UHOSIYA 4

₁Lalelani ilizwi lakaSomnini nina ma-Israyeli

ngombana uSomnini unesililo ngezakhamuzi zenarha le:

“Ngebanga lokobana akusenakwethembeka, neqiniso,

nelwazi ngoZimu enarheni,

₂sekwande ukunikelelana, amanga nokubulala,

ukweba nobungwadla.

Baphalaza iingazi phezu kweengazi.

₃Ngebanga lalokhu inarha iyomelela.

Zoke izakhamuzi ziyadana,

neembandana zommango neenyoni zezulu;

ngitjho neenhlambi zitjhelwa mamanzi.”

₄“Iye, umuntu akukafaneli bonyana

asasuke amangalele omunye ngokumsola,

kodwana isigungu sakho wena mphristi,

sijamelene nami.

₅Wena mphristi, uzokuwa namhlanjesi

nabaphorofidi bakho bazokuwa nawe

ebusuku banamhlanje,

nonyoko ngizombhubhisa.

₆Abantu bami bayabhubha ngokutlhoga ilwazi.

Ngebanga lokobana wale ilwazi,

nami ngiyakulandula awusimphristami;

ngebanga lokobana unina umthetho kaZimu,

nami ngizokunina abantwabakho.”

₇“Ngokwanda kwabaphristi,

kunjalo nokwanda kokona kwabo kimi.

Ngizakuphendula ukuhlonitjhwa kwabo

kube kurhubutjhwa.

₈Bazondla ngezono zabantu bami,

bathokoziswa kukonakala kwabo.

₉Kuzose kufane,

okwenzeka ebantwini kuzakwenzeka nebaphristini.

Ngizokuhlunguphaza abaphristi

ngebanga leendlela zabo.

Ngibabethe ngentongabo:

₁₀Badlile, kodwana asoze basutha;

bangwadlile, kodwana asoze bande.

ngebanga lokobana abaphristi batjhiye uSomnini,

₁₁bazinikele ebungwadleni, isitjhidela nehlama yewayini,

kufiphaze imikhumbulwabo.

₁₂Ngebangelo-ke abantu bami

sese babuza indlela esithombeni esibaziweko,

amadondolwabo abakhombe indlela.

Ngebanga lokobana ummoya wobungwadla

uphambukise abaphristi,

nangebanga lokutjhiya uZimabo ngobungwadla,

ngikho ₁₃benza umhlabelo esiqongolweni seentaba,

batjhise itjhwalo emibundwini

ngaphasi kwemithi emikhulu,

lapha kunomthunzi omnandi khona.

Ngebanga lezenzo zabezo,

amadodakazenu azinikelele ngobungwadla

nabomalukazana benu bayahlobonga.

₁₄Angizokuhlunguphaza amadodakazenu

lokha nazinikelela ngobungwadla

nabomalukazana benu nabahlobongako

ngombana abapristaba bandinda neengwadla

bebenze nemihlabelo neentjhatjha zethempeli.

Abantu abangayeleliko bazakubhubha ₁₅kanye neengwadla.

Nina, ma-Israyeli, nawe Juda

ningaziboni umlandu.

Ningayi eGiligali,

ningenyukeli eBhethe-Aveni.

Ningafungi nihle nithi:

‘Sifunga uSomnini ophilako’.”

₁₆Ngambala, ama-Israyeli anekani kadumbana.

Alo-ke, uSomnini angawelusa

njani njengezimvu nazidla emrhuleni?

₁₇U-Efrayimu uzihlanganise neenthombe ezibunjiweko.

Akathuwelele!

₁₈Nasele basele, balala nengwadla.

Bathokozela ikohlakalo yayo.

₁₉Isiwuruwuru sizobawundula,

bebakakamale nemihlabelwabo leyo.