U-EKSODUSI 36

₁UMosi waraga wathi: “UBhetsaleli no-Oholiyaba nabo boke abantu abanekghono uSomnini abaphe ubukghoni nobuhlakani bokwazi ukwenza nanyana ngimuphi umsebenzi ekwakhiweni kwendawo ecwengileko, bazasebenza ukuya ngakho koke uSomnini akuyalileko.”

₂Yeke uMosi wabiza uBhetsaleli no-Oholiyaba nabo boke abantu abanekghono, loyo naloyo uSomnini amuphe ubuhlakani okutjho boke abagugwa ziinhliziyo bonyana beze bazokusebenza. ₃Bathatha kuMosi woke umnikelo wesihle owalethwa ma-Israyeli malungana nomsebenzi wendawo ecwengileko.

Abantu baragela phambili ngokuletha iminikelo yesihle kuMosi qobe kusekuseni ₄bekwathi labo abanekghono ebegade basebenza umsebenzi wendawo ecwengileko omunye nomunye wabo walisa ukusebenza weza kuMosi ₅wathi kuye: “Abantu baletha okunengi ngokudluleleko kilokho okudingeka ekwenzeni umsebenzi uSomnini asiyale bona siwenze.”

₆UMosi wayala bonyana kumemezelwe kiyo yoke ikampa bona kungasalethwa umnikelo wesihle malungana nendawo ecwengileko. Yeke abantu bakhawula ukuletha iminikelo. ₇Ipahla ebeyikhona besele yanele beyeqa kokudingeka ekwenzeni woke umsebenzi.

₈Boke abantu abanobukghoni ebebasebenza ekwakheni ithaberinakeli benza amatjhila alitjhumi welineni emhlophe. Bathungelela nemifanekiso yamakerubhi ngobukghoni ematjhilenapho ngewulu ehlaza komkayi, ebubende netlerebede. ₉Ubude betjhila ngalinye gade bumamitha alitjhumi nambili nesiquntu, lingaphasana kwamamitha amabili ububanzi. Woke amatjhila lawo gade alingana.

₁₀Amatjhila ahlanganiswa ndawonye ngamahlanu. ₁₁Benza iinrhobelo ezihlaza komkayi emphethweni welinye letjhila elihlanganisiweko elingeqadi. Benza soneso nakelinye itjhila elihlanganisiweko. ₁₂Kwaba neenrhobelo ezimatjhumi amahlanu etjhileni lokuthoma elihlanganisiweko nezinye ezimatjhumi amahlanu emphethweni wetjhila lesibili elihlanganisiweko. Iinrhobelwezo gade ziqalene. ₁₃Benza iinqobotjhelo ezimatjhumi amahlanu zegolide bese baqobotjhela amatjhila elinye kelinye ngazo ukuze ithaberinakeli lihlangane libe linye.

₁₄Godu benza amatjhila ngoboya beembuzi kobana kwenziwe itende phezu kwethaberinakeli; kwaba matjhila alitjhumi nanye. ₁₅Ubude betjhila ngalinye gade bumamitha alitjhumi nantathu nesiquntu bese ububanzi bungaphasana kwamamitha amabili. Wolitjhumi nanye amatjhila lawo gade alingana. ₁₆Bahlanganisa amatjhila amahlanu ndawonye nasithandathu ndawonye. ₁₇Benza iinrhobelo emphethweni welinye letjhila elihlanganisiweko elingeqadi. Kwaba njalo nakelinye itjhila elihlanganisiweko. ₁₈Benza iinqobotjhelo ezimatjhumi amahlanu zekoporo kobana kuqobotjhelwe ngazo itende ukuze lihlangane libe linye. ₁₉Benzela itende isigubuzeso ngeenkhumba zamaqama ezifakwe umbala obovu begodu benza isigubuzeso esinye ngaphezu kwaso ngeenkhumba ezitjhukiweko bezazeswa ngamafutha.

₂₀Godu benzela ithaberinakeli amahlaka ajamileko ngeengodo zomtholo. ₂₁Ihlaka ngalinye gade linobude obumamitha amane nesiquntu, lisiquntu nesiqunjwana semitha ububanzi. ₂₂Iingodo ezimbili ezihlanganiswe bona zenze ihlaka bekufuze zibe neentlobo ezimbili ngaphasi. Woke amahlaka wethaberinakeli bawenza ngaleyondlela. ₂₃Benzela ithaberinakeli amahlaka amatjhumi amabili ngeswazini langesewula. ₂₄Ngaphasi kwamahlaka amatjhumi amabili lawo benza amanzinziso wesiliva amatjhumi amane. Kwaba manzinziso amabili ngaphasi kwehlaka ngalinye lapha iintlobo zalo ezimbili zazingena khona. Benza njalo ehlakeni elinye nelinye. ₂₅Godu nangeswazini elinye langetlhagwini lethaberinakeli kwaba mahlaka amatjhumi amabili ₂₆namanzinziso wesiliva amatjhumi amane. Kwaba manzinziso amabili ngaphasi kwehlaka ngalinye. ₂₇Ngeswazini elingetjingalanga lethaberinakeli benza amahlaka asithandathu. ₂₈Benza amahlaka amabili ukuze enze amajika wethaberinakeli ngemuva. ₂₉Ijika linye belenziwe ziingcenye ezimbili ezifanako. Iingcenye ezimbilezi bezihlanganiswe ukusuka phasi ukuya phezulu lapha isongo lokuthoma belizokufakwa khona. Bekunjalo emajikeni womabili. ₃₀Gade kunamahlaka abunane ngemuva kwethaberinakeli namanzinziso wesiliva alitjhumi nasithandathu. Ihlaka ngalinye belinamanzinziso amabili.

₃₁Benza iinqabo ngeengodo zomtholo zaba ngezamahlaka wethaberinakeli. Benza zaba zihlanu ngeswazini elinye, ₃₂zaba zihlanu ngakelinye; godu zaba zihlanu ngeswazini langetjingalanga elingemuva kwethaberinakeli. ₃₃Iinqabo ezingeziphakathi emahlakeni wamaswazi wethaberinakeli begade zithoma ekuthomeni kweswazi ukuyokutjhayisa ekugcineni. ₃₄Banameka amahlaka neenqabo ngegolide, benza amasongo wokubamba iinqabo ngegolide. ₃₅Benza isiyaya ngelineni emhlophe. Bathungelela phezu kwesiyayapho ngobukghoni imifanekiso yamakerubhi ngewulu ehlaza komkayi, ebubende netlerebede. ₃₆Godu benza iinsika ezine zomtholo zokuphanyeka isiyaya, bazinameka ngegolide. Iinkhonkhwani zakhona zona kwaba ngezegolide. Babumbela iinsikezo amanzinziso amane wesiliva. ₃₇Benza itjhila lomnyango wetende ngelineni emhlophe, balithungelela ngewulu ehlaza komkayi, ebubende netlerebede. ₃₈Godu benzela itjhilelo iinsika ezihlanu neenkhonkhwani zakhona. Banameka iimpundu zalo nemipherho yakhona ngegolide, kodwana amanzinziso wakhona amahlanu gade angewekoporo.