Ukugula nokuphola kwakaHezekhiya
1Emihleni leyo uHezekhiya wagula wabangwa neenzibi. Umphorofidi u-Isaya umsa ka-Amotsi waya kuye wafese wathi: “Nakhu okutjhiwo nguSomnini, ‘Lungisa iindaba zomzakho ngombana uzokufa, awukazukuphola.’ ” 2UHezekhiya waphendulela ubuso bakhe ebodeni wathandaza kuSomnini 3wathi: “Awu Somnini, akhese ukhumbule bona ngakhamba phambi kwakho ngokuthembeka nangehliziyo epheleleko, ngenza okulungileko ebusweni bakho.” UHezekhiya walila kabuhlungu! 4Nje-ke ilizwi lakaSomnini lafika ku-Isaya lathi: 5“Khamba ufese utjele uHezekhiya bona uSomnini uZimu kayihlo uDavida uthi, ‘Ngiwuzwile umthandazwakho, ngabona neenyembezi zakho. Nje-ke ngizakwengeza ipilwakho ngeminyaka elitjhumi nahlanu. 6Wena nedorobheli ngizonisindisa esandleni sekosi ye-Asiriya, iye, ngivikele idorobheli.
7“ ‘Leli-ke litshwayo kuwe lokobana uSomnini uzakwenza akuthembisileko: 8Qala, ngizakwenza bonyana umthunzi welanga ubuyele emuva ngamagadango alitjhumi ukuya phasi emqaqadweni ka-Arhazi.’ ” Nje-ke umthunzi welanga wabuyela emuva amagadango alitjhumi ebesele uwehlile.
9Nakhu okwatlolwa nguHezekhiya, ikosi yakwaJuda, ngemva kokupholiswa kwakhe ekuguleni:
10Mina ngadlumbana ngathi:
“Phakathi kwamalangami wokuphila
bekumele ngikhambe,
iye, ngibizelwe ukuba semasangweni wendawo yabafileko
iminyakami yoke.”
11Ngathi: “Angeze bengisabona uSomnini,
iye, uSomnini enarheni yabaphilako;
angeze bengisaqala umuntu wenyama,
lokha nangiselizweni labangasekho.”
12Njengetende lomelusi,
iinkhonkhwani zekhaya lami zitsonyuliwe,
iye, itende lepilwami lilungele ukususwa kimi.
Kumele ngisonge ipilwami
njengomluki nakasonga umseme
ngombana uSomnini bekangisusa ebulukelweni.
Ubusuku nemini wena Somnini bewungiqedelela.
13Kwathi ngisalele lapho bekwasa,
waphohloza woke amathambami njengebhubezi;
iye, ubusuku nemini bewungiqedelela.
14Ngalila njengekonjani,
ngabubula njengezuba.
Ngafiphaza amehlwami ngiqale emazulwini.
Ngisesizini Somandla, yewungenyele!
15Ngingathini nje?
USomnini ukhulume nami
begodu nguye owenze akuthembisileko.
Ngingaphila ipilwami yoke,
ngikhohlwe ubumunyu bomphefumulwami.
16Somandla, abantu baphila
ngeenthembiso zakho.
Nami ngizakuphila iminyakami yoke
ngombana wena ungipholisile, wangiphilisa.
17Ngambala, kube nembuyiselo
ukobana ngizwe ubuhlungu obungakaya.
Ungigcine ethandweni lakho,
wangiphephisa emgodini wokubola
lokha nawufulathela zoke izono zami.
18Indawo yabafileko angeze yakuthokoza,
ukufa angeze kwakudumisa.
Labo abehlela emgodini,
angeze basathembela ekwethembekeni kwakho.
19Ophilako, iye, ophilako nguye okudumisako
njengombana ngenza namhlanjesi.
Ubaba wazisa abantwabakhe
ngokwethembeka kwakho:
20“USomnini ube lisizo lami,
nje-ke asivumeni ngeenliliso zami zeenara
yoke imihla yokuphila kwethu,
ethempelini lakaSomnini.”
21U-Isaya wayala bona kubekwe amakwapa wamakhiwani phezu kwethumba bese uyaphola.
22Godu uHezekhiya wabuza wathi: “Sizakubayini isibonakaliso kobana ngizakukhuphukela ethempelini lakaSomnini na?”
