UJAKOPO 3

₁Bazalwana, ningabi bafundisi abanengi ngombana niyazi bonyana thina esifundisako sizokugwetjwa khulu. ₂Soke sineemphoso ezinengi; nangabe umuntu akaphosisi kilokho akutjhoko kutjho bona uphelele, uyakwazi ukubamba umzimba woke ngetomu. ₃Nasifaka amatomu emilonyeni yeenjomani bona zisilalele, sikghona ukunqophisa yoke imizimba yazo. ₄Akhese niqale nemikhumbi, nanyana imikhulu kangangani beyiragwe mimoya enamandla, nokho inqotjhiswa ngephinyana, inqombe lapha umtjhayeli afuna iye khona. ₅Linjalo-ke nelimu, lisisitho esincani kodwana lizigabazisa ngezinto ezikulu. Akhese niqale, umlilo omncani uthungela ihlathi elikhulu. ₆Ilimu nalo limlilo, liliphasi lokonakala ezithweni zomzimba wethu, lisilaphaza umzimba woke, lithungela yoke ipilo khisibe lona lithungelwa sirhogo. ₇Yoke imihlobo yeenlwana, yeenyoni, yeenrhurhubi neendalwa zelwandle iyathanjiswa, iye, ithanjiswa babantu, ₈kodwana akakho umuntu okwazi ukuthambisa ilimu; libubumbi obuyaluzako, lizele isihlungu esibulalako. ₉Ngalo sidumisa uSomnini uBaba, kuthi ngalo godu sinikelele abantu abenziwe ngomfanekiso kaZimu. ₁₀Emlonyeni owodwa kuphuma ukudumisa nokunikelela. Bazalwana, akukafaneli bona kube njalo. ₁₁Kungenzeka bona emthonjeni owodwa kuphume amanzi amnandi nababako na? ₁₂Bazalwana bami, kghani umuthi wamakhiwani uyathela iinthelo zama-oliva namkha isidiribe sithele amakhiwani na? Angeze kwenzeka bona umthombo onetswayi uveze amanzi amnandi.

₁₃Ngubani ohlakaniphileko nolemukako hlangana nani na? Ngepilo ehle akatjengise imisebenzakhe ngokuzithoba okunokuhlakanipha. ₁₄Kodwana naninomona obabako, nobumarhamaru eenhliziyweni zenu, musani ukuzikhakhazisa ngalokho, ningabi nobuqili eqinisweni. ₁₅Ukuhlakanipha okunjalo akuveli ezulwini kodwana kungokwephasi, kunobusathana ₁₆ngombana lapha kunomona nomrhobholo khona, kuzokuba khona ihlangahlangano nazo zoke izenzo zobukhohlakali. ₁₇Kodwana ubuhlakani obuvela ezulwini, kokuthoma nje bumsulwa, bunokuthula, bunobumnene, buthobekile, bunobubele neenthelo ezihle, abunakuzaza nokuzenzisa. ₁₈Isivuno sokulunga sitjalwa ngokuthula ngilabo abenza ukuthula.