U-ISAYA 16

₁Thumelani amaqamana njengesibiko

kumbusi wenarha yakwaJuda

ukusukela eSela ukuqamula erhalawumbeni,

ukuya entabeni yeZiyoni nomlayezo othi:

₂“Njengeenyoni ezizulazulako,

lokha naziqotjhwe eenhlakaneni zazo,

anjalo namadodakazi wakwaMowabi,

emazibukweni we-Arinoni.

₃Nje-ke, yiza neqhinga, wenze isiqunto;

sigubuzesa ngomthunzakho njengobusuku

lokha ilanga nalisefokothweni;

ufihle abahlakazekileko,

ungembuli abaphalali.

₄Vumela abahlakazekileko bethu

bakhosele kuwe,

ube siphephelo sakaMowabi

kiloyo ofuna ukubarhayila.

Ngambala, isifuthefuthe lesi sizakuphela,

ukurhayila kukhawuke

nabagandeleli banyamalale enarheni.

₅Angithi isihlalo sakho sobukhosi

sinzinze ekwethembekeni

begodu phezu kwaso kuhlezi othembekako!

Iye, ngetendeni lakaDavida kunombusi

othanda ubulungiswa

notjhisakalela okulungileko.”

₆Sizwile ngokuziphakamisa kwakaMowabi.

Uzikhukhumeza khulu!

Ukuzigqaja, ukuziphakamisa, ukuzitjhaya

nekulumakhe emumoya

kulilize lakolize.

₇Kodwana nje uMowabi sewuyazilila.

Boke abantu bakhona bayalila

ngebanga lamakwapa wamadiribe weKhiri-Rharesethi.

Iye, niyahumuza ngombana nibhujiswe nya.

₈Ngambala amasimu weRhetjhibhoni atjhwabile,

iye, neendiribe zeSibhima.

Amakhosi wezizwe arhadla amadiribayo akhethekileko

ebekafikelela ngitjho neJazeri,

anabele erhalawumbeni;

amahlumelawo gade asabalala

ayamele ngaphetjheya kwelwandle.

₉Ngalokho ngirhahlawula isililo seJazeri

ngebanga leendiribe zeSibhima,

ngikuthambisa ngeenyembezi,

wena Rhetjhibhoni nawe Eliyale

ngombana umkhosi wepi uwele esivunweni

seenthelo zakho nesamabelakho.

₁₀Itokozo nethabo kususiwe esivandeni seenthelo;

eendiribeni akusabhinwa iingoma, akusahlokonywa

nomtlhodlhi wewayini akasekho ebutlhodlhelweni.

USomnini wathi: “Ngikuthulisile ukuhlokoma!”

₁₁Ngalokho ihliziywami ilila njengeharibha ngoMowabi,

nomphefumulwami utlhuwela iKhiri-Rheresethi.

“Nanyana uMowabi angazibonakalisa

namkha azikhathaze endawenakhe ecwengekileko,

aye endundumeni kobana ayokuthandaza,

akazukuphumelela.”