AMAHEBHERU 11

₁Nje-ke ukukholwa kukuqiniseka ngezinto esinethemba ngazo, kuliqiniso ngalokho esingakuboniko. ₂Ngakho abokhokho bamukela ubufakazi obuhle.

₃Iye, ngokukholwa sizwisisa bona iphasi labunjwa ngelizwi lakaZimu, nokobana lokho okubonwako kwabunjwa ngezinto ezingabonwako.

₄Ngokukholwa u-Abela wanikela kuZimu ngomhlabelo owamukelekako ukudlula wakaKayini. Ngalokho wafakazelwa bona ulungile noZimu ngokwakhe wafakaza ngokwamukela iminikelo yakhe; yeke ngokukholwa usakhuluma nanyana aselafa.

₅Ngokukholwa u-Inogo wenyuswa ukuze angaboni ukufa. Akazange asabonwa ngombana uZimu gade asele amthethe. Nje-ke ufakazelwa bonyana angakathathwa bekathokozise uZimu. ₆Kodwana ngaphandle kokukholwa akwenzeki ukumthokozisa uZimu ngombana loyo otjhidela kuZimu kufanele akholwe bona ukhona nokobanyana uyabavuza labo abamfunako.

₇Ngokukholwa uNowa asele ayeleliswe nguZimu mayelana nesehlakalo ebe singakabonakali, wamukela isiyeleliso wakha umkhumbi ukuze asindise indlu yakhe. Ngalokho wenza iphasi libe nomlandu, wabe waba yindlalifa yokulunga ngokukholwa.

₈Ngokukholwa u-Abrahamu walalela lokha nakabizwako bona aphume aye endaweni ebe azoyamukeliswa njengelifa; nje-ke waphuma angazi lapha aya khona. ₉Ngokukholwa wahlala isikhatjhana enarheni yesithembiso njengomqhamuka: Aphila ematendeni njengombana kwenza u-Isaka noJakopo ebebaziindlalifa zesithembisweso kanye naye ₁₀ngombana bekalindele umuzi oneensekelo, umakhi nomenzi wawo kunguZimu.

₁₁Ngokukholwa u-Abrahamu wafumana amandla wokubeletha selaluphele nanyana uSara umkakhe bekayinyumba ngombana bekasazi bonyana wethembekile othembisako. ₁₂Ngalokho, ngomuntu munye nanyana besele kumlunga afile, kwabelethwa iinzukulwana ezinengi njengeenkwekwezi zezulu nanjengetjhwabatjhwaba yelwandle engabalekiko.

₁₃Boke laba bafa basekukholweni bangazange bamukeliswe ebebakuthenjisiweko, kodwana bakubona bathokoza ngakho kusesekude nabo. Iye, bebavumile bona bamiqhamuka neenkhonzi ephasini. ₁₄Abantu abakhuluma ngendlela le, bayatjengisa bona bafuna iphasi elingelabo. ₁₅Nangathana bebahlala bakhumbula inarha abaphuma kiyo, bebazakuba nethuba lokubuyela emva. ₁₆Kunalokho bebakhanukela iphasi elingcono, okutjho lezulwini. Yeke uZimu akananhloni ukubizwa bona unguyisabo ngombana ubalungisele umuzi.

₁₇Ngokukholwa u-Abrahamu nakazizinywako, wanikela ngendodanakhe u-Isaka. Iye, loyo owamukela isithembiso walungela ukunikela indodanakhe ekukuphela kwayo, ₁₈loyo okwathiwa ngaye: “Iinzukulwana zakho zizokuthiyelelwa ngo-Isaka.” ₁₉U-Abrahamu bekasazi bona uZimu uyabavusa nabafileko, kungalokho ngokulinganisa ngekulumo, wamukela u-Isaka njengobuya ekufeni.

₂₀Ngokukholwa u-Isaka wabusisa uJakopo no-Esewu mayelana nelikusasa labo.

₂₁Ngokukholwa uJakopo sele azokufa wabusisa leyo naleyo yamadodana kaJosefa; wakhothama ngokulotjha adzimelele ngedondolo lakhe ebekaliphethe.

₂₂Ngokukholwa uJosefa asele azakwenyuka, wakhuluma ngokufuduka kwaka-Israyeli eGibhide bewalayeza ngokungcwatjwa kwakhe.

₂₃Ngokukholwa uMosi asele abelethiwe, wafihlwa babelethi bakhe iinyanga ezintathu ngombana babona bonyana umntwana obekamuhle; begodu azange bawesabe umyalo obekwe yikosi.

₂₄Ngokukholwa uMosi aselakhulile wala bona kuthiwe uyindodana yendodakazi kaFaro, ₂₅kunalokho wenyula ukuphathwa makghwakghwa nabantu bakaZimu kunobanyana athabe isikhatjhana esonweni. ₂₆Bekasithi ukuthukwa ngebanga lakaKrestu kumnono omkhulu kunamafa weGibhide ngombana gade aqale umvuzo ozako ngaphambili. ₂₇Ngokukholwa wayitjhiya iGibhide angesabi ilaka lekosi ngombana waphikelela sengathi uyambona ongabonwako. ₂₈Ngokukholwa wajamisa iPhasika nokufafaza ngeengazi ukuze umbhubhisi angathinti amazibulo.

₂₉Ngokukholwa bakwa-Israyeli beyama ilwandle loMgaba sengathi bakhamba ehlabathini eyomileko, okwathi lokha amaGibhide athi alinga ukweyama, atjhingela.

₃₀Ngokukholwa imithangala yeJerikho yawa ngemva kobana isele izonjelezwe amalanga alikhomba. ₃₁Ngokukholwa ingwadla enguRarhabi ayizange ibhubhe nalabo abangakhange bakholwa ngombana yamukela kuhle iinhloli.

₃₂Ngingaraga ngithini? Asisekho isikhathi sokukhuluma ngoGidiyoni, uBharaki, uSamsoni, uJafta, uDavida, uSamyela nabaphorofidi, ₃₃okwathi ngokukholwa bahlula imibuso, benza ukulunga, bamukela iinthembiso bavala imilomo yamabhubezi, ₃₄bacima imililo evutha ngamandla, baphunyurha etlobeni yesabula, bazuza amandla ebuthakathakeni, baba ziingorho epini namabutho wabarhali abhebhula iinthende.

₃₅Ngokukholwa besifazana babuye babuyiselwa iinhlobo ngokuvuswa ekufeni.

Abanye bahlunguphazwa, akhange bavume ukuthukululwa ukuze bazuze ukuvuka okuhle. ₃₆Abanye bahlunguphazwa ngokuphoqwa nokurithwa, iye, ngitjho nangokubotjhwa nokudlhunywa ngeenkhungweni. ₃₇Bakghadlhwa ngamatje, baphadlhulwa kabili, babulawa ngesabula. Bazulazula bembethe iinkhumba zezimvu nezeembuzi. Bebahlubule, bazwiswa ubuhlungu, bahlukunyezwa. ₃₈Iphasi belingakabafaneli; bandinda emarhalawumbeni neentabeni, emikghotheni nemadongeni wephasi.

₃₉Boke labo nanyana kufakazwa kuhle ngabo ngokukholwa, azange bamukele ngesikhatheso lokho ebebathenjiswe khona ₄₀ngombana uZimu gade sele asibonelele ngokuhle ukuze ngaphandle kwethu bangapheleliswa.