KWEBEGALATIYA 2

₁Ngemva kweminyaka elitjhumi nane godu ngabuyela eJerusalema, kilelihlandla bengikhamba noBharinabhasi, ngathatha noTitosi. ₂Ngaya ngebanga lesambulo engasifumanako, ngafese ngendlala phambi kwabo ivangeli engilitjhumayela phakathi kwabatjhili. Kodwana lokhu ngakwenza ngasese kilabo ebebabonakala inga babarholi, ngokwesaba bona umgijimo engiwugijimako nengiwugijimileko ungabi lilize lakolize. ₃Kodwana ngitjho noTitosi obegade akhamba nami, azange akatelelwe bona asoke nanyana bekamGirigi njalo. ₄Indaba le ivuswe kukuthi kube nabafowethu bamala abazifake hlangana nathi kobana bazozihlolisa ikululeko esinayo kuKrestu Jesu bese basenze amakhoboka. ₅Kodwana azange sibanikele ithuba nakancani ngombana besifuna bona iqiniso levangeli likghone ukuhlala phakathi kwenu.

₆Kodwana nakungilabo ababonakala inga babarholi, nanyana bebangibo kwamambala, akwenzi mehluko lokho, uZimu akagwebi ngokuqala ijamo lomuntu, abantwabo azange bafake ilitho emlayezwenami. ₇Kunalokho, babona bonyana ngiphathiswe umsebenzi wokutjhumayela ivangeli kabatjhili, njengombana uPitrosi bekatjhumayela kumaJuda. ₈UZimu obegade asemsebenzini kaPitrosi njengompostoli kumaJuda, bekasemsebenzinami njengompostoli wabatjhili. ₉UJakopo, uKhefasi noJwanisi baba ziinsika, bangisekela mina noBharinabhasi ngokuhlanganyela, bavuma umusa engiphathiswe wona. Bavuma nokobona thina siye kabatjhili, bona baye kumaJuda. ₁₀Into nje abayibawako kukobanyana sikhumbule abadududu, ebekuyinto ebengivele ngitjhisakalela ukuyenza.

₁₁Kwathi bona uPitrosi afike e-Anthiyorhiya ngajamelana naye ubuso nobuso ngombana bekusemtarini bona utjhaphile. ₁₂Ngaphambi kobana kufike abantu abathileko abavela kuJakopo, bekagoma nabatjhili. Kodwana kuthe bona kufike abantwabo, watsomuka, wazihlukanisa nabatjhili ngombana bekesaba labo abangebesiqhema esisokako. ₁₃Amanye amaJuda amlandela ekubeni bazenzisi, nje-ke ngokuzenzisa kwabo noBharinabhasi wayengeka. ₁₄Ngathi nangibona bonyana abakhambi ngendlela yeqiniso levangeli, ngathi kuPitrosi phambi kwabo boke: “Wena umJuda, kodwana khonapho uphila njengotjhili ingasi njengomJuda. Alo, kuzanjani-ke bona ukatelele abatjhili ukulandela imikhuba yamaJuda na?”

₁₅“Thina esimaJuda ngokubelethwa, singasizo ‘izoni ezitjhili’, ₁₆siyazi bona umuntu akalungisiswa ngokuthobela umthetho, kodwana ngokukholwa kuJesu Krestu. Nathi-ke sibeke ukukholwa kwethu kuKrestu Jesu ukuze silungisiswe ngokukholwa kuKrestu ingasi ngokuthobela umthetho ngombana akunamuntu ozakulungisiswa ngokuthobela umthetho. ₁₇Nakube thina silinga ukulungisiswa kuKrestu, khibe ngapha sisesezizoni, lokho kuzabe kutjho bona uKrestu ukhuthaza ukona na? Awa, nakanye! ₁₈Nakube ngakha kabutjha lokho engakutjhabalalisako, ngiyazibonakalisa bona ngisisephulamthetho. ₁₉Ngomthetho ngafa emthethweni ukuze ngiphilele uZimu. ₂₀Ngabethelwa kanye noKrestu Jesu, nje-ke akusese ngimi ophilako, kodwana nguKrestu ophila ngaphakathi kwami. Ipilo engiyiphila emzimbeni lo, ngiyiphila ngokukholwa eNdodaneni kaZimu, eyangithandako beyanikela ipilwayo ngebanga lami. ₂₁Angiwubekeli eqadi umusa kaZimu ngombana nakube ukulunga kungafumaneka ngomthetho, kutjho bona uKrestu wafela ilize.”