U-ISAYA 20

₁Lokho kwenzeka ngomnyaka lokha uSarigoni ikosi ye-Asiriya nayithuma indunayo yebutho e-Atjhidodi. Induna leyo yalwa ne-Atjhidodi beyayithumba. ₂Ngesikhatheso uSomnini wakhuluma ngo-Isaya umsa ka-Amotsi wathi: “Thukulula isambatho sokuzila edinini lakho bese uhlubula amapatlagwanakho.” Yeke wenza njalo, wakhamba hlubule neenyaweni angakafaki litho.

₃Nje-ke uSomnini wathi: “Incekwami u-Isaya ikhambe hlubule begodu ibhadule iminyaka emithathu njengetshwayo nesibonakaliso sokujamelana neGibhide neKutjhe. ₄Ngokunjalo-ke amaGibhide namaKutjhe, abadala nabancani, bazakurholwa yikosi ye-Asiriya njengeembotjhwa nanjengabathunjwa babulanzi, babhadule neenkhondo zabo zingakembeswa; kube lihlazo leGibhide. ₅Abahlali benarha eseligwini bazakukhena babe neenhloni ngebanga leKutjhe ithemba labo neGibhide igugu labo. ₆Iye, mhlokho bazakuthi, ‘Qalani bonyana kwenzekeni kilabo ebesithembele kibo nefese sabalekela kibo kobana basisize, basisindise ekosini ye-Asiriya! Maye thina! Alo sizophunyurha njani nakunje?’ ”