KWEBEGALATIYA 5

₁UKrestu wasikhulula kobana sibe ngabakhululekileko. Ngalokho jamani niqine, ningazidisibezi godu ngejogi lobukhoboka.

₂Lalelani, mina Powula ngithi kini, nakube niyasoka, uKrestu angekhe aba nesizo nakancani kini. ₃Godu ngiyaqinisa kuye woke umuntu osokako bona ubophelekile ukuthobela woke umthetho. ₄Nina enilinga ukulungisiswa ngomthetho nahlukanisiwe noKrestu, ningaphandle komusa kaZimu. ₅Kodwana ngoMoya silinde ngokukholwa ithemba lokulungisiswa, ₆ngombana kuKrestu Jesu, ukusoka nokungasoki akwenzi mahluko. Into eqakathekileko kukholwa okuzibonakalisa ngethando.

₇Beseze nigijima kuhle. Ngubani oniliyileko kobana ningasalalela iqiniso na? ₈Ukuyengwa okunjalo akuveli konibizako. ₉Ingumelo encani ibilisa ihlama yoke. ₁₀Nginethemba eKosini bona anizukuba nomkhumbulo owahlukileko. Loyo onihlangahlanganisako, uzakuthwala isibetho nanyana kungaba ngubani.

₁₁Bazalwana, nakube ngisatjhumayela ukusoka, alo ngisazunyelwani na? Ngaleyondlela isikhubekiso sesiphambano siphelisiwe. ₁₂Nakubatjitjizelabo bona, sengathi bangathuwelela baziqandule bona ngokwabo.

₁₃Nina bazalwana, nibizelwe ekululekweni, kodwana ningasebenzisi ikululeko yenu njengethuba enyameni. Kunalokho sebenzelanani ngethando ₁₄ngombana woke umthetho uzaliseka egameni linye lokuthi: “Thanda umakhelwanakho njengombana uzithanda wena.” ₁₅Kodwana nanihlalele ukulumana benirhiribidelane, yeke yelelani bona ningaqedani.

₁₆Yeke ngithi kini: Khambani ngoMoya ukuze ninganelisi iinkanuko zenyama, ₁₇ngombana iinkanuko zenyama ziphambene nokufunwa nguMoya, kanti nokufunwa nguMoya kuphambene neenkanuko zenyama. Iye, izintwezi ziphambene, khona ningazukwenza enikuthandako. ₁₈Kodwana nanibuswa nguMoya, anisingaphasi komthetho.

₁₉Kodwana imisebenzi yenyama isemtarini: bufebe, kusilaphala, manyala, ₂₀kulotjha abosingazimu, buloyi, yizondo, kucabana, mumona, kubanga umguruguru, kuzicabangela wedwa, kuphikisana, kukwahlukana, ₂₁yikanuko, budakwa, kurhiribidela nokhunye okunjalo. Ngiyaniyelelisa njengombana ngenza phambilini, bona labo abaphila ngalendlela asoze balidla ilifa lombuso kaZimu.

₂₂Kodwana iinthelo zakaMoya zilithando, kujabula, kuthula, kubekezela, kulunga, kukwethembeka, ₂₃bumnene nokuzithiba. Akunamthetho olwisana nokunjalo. ₂₄Labo abangebakaKrestu Jesu babethele esiphambanweni inyama kanye nemizwa neenkanuko zayo. ₂₅Nakube siphila ngoMoya, khona-ke asikhambe ngoMoya. ₂₆Asingazikhukhumezi, sirhugane begodu simonakalelane.