U-ISAYA 17

“Qala, iDamaseku ayisazokuba yidorobho,

izokuba liqubi leququ.

₂Imizi yomHlangulwa itjhiyiwe;

seyingeyemihlambi elala lapho,

kungabi nomuntu oyethusako.

₃Amadorobho wakwa-Efrayimu anemithangala akasekho

nobukhosi beDamaseku bunyelele.

Okuseleko kwe-Aramu kuzakunyamalala

njengedumo lama-Israyeli.”

Watjho njalo uSomnini uMninimandlawoke.

₄“Elangeni lakaSomnini idumo lakaJakopo

lizakuba lilize

ngombana inarha izakuhlangulwa.

₅Kuzakuba njengesikhathi sokuvuna

lokha nakugwetjwa ikoroyi,

ingalo yomgwebi nayikghedla iinqwambi zekoroyi;

iye, kube njengoburuja iinqwambi

emrhobeni wamaRafa.

₆Imisalela enarheni izakuba siburujo

kube njengalokha nakutlhutlhurwa umuthi we-oliva:

Kusale mabili mathathu ama-oliva

avuthiweko esitlhorini

abe mane mahlanu emagatjeni womuthi lowo.”

Watjho njalo uSomnini uZimu wakwa-Israyeli.

₇Mhlokho abantu bazakurhuluphela umDali wabo,

amehlwabo aqale oCwengileko wakwa-Israyeli.

₈Abazukurhuluphela ama-aldari

okumsebenzi wezandla zabo

begodu abazukuqala okwenziwe miminwabo,

okutjho imifanekiso yabo-Atjhera

nama-aldari wetjhwalo.

₉Mhlokho amadorobhabo azombelezwe mthangala,

azakutjhiywa njengeendawo ezisantaba namahlathi,

ezatjhiywa babantu lokha ama-Israyeli nafikako.

Inarha leyo izakuba dududu

₁₀ngombana nina bafazi nikhohlwe

uZimu wesindiswenu,

azange nikhumbule idwala lobuphephelo benu.

Ngalokho-ke nanyana nitjala iintjalo ezikhethekileko

nihlomelele uzinyana wezizwe ezitjhili iingojwana,

₁₁ngitjho namhlana nizikhulisa ngelanga enazitjala ngalo,

nenza bonyana zithuthumbe ngokusa enazihlomela ngakho;

isivuno sizakunyelela,

ngomhla wesizi nobuhlungu obungalaphekiko.

₁₂Maye! Kuzwakala umrhubo wabantu abanengi,

barhuba njengomrhubo welwandle!

Kunokuhlokoma kwezizwe,

zihlokoma njengokuhlokoma kwamanzi anamandla!

₁₃Iye, izizwe zihlokoma njengokuhlokoma

kwamanzi amanengi,

kodwana uZimu uzazikhalima

zibaleke ziye kude,

zibe njengomungu ophetjhulwa mumoya eentabeni

nekhula elomileko eligedwa siwuruwuru.

₁₄Qala, ngokuhlwa zehlelwa kukwesaba!

Ngaphambi kokusa ziyatjhabalala!

Sinjalo-ke isiphetho sabasiphangako,

nesabelo sabasidlelezelako.