UJakopo uzilungiselela ukuhlangana no-Esewu
1UJakopo wangena indlelakhe, khonapho iingelozi zakaZimu zahlangana naye. 2Kwathi lokha uJakopo nazibonako wathi: “Leli libutho lakaZimu!” Wathiya indawo leyo bonyana yiMarhanayimu.
3UJakopo wathuma iinthunywa phambi kwakhe kumfowabo u-Esewu enarheni yeSeyiri kwa-Edomu. 4Wathi kizo: “Tjelani ikosami u-Esewu bonyana incekwayo uJakopo ithi, ‘Bengiseze ngikhonze kwaLabani bekube gadesi. 5Ngineenkomo nabodumbana, izimvu neembuzi, amakhoboka namakhobokakazi. Nje-ke ngithi angithumele umlayezo lo ekosinami kobanyana ngifumane umusa emehlwenayo.’ ”
6Iinthunywa zabuyela kuJakopo zathi: “Sifikile kwamfowenu u-Esewu, nje-ke usendleleni uzokuhlangabeza, ukhamba namakhulu amane wamadoda.”
7UJakopo wethukwa khulu bewakhathazeka ngalokho. Wahlukanisa abantu akhamba nabo, imihlambi yezimvu neembuzi, yeenkomo neyamakamela ngeenqhema ezimbili. 8Wadlumbana wathi: “Kuzakuthi u-Esewu nakasahlela isiqhema esinye nokho kube nesinye esiphunyurhako.”
9Yeke uJakopo wathandaza wathi: “Maye Zimu kabamkhulu u-Abrahamu, Zimu kababa u-Isaka! Somnini wena owathi kimi angibuyele enarhenekhethu neenhlotjeni zami begodu wathi uzangiphumelelisa, 10ngimncani khulu bonyana ungabeze ube nomusa ongaka bewutjengise nokwethembeka okungaka kimi mina ncekwakho. Iye, benginedondolo kwaphela lokha nangiyama iJordani le, kodwana gadesi sele ngiziinqhema ezimbili. 11Ngibawa kobana ungisindise esandleni somfowethu u-Esewu ngombana ngiyamesaba. Nginevalo lokobana uzangisahlela abe abulale abonobantwana nabantwana ababavikeleko. 12Somnini wena ngokwakho uthe ngambala uzangiphumelelisa bewenze iinzukulwana zami zibe ngangehlabathi yelwandle engabalekiko.”
13Wahlwa ubusukobo lapho, wakhethela umfowabo u-Esewu isipho phakathi kwalokho agade anakho: 14iimbuzi ezisikazi ezimakhulu amabili neempongo ezimatjhumi amabili, izimvu ezisikazi ezimakhulu amabili namaqama amatjhumi amabili, 15amakamela asikazi amatjhumi amathathu namakamedlana wakhona, iinkomazi ezimatjhumi amane neenkunzi ezilitjhumi, abodumbana abasikazi abamatjhumi amabili nabaduna abalitjhumi. 16Koke lokhu wakubeka ezandleni zeensebenzi zakhe, wakuhlukanisa ngemihlambi wathi kizo: “Khambani phambi kwami, nitjhiye isikhala hlangana nemihlambi.”
17Wayala isisebenzi esimrholi wathi: “Lokha umfowethu u-Esewu nakahlangana nawe bese abuze bonyana ungewakabani, uthathelaphi nokobana umhlambi ongaka lo ngewakabani, 18uthi kuye, ‘Ngewencekwakho uJakopo. Usisipho esithunyelelwe ikosakhe u-Esewu. Ngikhuluma nje useenthendeni zethu.’ ”
19Wayala nesisebenzi sesibili, sesithathu nazo zoke ezinye ezaziraga imihlambi wathi: “Nani nitjho njalo ku-Esewu nanihlangana naye. 20Niqiniseke bonyana nithi, ‘UJakopo incekwakho useenthendeni zethu.’ ”
UJakopo wayala njalo ngombana wadlumbana wathi: “Ngizomthoba ummoya ngezipho engimthumelela zonezi. Ngemva kwalokho sengingaqalana naye. Mhlamunye uzangamukela.”
21Yeke izipho zakaJakopo zakhamba phambi kwakhe, kodwana yena wahlwa ubusukobo ekampeni.
UJakopo ubindana nomuntu othize ebusuku
22Ngobusukobo uJakopo wavuka wathatha abafazi bakhe ababili, amakhohlwakhe amabili namadodanakhe alitjhumi nanye bayama izibuko leJabokhi. 23Ngemva kobana abayamise umlanjana, wayamisa nayo yoke ipahlakhe.
24Kuthe bona uJakopo asale yedwa, kwafika umuntu othize wabindana naye bekwasa. 25Umuntu loyo nakabona bonyana akahluli uJakopo wamkghodlha inyonga beyakhwamuka nakalokhu abindana naye njalo. 26Wathi kuJakopo: “Ngilisa ngikhambe, nakhu kuyasa.”
Kodwana uJakopo wathi: “Angizukulisa ungakangibusisi.”
27Umuntu loyo wambuza wathi: “Ungubani ibizo lakho?”
Yena wathi: “NginguJakopo.”
28Umuntu wathi: “Ibizo lakho akusazokuba nguJakopo, kodwana uzakuba ngu-Israyeli ngombana uwunawunene nabozinyana nabantu bewahlula.”
29UJakopo wabuza wathi: “Alo, wena, ibizo lakho ngubani?”
Kodwana waphendula wathi: “Ungibuzelani ibizo lami?” Wabusisa uJakopo khonapho-ke.
30UJakopo wathiya indawo leyo bonyana yiPeniyeli asithi: “Ngambala ngibonene nozinyana ubuso nobuso, khonapho ipilwami yabulungeka.”
31Kwathi uJakopo nakadlula ePenuweli wabona ilanga liphuma. Gade ahluza ngombana inyongakhe beyirhwahlaphele. 32Kungebangelo bekube namhlanjesi ama-Israyeli akawugomi umsipha wenyonga ngombana umuntu loyo wakghodlha umsipha wenyonga kaJakopo.
