U-ISAYA 24

₁USomnini sele azakugiriza iphasi,

alenze libe lirubhi,

asonge ilingaphezulu lalo,

ahlakaze nabahlali balo.

₂Kuzose kufane:

Okwenzeka ebantwini, kuzakwenzeka nebaphristini

okwenzeka kumakhoboka, kwenzeke nakubanini bawo;

okwenzeka encekukazini, kwenzeke nakumphathikazayo;

okwenzeka kumthengi, kwenzeke nakumthengisi;

okwenzeka kumbolekisi, kwenzeke nakumboleki;

okwenzeka kumatjhonisa, kwenzeke nakobolekako.

₃Iphasi lizakwenziwa irubhi,

liphangwe ngokupheleleko.

Mbala, uSomnini ukhulume amezwi la.

₄Inarha iyoma beyisasambe,

iphasi liyabundana belisasambe,

isibhakabhaka sibundana

ndawonye nephasi.

₅Iphasi lisilaphazwe bahlali balo

ngombana beqe imithetho,

bangalalela iimiso,

bephula isivumelwano sanini nanini.

₆Ngalokho amanikelela aginya iphasi,

abahlali balo bahlunguphazeka ngomlandwabo,

yeke abahlali bephasi bayaphunguka ngesibalo

sekusele ibinzana lababhubhako.

₇Iwayini liyoma,

isidiribe siyatjhwaba,

boke abazithokozisako bayabubula.

₈Ukuthakasa kwabosotjherere kuthulisiwe,

ukuhlokoma kwabayaluzelako kuphelile,

ukuthakasa kweharibhana kuthulisiwe.

₉Abasaseli iwayini ngokubhina ingoma;

amarhugu ayababa kilabo abawaselako.

₁₀Idorobho elitjhiyiweko liyabhuruka,

zoke iinkumba zivaliwe,

ukuze kungabi nomuntu ongenako.

₁₁Eendledlaneni kulilwa ngewayini,

ithabo loke linyelele,

ukuthakasa enarheni kuphelile.

₁₂Okusele ngedorobheni kuliququ,

amasango aphohloziwe.

₁₃Kodwana ekabeni yephasi,

iye, ngaphakathi kwezizwe kuzakuba nje:

Njengalokha nakutlhutlhurwa umuthi we-oliva

nanjengalokha nakuburujwa

ekupheleni kwesivuno samadiribe,

₁₄abantwaba bazakuphakamisa amezwi,

bahlokome ngobukhosi bakaSomnini.

Bazakwakwazela ukusuka elwandle bathi:

₁₅“Yeke, nikelani uSomnini idumo ngepumalanga,

dumisani ibizo lakaSomnini uZimu wakwa-Israyeli,

nina eningeligwini lelwandle.

₁₆Emkhawulweni wenarha sizwa iingoma ezithi,

‘Idumo koLungileko!’ ”

“Ngiphela amandla!

Ngiphela amandla! Maye mina!

Abanobukhwebetjhana benza ubukhwebetjhana,

iye, abanobukhwebetjhana benza ubukhwebetjhana!

₁₇Ukwesabeka, umgodi nesifu

kuyakwehlela, wena sakhamuzi senarha!

₁₈Nanyana ngubani obalekela

itjhada elesabekako,

uzakuwela ngemgodini

nophuma ngemgodinapho,

uzakubanjwa sisifu!

Mbala iintunja zezulu zivuliwe

neensekelo zephasi ziyadengezela.

₁₉Iphasi liyaphadlheka nokuphadlheka,

iphasi lisikinyeka kokusikinyeka,

iphasi lizanyazanyiswa kokuzanyazanyiswa.

₂₀Iphasi litherezela njengesidakwa,

liyethezela njengehlahla lomtlhatlhana

iimphambeko zalo ziyalidisibeza,

bese liyawa lingasavuki.

₂₁“Mhlokho uSomnini uzokuhlunguphaza

ibutho lezulu ezulwini

namakhosi wephasi ephasini.

₂₂Azakuhlanganiswa ndawonye

njengeembotjhwa emgodini,

avalelwe ngesikhungweni;

ngemva kwamalanga amanengi ahlunguphazwe.

₂₃Inyezi egcweleko izakudana,

ilanga libe neenhloni

ngombana uSomnini uMninimandlawoke uzakubusa,

entabeni yeZiyoni neJerusalema,

aveze iphazimulwakhe ebaphathini babantu bakhe.”