U-ISAYA 33

₁Uzazizwa wena mrhayili!

Uzazizwa wena mkhohlisi!

Azange khewurhayilwe,

azange khewukhohliswe,

kodwana nasele uqedile ukurhayila,

nawe uzakurhayilwa,

nasele ulisile ukukhohlisa,

nawe uzakukhohliswa.

₂Maye Somnini!

Yiba nomusa kithi,

siqalelele kuwe nasinje.

Yiba mamandlethu njalo ekuseni

nesindiswethu eenkhathini zesizi.

₃Izizwe zizakubaleka

lokha nakuzwakala umdumo wakho

nabantu bahlakazeke phambi kobukhosi bakho.

₄Okuhlangulweko kuzakubuthelelwa

njengokuqothula kwesikhonyani;

njengokubhibha kwewoma lentethe

abantu bawalazele ipango.

₅USomnini uphakeme, iye, uhlala ekuphakameni,

uzakuzalisa iZiyoni ngobulungiswa nangokulunga.

₆Kuzakuba nokunzinza ngeenkhathi zenu,

bantu beJerusalema:

Ukuhlakanipha nelwazi kuzakuba yisika yesizo;

ukwesaba uSomnini kuligugu leZiyoni.

₇Qala, abantu be-Ariyeli basarhuwelela eendledlaneni,

iinthunywa zokuthula zisabibitheka.

₈Iindlela zitjhiyiwe,

abakhambi abasekho kizo.

Umkhohlisi wephule isivumelwano,

wanyaza abofakazi besivumelwano

azange abe nendaba nobhubhako.

₉Inarha iyalila begodu iyabundana;

iLibhanoni iphela amandla begodu iyabuna,

iTjharoni sese ifana nerhalawumba,

iBhatjhani neKarameli ziwohloka amakari.

₁₀USomnini uthi: “Nje-ke khona ngizakusikima,

iye, ngizakuphakama,

manje ngizokuphakanyiswa.

₁₁Nina barhayili nimitha utjani obomileko,

nizakubeletha amawunguwungu;

umphefumulwenu umlilo ozoniqothula.

₁₂Amathambo wezizwe

azakutjha abe kwanga yipembe,

iye, njengameva agawuliweko abe atjhiswa.

₁₃“Yizwani ngengikwenzileko, nina enikhatjhana;

nani eniseduze, vumani amandlami.

₁₄Izoni eziseZiyoni ziphila ngevalo

ukuthuthumela kwembethe abanganaZimu

bathi, ‘Ngubani phakathi kwethu

ongaphila ngomlilo oqothulako?

Ngubani phakathi kwethu,

ongaphila ngamalangabu weziko lanini nanini?’ ”

₁₅Loyo okhamba ngokulunga,

akhulume okunetlha,

oqalela phasi inzuzo yezenzo zokugandelela,

othintitha izandla zakhe

angamukeli ukufunjathiswa,

ovala iindlebe zakhe

kobana angezwa ngokuthuluka kweengazi,

namehlwakhe kobana angaboni ubumbi,

₁₆yena uzakuhlala ekuphakameni,

ubuphephelo bakhe buzakuba lidwala elingafikelelekiko,

ukugoma kwakhe kuhlala kukhona

namanzakhe aqinisekisiwe.

₁₇Amehlwakho azakubona iKosi ebuphaziphazini bayo;

aqale inarha enabele kude.

₁₈Umkhumbulwakho uzakudlumbana ngezehlo ezethusako:

isikhulu esigcina imininingwana yomthelo,

umuntu olinganise isibiko

nobala iinthala esidiribeni.

₁₉Angeze usababona abantu abanelunya,

abantu abanekulumo etjharageneko ongeze wayizwa,

bakwitiza ngelimi elingazwakaliko.

₂₀Qala iZiyoni, idorobho leminyanyethu!

Amehlwakho akaqale iJerusalema,

indawo ethulileko!

Iye, itende elinzinzileko,

elineenkhonkhwani ezingasoze zatsonyulwa

nelineentambo ezingasoze zadatjulwa.

₂₁Ngambala, lapho uSomnini uzakuba ngakithi

ngobukhosi bakhe.

Kuzakuba yindawo enemilambo,

lapha imilanjana inabela khona

ngemahlangothini woke.

Lapho akuzukuthaya iinthayamanzi zamaphini

begodu akuzokudlula imikhumbi enobukhosi.

₂₂Mbala, Somnini umugwebethu;

uSomnini umubusethu;

uSomnini uyikosethu;

yena uzasisindisa.

₂₃Iintambo zakho zinyefile

wena mkhumbi wezitha,

azikghoni ukuqinisa isika

namkha zithabulule iseyila.

Nje-ke ipango enengi izakwahlukaniswa,

ngitjho nabahluzako bazakuphanga iinhlangulo.

₂₄Akunamhlali weJerusalema ozakuthi:

“Ngiyagula.”

Abantu abahlala lapho,

bazakuthethelelwa icala labo.