U-ISAYA 35

₁Irhalawumba nenarha eyomileko kuzakuthaba,

ibhudu lihlokome, liqhakaze.

Njengamakhwa weTjharoni

₂lizakuthuthumba khulu,

lihlokome ngethabo nangokuvuma.

Lizakunikelwa idumo leLibhanoni,

ubukhosi beKarameli neTjharoni.

Abathunjwa bazakubona idumo lakaSomnini

nobukhosi bakaZimethu.

₃Khuthazani izandla ezibuthakathaka,

niqinise amadolo abogabogako.

₄Yithini kabaneenhliziyo ezizazako:

“Qinani, ningesabi!

Nangu uZimenu;

uzakuza ngokubuyiselela,

iye, ngomvuzo waloyo osabekako.

Yena uzakuza anisindise.”

₅Ngesikhatheso amehlo weemphofu azakubona

neendlebe zeenthulu zivuleke,

₆abarholopheleko bazatjakadula njengehlangumataka

nelimu leemumu lililizele.

Mbala, amanzi azakuthumbuka erhalawumbeni

nemilanjana ebhudwini.

₇Iqulwani etjhisako izakuba sitete

negagadu libe ziiyalo.

Edzabeni labophagana

okuyindawabo yokuphumula,

utjani buzakuba mgaba nekhakha.

₈Kuzakuba nendlela evulekileko,

izakubizwa bona yindlela ecwengileko,

abasilapheleko angeze bakhambe lapho,

kodwana izakuba ngeyabantu bakaZimu,

isikhambi angeze sadurha kiyo,

ngitjho nabanganalemuko.

₉Akunabhubezi elizaba khona lapho

namkha kuvele kiyo isibandana esidabulako,

angeze zafunyaneka lapho,

kodwana abahlengiweko bazakhamba lapho.

₁₀Iye, abahlengiweko bakaSomnini bazakubuya,

beze eZiyoni ngokujekezela,

ithabo elingapheliko lizakuba sihlohlo sabo;

bazakuzuza ithabo nokwenama,

isizi nokububula kubaleke.