U-ISAYA 60

₁“Vuka ukhanye wena Jerusalema

ngombana ukukhanya kwakho kuyeza;

iphazimulo kaSomnini idarhile phezu kwakho.

₂Qala, ubumnyama busibekela iphasi

nobumnyama obumabhombo buphezu kwabantu;

kodwana uSomnini wenyukela phezu kwakho

nephazimulwakhe ibonakala phezu kwakho.

₃Izizwe zizakuza ekukhanyeni kwakho

namakhosi ekudarheni kwephazimulwakho.

₄“Phakamisa amehlwakho uqale mazombe:

Boke bayabuthana, beze kuwe;

amadodanakho avela khatjhana

namadodakazakho agonwe ngemikhono.

₅Nje-ke uzakuqala, uphazimule;

ihliziywakho izakweqayeqa, iphuphume ngethabo

ngombana ukuphuphuma kwelwandle kuzakulethwa kuwe,

iye, umnono wezizwe uze kuwe.

₆Umhlambi wamakamela uzakumumela,

amakamedlana weMidiyani ne-Efa.

Boke abantu beTjheba bazakuza,

bathwele igolide netjhwalo,

bamemezele iindumiso zakaSomnini.

₇Yoke imihlambi kaKedari izakubuthelwa kuwe,

amaqama weNebayothi azakuba sesandleni sakho,

amukeleke njengomhlabelo e-aldarini lami,

yeke ngizakuhlobisa ithempeli lami elibabazekako.

₈“Bobani laba abaphapha phezulu njengelifu

nanjengamazuba eendlwaneni zawo na?

₉Ngambala, iinhlengele ziqalelele kimi.

Imikhumbi yokurhweba ingeyokuthoma

ukuletha amadodanakho avela khatjhana,

aphethe isiliva negolide lawo,

ukuhlonipha ibizo lakaSomnini uZimakho

ongoCwengileko ka-Israyeli

ngombana ukudumisile.

₁₀“Imiqhamuka izakuvuselela imithangalakho,

amakhosayo akusebenzele.

Ngikumadlhe ngetukuthelo,

kodwana ngomusa ngizakukhombisa izwelo.

₁₁Amasangwakho azakuhlala avulekile,

angeze avalwa imini nobusuku

ukuze izizwe zikulethele umnonwazo,

amakhosazo aragwe ngomlandelande wokuhlulwa.

₁₂Mbala, isizwe namkha umbuso

ongeze wakulotjha, uzakubhubha;

iye, izizwezi zizakupheliswa nya.

₁₃“Iphazimulo yeLibhanoni izakuza kuwe,

imithi ye-elimu nemihlobohlobo yemisayipurusi ndawonye,

kobana ngihlobise indawo yekumbami ecwengileko,

ngibabaze indawo yeenyawo zami.

₁₄Isizukulwana sabakugandelelako

sizakuza kuwe sikhokhoba,

boke abakunyazako bazaguqa eenyaweni zakho,

bakubize bona uyiZiyoni idorobho lakaSomnini,

ongoCwengileko ka-Israyeli.

₁₅“Nanyana bewutjhiyiwe begodu uzondiwe,

kungekho okhambela ngakuwe,

ngizakwenza igugu lesiphelani,

iye, itokozo iinzukulwana ngeenzukulwana.

₁₆Uzakumunya ibisi lezizwe,

iye, ebeleni lobukhosi.

Yeke uzakwazi bonyana mina,

nginguSomnini, ngiMsindisakho,

noMhlengakho ongonamandla kaJakopo.

₁₇Esikhundleni sekoporo ngizakulethela igolide,

esikhundleni sesimbi isiliva.

Esikhundleni sesigodo ngizakulethela ikoporo,

esikhundleni samatje isimbi.

Ngizakwenza ukuthula kube mlindakho

nokulunga kube baphathi bakho.

₁₈Godu akusazukuzwakala inturhu enarhenakho,

iye, ukonakala nokubhubhisa

ngaphakathi kwemikhawulwakho.

Uzakubiza imithangalakho ngokuthi yisindiso,

namasangwakho ngokuthi yindumiso.

₁₉Godu ilanga alisazukuba mkhanywakho emini

nokudarha kwenyezi akusazukukhanya kuwe.

USomnini uzakuba mkhanyo wesiphelani kuwe,

iye, uZimakho uzakuba yiphazimulwakho.

₂₀Godu ilanga lakho alisazukutjhinga

nenyezakho ayisazukuncipha.

USomnini uzakuba mkhanyo wesiphelani kuwe

namalangakho wesililo azakuphela.

₂₁Boke abantu bakho bazakuba ngabalungileko,

bazakuzuza inarha isiphelani.

Bona baligatja engilitjalileko,

umsebenzi wezandla zami

ukubonakalisa idumo lami.

₂₂Ophasi ngesibalo uzakuba yikoro

nomncani abe sisizwe esinamandla.

NginguSomnini.

Nje-ke, ngesikhathi esifaneleko

ngizakwenza msinyana lokhu.”