U-EKSODUSI 29

₁USomnini wathi kuMosi: “Nakhu ozakwenza kibo nawubahlukaniselako kobana babe baphristi bami: Thatha ikunzana eyodwa namaqama amabili amsulwa, ₂izikwa ezindulungu, izikwa ezimasongo ezidutjwe ngamafutha we-oliva neemphaphatha ezitjhatjhwe ngamafutha we-oliva. Izikwezo zingabi nengumelo begodu zenziwe ngeflowuru esefiweko. ₃Zifake ngesiqwebini sinye uzilethe bese utjhideza ikunzana namaqama amabili.

₄“Utjhideze u-Aroni namadodanakhe emnyango wetende lokuhlanganela bese ubahlambulula ngamanzi. ₅Thatha izambatho, wembese u-Aroni iphuraphura kanye nejasi ekhambisana ne-efodi, i-efodi neporiyana yomphristi bese umbopha ngebhande le-efodi. ₆Umthwese ingwani bese ubeka isihlohlo esahlukaniselweko phezu kwengwani. ₇Thatha amafutha wokuzesa umthele ehloko bese uyamzesa.

₈“Utjhideze amadodanakhe, uwembathise iimphuraphura, ₉bese uwabopha ngemikhungo yokuthekeleza emadinini njengombana wenze ku-Aroni, uwathwese imibhode. Ubuphristi buzakuba ngebabo ngokwesimiso sanini nanini.

“Uzajamisa u-Aroni namadodanakhe ngalendlela: ₁₀Letha ikunzana ngaphambi kwetende lokuhlanganela. U-Aroni namadodanakhe bazakubeka izandla zabo phezu kwehloko yekunzana. ₁₁Uhlabe ikunzana leyo phambi kwakaSomnini emnyango wetende lokuhlanganela ₁₂bese uthatha ingcenye yeengazi zekunzana uzininde phezu kweempundu ezisemajikeni we-aldari ngomunwakho. Iingazi eziseleko uzithululele emanzinzweni we-aldari. ₁₃Uthathe woke umhlwehlwe weenredlo, ipundu yesibindi, iziso zombili nomhlwehlwe wakhona ukutjhisele e-aldarini. ₁₄Kodwana inyama yekunzana, isikhumba kanye nomswani wakhona ukutjhise ngaphandle kwekampa. Lokho kumhlabelo wehlambululo.

₁₅“Uthathe elinye lamaqama bese u-Aroni namadodanakhe babeka izandla zabo phezu kwehlokwalo, ₁₆ulihlabe. Uthathe iingazi zalo uzifafaze magegana ne-aldari. ₁₇Uhlahlele iqamelo, uhlanze iinredlo neenqatha zalo bese ubeka izitho nehloko yakhona ndawonye. ₁₈Utjhise loke iqamelo e-aldarini, libe mhlabelo wokutjhiswa kuSomnini. Lokho kumnikelo owamukelekako kuSomnini.

₁₉“Uthathe iqama elinye; u-Aroni namadodanakhe babeke izandla zabo phezu kwehlokwalo. ₂₀Ulihlabe bese uthatha ingcenye yeengazi zalo uzininde endlebeni yangesidleni ka-Aroni neendlebeni zangesidleni zamadodanakhe, phezu kwabothubha babo bangesidleni naphezu kwabothubhakghuru babo bangesidleni. Ufafaze iingazi eziseleko e-aldarini magegana nalo. ₂₁Uthathe ingcenye yeengazi ezise-aldarini nengcenye yamafutha wokuzesa bese ukufafaze phezu kwaka-Aroni nezambatho zakhe naphezu kwamadodanakhe nezambatho zawo. Yena nezambatho zakhe uzakuba ngocwengileko kanye namadodanakhe nezambatho zawo.

₂₂“Leli liqama abazakujanyiswa ngalo, yeke thatha amafuthalo okutjho amanoni womsila nomhlwehlwe weenredlo, ipundu yesibindi, iziso zombili nomhlwehlwe wakhona kanye nomlenze wangesidleni. ₂₃Godu uthathe sinye isikwa esindulungu, esimasongo esidutjwe ngamafutha nesiphaphatha ngesiqwebini sesikwa esinganangumelo esiphambi kwakaSomnini. ₂₄Koke lokhu ukubeke ezandleni zaka-Aroni nezamadodanakhe ukuze kuphakanyiswe njengomnikelo osibiko kuSomnini. ₂₅Uthathe lokho ezandleni zabo, ukutjhise e-aldarini ngaphezu komhlabelo wokutjhiswa kube mnikelo owamukelekako kuSomnini.

₂₆“Uthathe isifuba seqama okujanyiswe ngalo u-Aroni, usiphakamise njengomnikelo osibiko kuSomnini. Lokho kusisabelo sakho.

₂₇“Ngebanga lokobana isifuba nomlenze weqama kwaphakanyiswa njengomnikelo osibiko nakujanyiswa u-Aroni namadodanakhe, lokho kufuze kutjhejwe ngokukhethekileko ngomuso: ₂₈Kusisabelo saka-Aroni namadodanakhe. Iye, izithwezi zazimnikelo okhethekileko lokha nakujanyiswa abaphristi, nangokuzako kumele zibe ngezikhethekileko. Lokha ama-Israyeli nenza imihlabelo yetjhebiswano kumele aphakamisele izithwezo kuSomnini bese zinikelwa abaphristi. Lokhu kusimiso sanini nanini ama-Israyeli okumele asigcine.

₂₉“Izambatho ezikhethekileko zaka-Aroni zizakwambulelwa lowo ozakuba mphristi omkhulu eenzukulwaneni zakhe. Uzazembatha lokha nazeswako nalokha najanyiswako. ₃₀Indodana ezakuba mphristi esikhundleni sakhe izazembatha emalangeni alikhomba wokujanyiswa kwayo etendeni lokuhlanganela. Godu izembathe njalo nayingena endaweni ecwengileko bonyana izokulotjha.

₃₁“Uthathe inyama yeqama okujanyiswe ngalo abaphristi uyiphekele endaweni ecwengileko. ₃₂U-Aroni namadodanakhe bazagoma inyama yeqama leyo nesikwa esingesiqwebini emnyango wetende lokuhlanganela. ₃₃Abazagoma ukudlokho ngilabo kwaphela abazibandakanye ekambisweni yetethelelo ukuze bajanyiswe ngokuhlukaniselwa uSomnini. Ongaphandle akukameli agome ngombana kukhethekile. ₃₄Nakube kunamasalela wenyama yokujanyiswa namkha wesikwa asele bekwaba sekuseni, uwatjhise. Angeze agonywa ngombana akhethekile.

₃₅“Koke engikuyale ngakho ngo-Aroni namadodanakhe kumele kubuyelelwe amalanga abe likhomba: Bajamise ₃₆bewulungise ngamalanga ikunzana yomhlabelo wehlambululo kube yitethelelwabo. Lokha nawenzela i-aldari ihlambululo, lihlambulule begodu ulizese ukuze lihlukaniselwe uSomnini. ₃₇Buyelela ikambiso yehlambululo ye-aldari amalanga alikhomba bese uyalihlukanisela. I-aldari lizakuba ngelicwenge khulu; nanyana yini ethinta i-aldarelo izakucwenga.”

₃₈USomnini wathi kuMosi: “Nakhu okuzakwenziwa phezu kwe-aldari: Kuzakuhlatjwa iimvana ezimbili ezinomnyaka munye, imihla yoke ngokungapheliko. ₃₉Imvana eyodwa unikele ngayo ekuseni bese kuthi enye unikele ngayo ngamarhwaqela. ₄₀Imvana yokuthoma ayikhambisane nethungana leflowuru esefiweko edutjwe ngelitha nesiquntu samafutha we-oliva, nelitha nesiquntu sewayini yomnikelo wokuselwako. ₄₁Enye imvana unikele ngayo ngamarhwaqela ikhambisane nomnikelo weenthoro newokuselwako njengombana wenza ekuseni ukuze kube mnikelo okhethekileko owamukelekako kuSomnini. ₄₂Kuzakuba mhlabelo wokutjhiswa owenziwa njalo eenzukulwaneni zenu emnyango wetende lokuhlanganela phambi kwakaSomnini.

“Ngizakuhlangana nabaphristi lapho bengikhulume nawe. ₄₃Godu ngizakuhlangana nama-Israyeli lapho. Indawo leyo izakucwengiswa yiphazimulwami. ₄₄Ngizakwahlukanisela itende lokuhlanganela kanye ne-aldari; u-Aroni namadodanakhe nabo ngizabahlukanisela kobana babe baphristi bami. ₄₅Ngizakuhlala hlangana nama-Israyeli, ngibe nguZimawo. ₄₆Azakwazi bonyana nginguSomnini uZimawo. Ngawakhupha enarheni yeGibhide kobana ngihlale phakathi kwawo. Iye, nginguSomnini uZimawo.”