂₃Ohloye mina uhloye noBaba godu. ₂₄Ingathana azange ngenze hlangana nabo iimangaliso ezingazange zenziwe mumuntu omunye, bebangekhe babe nomlandu wesono. Kodwana gadesi sebabonile engikwenzileko, bangihloyile mina noBaba. ₂₅Lokhu kuzaliseka ilizwi elitlolwe emthethwenabo othi, ‘Bangihloye kunganasizathu.’

₂₆“Lokha nasele afikile uMsizi, engizamthumela abuya kuBaba, uMoya weqiniso ovela kuBaba, uzokufakaza ngami. ₂₇Nani godu nizakufakaza ngombana gade ninami kusukela ekuthomeni.”