U-ISAYA 41

₁UZimu uthi:

“Lalelani buthula,

nina nhlengele nezizwe!

Abosingazimu abavuselele amandlabo!

Abavele etjhatjhalazini bakhulume.

Asihlanganeni ekugwebeni:

₂Ngubani ovuse omunye epumalanga

ukuze aphumelele

noma kuphi lapha ayakhona na?

Ngubani owethula izizwe kuye

avume bona athobise amakhosi na?

Isabulakhe izibhuquze zibe lithuli

umsebakhe uzihlakaze njengamawunguwungu.

₃Uzigijimisa begodu aragele phambili kunganasithiyo

iinyawo zakhe zijubalale.

₄Ngubani owenze nobangele lokhu

nolawule iinzukulwana kusuka ekuthomeni na?

Ngimi, mina Somnini osithomo

nekupheleni ngikhona.

₅Iinhlengele zikubonile lokho zesaba

nepelazwe yathuthumela.

Zaphumela etjhatjhalazini, zahlangana;

₆omunye asekela omunye

ngokuthi, ‘Qina amandla!’

₇Usosino ugqugquzela umkhandigolide,

loyo oliqandula ngenondo

ugqugquzela osebenza ngenonjwana athi,

‘Maye, sihle isipaparu segolide osihlanganisako!’

Nje-ke, bakokodele ngeenkhonkhwani isithombesibazwa

ukuze singaketuki!

₈“Kodwana wena Israyeli, ncekwami,

wena Jakopo, engikukhethileko,

sizukulwana somnganami u-Abrahamu,

₉ngakugugudlhela usemikhawulweni yephasi,

ngakubiza usemajukujukwini.

Ngathi kuwe, ‘Uyincekwami,

ngikukhethile, akhange ngikulahle.’

₁₀Nje-ke ungesabi ngombana nginawe,

ungethuki ngombana nginguZimakho.

Ngiyakuqinisa bengiyakusiza,

ngikugugudlhele ngesidla sami sokuphumelela.

₁₁Qala-ke, boke abakubhavumulelako

bazakudana bebarhubutjheke;

labo abakusozisako

bazakuba lilize, babhubhe.

₁₂Uzakufunana nabajamelani bakho,

kodwana angeze ubafumane;

iye, labo abalwisana nawe

bazakuba lilize lakolize

₁₃ngombana nginguSomnini, uZimakho,

oqinisa isandla sakho sokudla,

othi kuwe, ‘Ungesabi,

mina ngokwami ngiyakusiza.’

₁₄Ungesabi, wena pethu, Jakopo,

wena Israyeli olidlanzana,

ngimi ngokwami okusizako.

Utjho njalo uSomnini, umhlengakho

ongoCwengileko wakwa-Israyeli.

₁₅Qala, ngizakwenza ube sileyi sokubhula esibukhali,

esitjha nesinamazinyo amanengi.

Uzakubhula iintaba, uzitshidlhe,

wenze imibundu ibe ngathi mawunguwungu.

₁₆Uzakwela izitha, ummoya uziphephethe,

isiwuruwuru sizihlakaze.

Kodwana wena uzakuhlokoma kuSomnini

bewuzikhakhazise ngoCwengileko wakwa-Israyeli.

₁₇“Abachakileko nabadududu bazumana namanzi,

kodwana kudududu;

amalimabo athe kere ngokoma.

Mina Somnini ngizabaphendula,

iye, uZimu wakwa-Israyeli angeze abalahla.

₁₈Ngizakwenza imilambo igeleze

emibunjwaneni enganalitho

neeyalu emirhuleni.

Ngizakuguqula irhalawumba libe sitete

negagadu lehlabathi libe mithombo.

₁₉Ngizakumilisa erhalawumbeni imisedari,

imithi yomunga, yemiritlili neye-oliva;

ngimilise ebhudwini imithi ye-elimu

nemihlobohlobo yemisayipurusi ndawonye

₂₀ukuze abantu boke babone, bazi

bebacabangisise begodu balemuke

bona sisandla sakaSomnini esenze lokhu;

iye, oCwengileko ka-Israyeli ukudalile lokho.”

₂₁USomnini uthi: “Lethani indabenu!”

Iye, iKosi kaJakopo ithi:

“Bekani iinqiniseko zenu!

₂₂Abosingazimu benu abalethwe etjhatjhalazini

khebazosibikela bona kuzokwenzakalani.

Nina bosingazimu, izinto zekadeni beziyini?

Zibikeni ukuze zicatjangisiswe,

kwaziwe umphumela wazo.

Namkha akhe sizwe ngezinto ezizako!

₂₃Yenisibikele bonyana ikusasa linjani

ukuze sikghone ukutjho bona mbala nibozimu.

Akube nesiga enisenzako

ukuze sethuke, sesabe soke.

₂₄Ngambala, anisililitho kokuba lilitho

begodu nemisebenzenu ililize lakolize!

Umuntu onikhethako usikghabhudlho!

₂₅“Ngivuse omunye ngetlhagwini,

nje-ke uyeza

ngepumalanga ubizwa ngebizo lakhe

nje-ke usendleleni.

Uzakugadanga phezu kweenkhulu inga zilidaka

iye, njengombumbi nabhica umdaka.

₂₆Nina bosingazimu,

ngubani wenu owabika ngalokho ekuthomeni

ukuze sazi;

iye, kusukela phambilini bona singathi,

‘Ngambala, uqinisile’ na?

Awa, akunanoyedwa wenu owabikako,

azange kubekhona nonomkhosi ngalokho,

azange bekube nomuntu ozwa amezwenu.

₂₇Ngubani owaba ngewokuthoma ukubikela iZiyoni

wathi, ‘Qalani, napaya bayeza’ na?

Ngubani owabikela iJerusalema

wathi, ‘Ngikwenza isithunywa seendaba ezihle’ na?

₂₈Ngaqala ngapha nangapha

kodwana azange kube noyedwa ophendulako!

Phakathi kwabosingazimu khona-ke?

Awa, azange babe ngitjho nomeluleki

ebe ngingambuza

kobana ngaye ngifunyane igama kibo.

₂₉Mbala, boke bayikohliso!

Izenzo zabo zililize lakolize,

imifanekiswabo imumoya nelize.”