UHEZEKIYELI 19

“Maye bekalibhubezikazi elingangani

hlangana namabhubezi!

Bekalala hlangana namabhubezana,

ondle amawundlu.

₃Wakhulisa elinye lamawundlwakhe,

nje-ke laba libhubezana.

Lafunda ukubamba inyamazana,

larhiribidela umuntu.

₄Izizwe zezwa ngalo,

nje-ke labanjwa emgodinazo.

Zalirholela ngeenkghopholo

enarheni yeGibhide.

₅“Lokha unyoko nabona bonyana uphambaniselwe,

nokobana ithemba lakhe liphelile,

wathatha elinye lamawundlwakhe

walenza laba libhubezana.

₆Laba libhubezana

lokha nalikhambakhamba hlangana namabhubezi amanye.

Lafunda ukubamba inyamazana,

larhiribidela umuntu.

₇Lakhwabitha hlangana neengodlo

latlhifirija nemizana yakhona.

Inarha yatjhiywa bahlali bayo

ngebanga lokubhodla kwalo.

₈Nje-ke, izizwe zalivukela,

ziphuma mahlangothi woke weemfunda;

zaneka inede lazo phezu kwalo,

labanjwa ngaphakathi komgodazo.

₉Zalinghamela intamo ngesimbi,

zalifaka iinkghopholo epumulweni;

zaliletha ekosini yeBhabheli.

Zalifaka ngesikhungweni,

ukuze ukubhodla kwalo kungasazwakala

phezu kweentaba zakwa-Israyeli.

₁₀“Unyoko bekanjengomuthi wesidiribe esidiribeni,

ohlonywe lapha kunamanzi khona

bewuhlome khulu, uthwele amagatja

ngebanga lamanzi aneleko.

₁₁Bewuneziqu eziqinileko ezaba ziintonga zababusi,

isitlhori sawo besivelele

hlangana namanye amagatja

bewubonakala ngokuphakama kwawo

nangamakarawo amanengi.

₁₂Kodwana umuthi lowo wasitjhulwa ngelaka,

wafuthelwa phasi ehlabathini.

Ummoya wepumalanga wawutjhwabisa

besele utlhutlhurwe iinthelo zawo;

amagatjawo aqinileko abuna, aqothulwa mlilo.

₁₃Okwanjesi uhlonywe erhalawumbeni,

enarheni eligagadu neyomileko.

₁₄Kwaphuma umlilo esiqwini samahlumelawo,

waqothula iinthelo zakhona,

ukuze kungasasali nasinye isiqu esiqinileko,

esilungele ukuba yintonga yombusi.