UGENESISI 11

₁Iphasi loke belinelimi linye nekulumo yinye. ₂Kwathi lokha abantu nabakhambakhamba ngepumalanga, bafunyana ibala enarheni yeTjhinari, banzinza lapho.

₃Bathi omunye komunye: “Yizani senzeni iintina sizibhage ziqine.”

Basebenzisa iintina esikhundleni samatje, isikontiri esikhundleni sedaka. ₄Bathi: “Yizani sizakhele idorobho libe nombhotjhongo ophakamela ezulwini. Lokhu kuzasenzela ibizo begodu singasabalali nephasi loke.”

₅Nje-ke uSomnini wehla bonyana azokubona idorobho nombhotjhongo ogade wakhiwa babantu. ₆USomnini wathi: “Akhese nithi niyaqala, abantwaba bamunye begodu boke bakhuluma limi linye. Yeke bazakghona ukwenza nanyana yini abayitlamako. ₇Nambani sehleni, sifese siraranise ilimi labo ukuze bangasakwazi ukuzwana nabakhulumisanako.”

₈Ukusuka lapho uSomnini wabasabalalisa iphasi loke, bebalisa ukwakha idorobho. ₉Kungebangelo libizwa bona yiBhabheli ngombana lapho uSomnini wararanisa ilimi labantu boke begodu ukusuka lapho wabasabalalisa iphasi loke.

₁₀Naku-ke umlando weenzukulwana zakaTjhemu: Iminyaka emibili emva komthwalela, lokha uTjhemu nakaneminyaka elikhulu ubudala, wabeletha u-Aripakitjhadi. ₁₁Emva kobana abelethe u-Aripakitjhadi, uTjhemu waphila iminyaka emakhulu amahlanu. Wabeletha amanye amadodana namadodakazi.

₁₂Kuthe lokha u-Aripakitjhadi naneminyaka ematjhumi amathathu namihlanu wabeletha uTjhelarhi. ₁₃Emva kobana abelethe uTjhelarhi, u-Aripakitjhadi waphila iminyaka emakhulu amane nantathu. Wabeletha amanye amadodana namadodakazi.

₁₄Kuthe lokha uTjhelarhi naneminyaka ematjhumi amathathu wabeletha u-Ebhere. ₁₅Emva kobana abelethe u-Ebhere, uTjhelarhi waphila iminyaka emakhululu amane namithathu. Wabeletha amanye amadodana namadodakazi.

₁₆Kuthe lokha u-Ebhere naneminyaka ematjhumi amathathu nane wabeletha uPelegi. ₁₇Emva kobana abelethe uPelegi, u-Ebhere waphila iminyaka emakhulu amane namatjhumi amathathu. Wabeletha amanye amadodana namadodakazi.

₁₈Kuthe lokha uPelegi naneminyaka ematjhumi amathathu wabeletha uRewu. ₁₉Emva kobana abelethe uRewu, uPelegi waphila iminyaka emakhulu amabili nethoba. Wabeletha amanye amadodana namadodakazi.

₂₀Kuthe lokha uRewu naneminyaka ematjhumi amathathu nambili wabeletha uSerugu. ₂₁Emva kobana abelethe uSerugu, uRewu waphila iminyaka emakhulu amabili namikhomba. Wabeletha amanye amadodana namadodakazi.

₂₂Kuthe lokha uSerugu naneminyaka ematjhumi amathathu wabeletha uNarhori. ₂₃Emva kobana abelethe uNarhori, uSerugu waphila iminyaka emakhulu amabili. Wabeletha amanye amadodana namadodakazi.

₂₄Kuthe lokha uNarhori naneminyaka ematjhumi amabili nethoba wabeletha uTerarhi. ₂₅Emva kobana abelethe uTerarhi, uNarhori waphila iminyaka elikhulu netjhumi nethoba. Wabeletha amanye amadodana namadodakazi.

₂₆Kuthe lokha uTerarhi naneminyaka ematjhumi alikhomba wabeletha u-Abramu, uNarhori noHarana.

₂₇Naku-ke umlando kaTerarhi: UTerarhi wabeletha u-Abramu, uNarhori noHarana. UHarana wabeletha uLothi. ₂₈UHarana wahlongakalela e-Uri lamaKasidi, inarha abelethelwa kiyo, uyise uTerarhi asaphila. ₂₉U-Abramu noNarhori bathatha abafazi bobabili. Ibizo lomka-Abramu bekunguSarayi, lomkaNarhori kunguMilika ogade ayindodakazi kaHarana. UHarana gade anguyise kaMilika noJisika. ₃₀USarayi gade ayinyumba, ubenganaye umntwana.

₃₁UTerarhi wathatha indodanakhe u-Abramu nomntanomntanakhe uLothi umsa kaHarana kanye nomalukazanakhe uSarayi umka-Abramu; boke baphuma e-Uri lamaKasidi batjhinga eKanana. Kodwana kuthe nabafika eRharana, bafese banzinza lapho. ₃₂UTerarhi waphila iminyaka emakhulu amabili nahlanu, wahlongakalela eRharana.