U-EKSODUSI 40

₁USomnini wathi kuMosi: ₂“Jamisa ithaberinakeli okutjho itende lokuhlanganela ngelanga lokuthoma lenyanga yokuthoma. ₃Faka ngaphakathi kwalo umfaji wobufakazi bese uwusitha ngesiyaya. ₄Ungenise itafula bewuhlele koke kuhle phezu kwalo. Ngenisa nelithi leembani bese uhlela iimbani zalo. ₅Ubeke i-aldari legolide lokutjhisela itjhwalo phambi komfaji wobufakazi bese ulembelelisa itjhila lomnyango wethaberinakeli. ₆Ujamise i-aldari lomhlabelo wokutjhiswa ngaphandle komnyango wethaberinakeli okutjho itende lokuhlanganela. ₇Ubeke isitja sokuhlambela hlangana netende lokuhlanganela ne-aldari bese uthela amanzi ngaphakathi kwaso. ₈Wakhe isirhodlo magegana nethaberinakeli bese ulembelelisa itjhila esangweni lesirhodlweso. ₉Thatha amafutha uzese ithaberinakeli nakho koke okungaphakathi kwalo, ulihlukanisele kanye nepahlalo yoke engaphakathi; lizakuba ngelicwengileko. ₁₀Uzese ne-aldari lomhlabelo wokutjhiswa kanye neensetjenziswa zalo zoke, ulihlukanisele, nje-ke lizakuba ngelicwenge khulu. ₁₁Godu uzese nesitja sokuhlambela kanye nesinzinziso sakhona, usihlukanisele. ₁₂Ngemva kwalokho kuze u-Aroni namadodanakhe emnyango wetende lokuhlanganela bese ubahlambulula ngamanzi. ₁₃Wembathise u-Aroni izambatho ezikhethekileko bese uyamzesa umhlukanisele ukuze abe mphristami. ₁₄Utjhideze namadodanakhe, uwembathise iimphuraphura ₁₅bese uwazesa njengombana uzese uyisawo ukuze abe baphristi bami. Ukuzeswa kwawo kuzawenza abe baphristi nini nanini eenzukulwaneni zawo.”

₁₆UMosi wenza koke njengombana uSomnini bekamyalile.

₁₇Nje-ke kwathi ngelanga lokuthoma enyangeni yokuthoma emnyakeni wesibili, ithaberinakeli lajanyiswa. ₁₈UMosi wajamisa ithaberinakeli ngokuthoma ukubeka amanzinziswalo, amahlakalo, iinqabo neensika zalo. ₁₉Yeke wendlala itende phezu kwamahlaka wethaberinakeli waleka itendelo ngezembeso zakhona njengombana uSomnini bekamyalile. ₂₀Wathatha imiqebethu yobufakazi wayifaka ngemfajini, wawufakela iingodo zokuwuthwala, wabeka isisibekelo somfaji ngaphezu kwawo. ₂₁Khonapho wangenisa umfaji lowo ngethaberinakelini wabese ulembelelisa isiyaya setjhila lokusitha umfaji wobufakazi njengombana uSomnini bekamyalile. ₂₂Wabeka itafula ngetendeni lokuhlanganela ngetlhagwini yethaberinakeli ngaphandle kwendawo esithwe ngesiyaya. ₂₃Wahlela kuhle phezu kwalo izikwa ezibekwa phambi kwakaSomnini njengombana uSomnini bekamyalile. ₂₄Wabeka nelithi leembani ngetendeni lokuhlanganela, laba malungana netafula ngesewula, ₂₅wahlela neembani zalo phambi kwakaSomnini njengombana bekamyalile. ₂₆Godu uMosi wabeka i-aldari legolide ngetendeni lokuhlanganela, laba ngaphambi kwesiyaya sendawo ecwenge khulu, ₂₇watjhisela phezu kwalo amakha wetjhwalo njengombana uSomnini bekamyalile. ₂₈Nje-ke walembelelisa itjhila lomnyango wethaberinakeli. ₂₉Wajamisa i-aldari lomhlabelo wokutjhiswa ngaphandle komnyango wethaberinakeli okutjho itende lokuhlanganela, watjhisa phezu kwalo umhlabelo wokutjhiswa nomnikelo weenthoro njengombana uSomnini bekamyalile. ₃₀Wabeka isitja sokuhlambela hlangana netende lokuhlanganela ne-aldari lomhlabelo wokutjhiswa, wabese uthela amanzi wokuhlambulula ngaphakathi kwaso. ₃₁Nje-ke uMosi, u-Aroni namadodanakhe bahlambulula izandla neenyawo zabo ngesitjenapho. ₃₂(Bekuthi njalo ngaphambi kobana bangene ngetendeni lokuhlanganela nalokha nabatjhidela e-aldarini, bazihlambulule njengombana uSomnini bekayale uMosi.) ₃₃UMosi wabuye wakha isirhodlo magegana nethaberinakeli ne-aldari bewalembelelisa itjhila esangweni lesirhodlweso.

Wawuqeda njalo-ke uMosi umsebenzi.

₃₄Ilifu lembatha itende lokuhlanganela, iphazimulo kaSomnini yazala ithaberinakeli. ₃₅Ngebanga lokobana ilifu belembethe itende lokuhlanganela nephazimulo kaSomnini izele ithaberinakeli, uMosi akhange akghone ukungena ngetendenapho.

₃₆Kilo loke ikhambo lama-Israyeli erhalawumbeni, begade afuduka aragela phambili kwaphela lokha ilifu nalikhuphuka lisuka ethaberinakelini. ₃₇Ngalokho gade ahlala bekube kumhlana ilifu likhuphukako. Ilifu lingakakhuphuki bekangakhambi. ₃₈Iye, ilifu lakaSomnini gade liba sethaberinakelini emini, kuthi ebusuku libe mlilo ngaphakathi kwalo. Woke ama-Israyeli akubona lokho kilo loke ikhambo lawo erhalawumbeni.