UHOSIYA 7

₁iye, nangithi ngipholisa u-Israyeli,

izono zaka-Efrayimu zivela emtarini,

kwembuleke ikohlakalo yeSamariya:

Bayakhohlisana, amasela ayagqekeza

angene ebe;

imigulukudu idlelezela eendledlaneni!

₂Abe abacabangi bonyana yoke ikohlakalwabo

ngiyayikhumbula;

izenzo zabo ziyabalandela,

azikafihleki kimi.

₃Ikosabo iyabathabela ngokuyibeka kwabo

ngekohlakalo;

nababusi bayo bayathokoza ngamangabo.

₄Boke abathembeki.

Banjenge-ondo yomlilo etjhisako,

ongafuni umbhagi awukhwezelele,

kusukela ekubhicweni kwehlama

bekube sekukhukhumaleni kwayo.

₅Ngelanga lomnyanya wekosi yaphambilini

benza ababusi bayo badakwe liwayini,

abeluleki badakwa bafa.

₆Ngapha bakhothamela ikosi,

ngapha iinhliziyo zitjhisa njenge-ondo

ngamaqhinga wokujamelana nekosi.

Ilunya labo linjengethuthu lomlilo ebusuku

ekuseni libhebhedlhe njengelangabi lomlilo!

₇Boke batjhisa njenge-ondo,

baqothula ababusi babo.

Woke amakhosabo ayawa.

Akakho noyedwa ongibizako.”

“U-Efrayimu uhlangana nezizwe

ukiniywa ngapha nangapha.

U-Efrayimu sese afana nehlama engakaphendulwa

phezu komlilo.

₉U-Efrayimu ukghakghathwe miqhamuka,

kodwana yena akakuboni lokho.

Sese akhunile,

kodwana yena akakuboni lokho.

₁₀“Ukuzikhukhumeza kwaka-Israyeli kujamelene naye.

Akhange babuyele kuSomnini uZimabo

nanyana bamfune phezu kwakho koke lokho.

₁₁“U-Efrayimu sese anjengezuba,

uyengeka lula, uthithibele:

Balilela iGibhide,

kodwana babalekela e-Asiriya!

₁₂Kuzakuthi basabaleka njalo,

ngiphose igolanedami phezu kwabo;

ngizabadosela phasi njengeenyoni zomkayi;

ngibabambe njengothiya iwoma lamazuba.

₁₃“Bazazizwa ngombana bangihlanukile!

Bazakurhayilwa ngombana balwa nami!

Ngesingami bengikhanukela ukubahlenga,

kodwana bayangirhwayela.

₁₄Akhange balile kimi ngeenhliziyo zabo,

kodwana barhahlawula isililo basemibhedenabo.

Bazirhaya ngebanga lekoroyi newayini.

₁₅Bayangihlubuka nanyana ngabakhalima.

Ngabaqinisa kodwana bahlala isicathana ngami.

₁₆Baphendukela elizeni,

baba njengomsebe omtepetepe.

Ababusi babo bazokubulawa ngesabula

ngebanga lokwephula kwabo iimfungo zabo.

Bazakuba yihlekisa nesiphoqo

enarheni yeGibhide.”