AMAHEBHERU 6

₁Nje-ke asilise iimfundiso zokuthoma ngoKrestu siragele phambili kokuvuthiweko; singabuyi sithome phasi sibeke isisekelo: ngokuphenduka emisebenzini efileko nokukholwa kuZimu, ₂isifundiso ngokubhajadiswa, ngokubekwa izandla, ngokuvuka kwabafileko nangokugwetjwa isiphelani. ₃Sizakwenza lokho uZimu nakavumako.

₄Kulikhuni ukubuya baphenduke labo abakhe bakhanyiselwa, banandipha isiphiwo sezulwini, badlelana noMoya oCwengileko, ₅banandipha ubumnandi belizwi lakaZimu namandla wephasi elitjha elizako, ₆nasele khebahlubuka kulikhuni ukubaphendula ngombana ngokuhlubuka kwabo babuye godu bayibethele esiphambanweni iNdodana kaZimu bayithela ngehlazo epepeneneni.

₇Ihlabathi emunya amanzi aphele ayinele nemilisa iintjalo ezilisizo kilabo abayilimileko, ibusiswa nguZimu. ₈Kodwana nangabe kumila kiyo ameva nekhula, ayinamsebenzi walitho begodu isengozini yokobana inikelelwe nguZimu nesiphelo sayo kutjhiswa ngomlilo.

₉Nanyana sikhuluma nje bathandekako, sineqiniso lezinto ezingcono mayelana nani, iye, izinto eziphathelene nokusindiswa. ₁₀UZimu akasuye ongakalungi, angekhe alibale umsebenzi eniwubonakalisileko ngebanga lakhe nisiza abacwengileko njengombana nenza nanjesi. ₁₁Sikhanuka bona omunye nomunye wenu abonakalise ukukhuthala okunjalo ukuze niqinisekise ithemba lenu bekube sekupheleni; ₁₂ningadondi, kodwana nilingise labo abathi ngokukholwa nangokunyamezela bazuza ilifa lesithembiso.

₁₃Lokha uZimu athembisa u-Abrahamu, wazifunga ngaye ngombana kungekho omkhulu kunaye angamfunga, ₁₄wathi: “Kwamambala ngizokubusisa nokukubusisa, ngikwandise khulu.” ₁₅Ngokunjalo u-Abrahamu ngokunyamezela wazuza isithembiso. ₁₆Kanengi abantu bafunga ngaloyo omkhulu kunabo nesifungo esiqinisa okukhulunyiweko siqeda koke ukuphikisana. ₁₇Ngebanga lokobana uZimu wathanda khulu bona kubakhanyele kamhlophe labo abaziindlalifa zesithembiso, ukungaphenduki kobujamo behloswakhe wabuqinisa ngesifungo. ₁₈Wakwenza lokhu ukuze ngezinto ezimbili lezo ezingaphendukiko angekhe kwenzeke bona aleye amala; kuthi thina esiphephele kuye sikhuthale ngamandla sibambelele ethembeni elibekwe phambi kwethu. ₁₉Iye, ithembeli sinalo, liliqiniso nobudzimelelo bomphefumulo, kulithemba elingena endaweni ecwenge khulu ngemva kwetjhila lesisitho, ₂₀lapha uJesu owasandulelako, waba sigijimi sokuthoma esangena lapho ngebanga lethu, sele aba mphristi ngokungapheliko ngokwendlela yakaMalkitsedekhi.