U-ISAYA 51

₁Ngilalelani nina enilandela ukulunga,

iye, nina enifuna uSomnini:

Rhuluphelani idwala enakghephulwa kilo

nekwari enakhutjhwa kilo;

₂iye, rhuluphelani uyihlo u-Abrahama,

nonyoko uSara owanibelethako:

Bekamunye lokha nangimbizako

kobana ngimbusise bengimandise.

₃Ngambala, uSomnini uzakuba nesirhawu ngeZiyoni

nangawo woke amarubhayo:

Uzakwenza amarhalawumbayo afane ne-Edeni,

amabhudwayo abe njengesivande sakaSomnini.

Ithabo nenjabulo kuzakubuzwa kiyo,

kube nokuthokoza nokubhina.

“Ngilalelani bantu bami,

yeningizwe nina sizwe sami:

Kimi kuzokuphuma ifundiso

ngibeke isigwebo sami

sibe mkhanyo ezizweni.

₅Kuseduze ukufika kwehlalohle yami,

isindiswami isendleleni

nengalwami izakugweba izizwe.

Iinhlengele ziqalelela kimi,

zilindele ingalwami ngethemba.

₆Phakamiselani amehlwenu emazulwini,

nirhuluphele iphasi phasi:

Amazulu anganyelela njengentuthu,

iphasi libhabhuke njengesambatho

ngokufanako nabahlali balo bangafa,

kodwana isindiswami izakujama isiphelani,

ihlalohle yami angeze yabhujiswa.

₇“Ngilalelani nina enaziko

bonyana yini okulungileko,

nina bantu eninefundiswami

eenhliziyweni zenu:

Ningesabi isithuko sababhubhako

ningapheli amandla ngokuninyaza kwabo,

₈ngombana umvunya uzobathuthudlha njengesambatho,

itshwele ibaqothule njengoboya.

Kodwana ihlalohle yami izakujama isiphelani

nesindiswami ibe khona

iinzukulwana ngeenzukulwana.”

₉Vuka, vuka!

Zembathise amandla, wena ngalo kaSomnini!

Vuka njengemalangeni wakade,

iye, njengeenzukulwaneni zekadeni.

Kanti akusuwe wena ngalo kaSomnini

owarhabelela uRahabu,

wahlaba unomrhasokazi loyo na?

₁₀Kwakungasuwe owomisa ilwandle,

iye, amanzi amanengi azikileko,

owenza indlela ekuzikeni kwelwandle

kobana abahlawulelweko bakwazi ukweyama na?

₁₁Kwanga abahlengiweko bakaSomnini bangabuya

bafike eZiyoni ngokuhlokoma,

bathwele ithabo elingapheliko:

Bazuze ithabo nenjabulo,

isizi nokububula kubaleke.

“Mina lo, ngimi oniduduzako.

Alo, wena Ziyoni

umesabani umuntu obhubhako,

iye, umuntu nje ophela njengotjani na?

₁₃Sewukhohlwe uSomnini owakubumbako,

owaqhisa amazulu wabeka neensekelo zephasi na?

Kubayini uhlala wesaba imihla ngemihla

ngebanga lobukhali bomgandeleli

lokha nanqopha ukurhayila na?

Buphi ubukhali bomgandeleli na?

₁₄Iimbotjhwa zizakuthukululwa msinyana,

angeze zafela ngesikhungweni,

godu angeze zalamba.

₁₅Mina Somnini nginguZimakho

ophehla ilwandle

kobana amagagasalo abhodle,

obizwa ngoSomnini uMninimandlawoke.

₁₆Ngikufunza amezwami

ngikugubuzese ngesithunzi sesandla sami,

iye, mina owanzinzisa amazulu,

ngabeka neensekelo zephasi

begodu nothi eZiyoni, ‘Nibabantu bami.’ ”

₁₇Phaphama, phaphama, wena Jerusalema!

Sikima, wena osele ikapho yobukhali bakaSomnini

esandleni sakhe,

wena ominyelela nehlama yesiqoko

esitherezelisa abantu.

₁₈Akakho noyedwa orhola iJerusalema

phakathi kwabo boke abantwana ebabelethileko.

Akakho noyedwa oyidosa ngesandla

phakathi kwabo boke abantwana ebakhulisileko.

₁₉Wehlelwa matlhuwo abuyelelweko.

Ngubani ozakuzwela ubuhlungu na?

Wabhujiswa, wagirizwa,

abahlali bakho babulawa yindlala,

barhayilwa yisabula.

Ngubani ozakududuza na?

₂₀Abantabakho batsirimezeka,

barabhalala emajikeni wazo zoke iindledlana,

kwanga yinyamazana ebanjwe enedeni,

bagubuzeswa bukhali bakaSomnini

nokukhalima kwakaZimakho.

₂₁Ngalokho yizwani lokhu,

nina enithotjiswe benadakwa,

kodwana kungasi ngewayini.

₂₂Nakhu okutjhiwo nguSomnini

uSomandla onguZimakho

olwela abantu bakhe, uthi:

“Qala, ngithethe ikapho enitherezelisako

esandleni sakho, Jerusalema.

Angeze bewusasela isiqoko sobukhali bami.

₂₃Nje-ke ngibeke esandleni sabakuhlunguphazako

abathi kuwe, ‘Bhambalala

ukuze siqaqade phezu kwakho.’

Wenza umhlanakho inga yihlabathi,

iye, waba yindledlana yabadlulako.”