UGENESISI 8

₁Nje-ke uZimu wakhumbula uNowa neenyamazana zommango kanye nefuyo yoke egade inaye ngemkhunjini. Wathumela ummoya ebusweni bephasi bonyana uvunguze ukuze amanzi athome ukubohla. ₂Imithombo yamanzi amanengi ngaphasi neentunja zezulu kwavaleka, izulu lathula. ₃Amanzi aya ngokuya abohla ephasini. Emva kwamalanga alikhulu namatjhumi amahlanu amanzi gade sele ehlile. ₄Ngelanga lekhomba enyangeni yekhomba umkhumbi wahlala phezu kweentaba ze-Ararathi. ₅Amanzi aya njalo abohla bekwaba selangeni lokuthoma lenyanga yetjhumi lapha iinqongo zeentaba zathoma khona ukubonakala.

₆Emva kwamalanga amatjhumi amane uNowa wavula intunja yomkhumbi ebegade ayenze ephahleni. ₇Wathuma igubulu, laphapha kodwana langasabuyi; lazulazula amanzi abe arhobha ephasini. ₈Yeke wathumela izuba bonyana liyokuhlola nakube amanzi sele abohlile phezu kwehlabathi. ₉Kodwana izuba akhange lifunyane indawo yokuhlala ngombana amanzi gade asagubuzese yoke ihlabathi. Ngalokho labuyela kuNowa emkhunjini. Yena welula isandla sakhe walibamba walibuyisela kuye ngemkhunjini. ₁₀Walinda amalanga alikhomba, walikhupha izubelo ngemkhunjini, walithuma godu. ₁₁Kuthe lokha nalibuyako izuba ntambama, qala, emlonyenalo bekunekari elilihlaza lomuthi we-oliva. Nje-ke uNowa walemuka bonyana amanzi sele abohlile ephasini. ₁₂Walinda amanye amalanga alikhomba, wathuma izubelo godu. Kodwana kilelihlandla izuba lakhamba umlibe.

₁₃Kwathi ngomnyaka wamakhulu asithandathu nanye kaNowa, ngelanga lokuthoma enyangeni yokuthoma kwabe amanzi arhobhile ephasini. Yeke uNowa wavula umnyango womkhumbi, wabona bonyana ngambala seyomile ihlabathi. ₁₄Elangeni lamatjhumi amabili nalikhomba enyangeni yesibili iphasi besele lome kere.

₁₅Nje-ke uZimu wakhuluma noNowa wathi: ₁₆“Phuma ngemkhunjini wena nomkakho, amadodanakho kanye nabomalukazana bakho. ₁₇Zoke iimphili ezinawe, okutjho iinyoni, iinlwana neembandana zoke ezikhakhaba ehlabathini aziphume kanye nawe ukuze zizale iphasi lokhe zizalane zande ngesibalo phezu kwalo.”

₁₈Yeke uNowa waphuma yena nomkakhe, amadodanakhe kanye nabomalukazana bakhe. ₁₉Baphuma ngemkhunjini nazo zoke iinlwana neembandana ezikhakhaba ehlabathini kanye neenyoni zoke, koke okukhambakhamba ephasini ngemihlobo yakhona.

₂₀Nje-ke uNowa wakhela uSomnini i-aldari, wathatha kizo zoke iinlwana neenyoni ezihlambulukileko, wanikela umhlabelo wokutjhiswa kilo. ₂₁USomnini wezwa umnuko omnandi wathi ehliziywenakhe: “Angisoze nganikelela ihlabathi ngenca yomuntu, nanyana imizindlo yomuntu imimbi kwasebuntwaneni bakhe. Angisoze godu ngabhubhisa iinlwana njengombana ngenzile.