UHEZEKIYELI 42

₁Umuntu loyo wangikhuphela ngesirhodlweni sangaphandle ukuya ngetlhagwini; wangingenisa ngemalawini aqalene nendawo evulekileko malungana nomakhiwo ongemva kwethempeli ngetlhagwini. ₂Amalawu lawo bekahlanu kwesango langetlhagwini yendawo yethempeli; wona bekamamitha amatjhumi amahlanu ubude namamitha amatjhumi amabili nahlanu ububanzi. ₃Hlanu kwendawo evulekileko ebeyimamitha alitjhumi godu nahlanu komgangadelo esirhodlweni sangaphandle bekunomakhiwo onamalawu anemigangadelo emithathu anephahla eyehla ngamahla atjhiyanako. ₄Ngaphambi kwamalawu lawo gade kunomkghotha wangaphakathi omamitha amahlanu ububanzi namamitha amatjhumi amahlanu ubude. Iminyango yakhona gade ingetlhagwini. ₅Amalawu waphezulu gade amancani ngombana iphahla beliwenza adluladlulane kunalawo asemgangadelweni ongenzasi nophakathi. ₆Amalawu asemgangadelweni wesithathu gade anganansika njengombana bekunjalo ngeenrhodlo, ngalokho gade amancazana kunalawo asemgangadelweni ophasi nophakathi. ₇Gade kunomthangala ngaphandle olinganisene namalawu ukuya ngesirhodlweni sangaphandle; gade umamitha amatjhumi amabili nahlanu ubude. ₈Ubude bamalawu ngehlangothini elihlanu kwesirhodlo sangaphandle gade bumamitha amatjhumi amabili nahlanu bese balawo amalungana nesirhodlo esikhulu sethempeli bumamitha amatjhumi amahlanu. ₉Amalawu aphasi gade aneminyango ngehlangothini langepumalanga nawungena ngehlangothini lesirhodlo sangaphandle.

₁₀Hlanu komakhiwo ongemuva kwethempeli magegana nomthangala wesirhodlo sangaphandle ngesewula nahlanu kwendawo evulekileko, gade kunamalawu. ₁₁Bekunomkghotha ngaphambi kwawo. Wona gade afana namalawu angetlhagwini kwethempeli, anobude obulinganako nobubanzi obulinganako. Ubuphumo neminyango kanye namahlangothi bekufana nekwamalawu wangetlhagwini. ₁₂Gade kunomkghotha hlangana namalawu angesewula nomthangala wokuvikela. Ekuthomeni komkghotha ngepumalanga bekunobungeno obuphumelo eminyangweni yamalawu.

₁₃Yeke wathi kimi: “Amalawu wangetlhagwini newangesewula aqalene nendawo evulekileko bekangacwengileko. Abaphristi ebebanelungelo lokutjhidela kuSomnini bebagomela iminikelo ecwenge khulu lapho. Abaphristi bebabeka lapho iminikelo ecwenge khulu okutjho iminikelo yeenthoro, imihlabelo yehlambululo neyehlawulo ngombana indawo leyo beyicwengile. ₁₄Nasele abaphristi bangene ngendaweni ecwengileko, bebangakavumeleki ukuphumela ngesirhodlweni sangaphandle kufikela lapha bahlubula khona izambatho zabo ebebasebenza ngazo, bazitjhiye ngombana bezicwengile. Bekumele bembathe ezinye izambatho ngaphambi kobana batjhidele eendaweni okungezomuntu woke.”

₁₅Nasele umuntu loyo aqedile ukulinganisa ebekungaphakathi kwethempeli, wangikhupha ngesango langepumalanga wabese ulinganisa indawo leyo wazomba nayo: ₁₆Walinganisa ihlangothi langepumalanga ngehlanga, gade limamitha amakhulu amabili namatjhumi amahlanu. ₁₇Walinganisa ihlangothi langetlhagwini ngehlanga, gade limamitha amakhulu amabili namatjhumi amahlanu. ₁₈Walinganisa ihlangothi langesewula ngehlanga, gade limamitha amakhulu amabili namatjhumi amahlanu. ₁₉Yeke waphendukela ngehlangothini langetjingalanga nakhona walinganisa ngehlanga, gade limamitha amakhulu amabili namatjhumi amahlanu. ₂₀Ngendlela leyo walinganisa amahlangothi womane. Indawo leyo gade izombelezwe ngomthangala omamitha amakhulu amabili namatjhumi amahlanu ubude namamitha amakhulu amabili namatjhumi amahlanu ububanzi. Umthangala lowo bewuhlukanisa indawo ecwengileko kejayelekileko.