U-EKSODUSI 17

₁Umkhambathi woke wama-Israyeli wasuka erhalawumbeni leSini wakhamba uhloma amatendawo ukuya ngomyalo kaSomnini. Kwathi lokha nawuhloma amatende eRefidimu wafumana kunganamanzi wokusela. ₂Ngalokho abantu basola uMosi bathi: “Siphani amanzi sisele nina!”

UMosi wathi kibo: “Kubayini nisola mina? Kuhlekuhle nizizinya uSomnini ngesenzo senwesi!”

₃Kodwana abantu bomela amanzi banghonghoyila kuMosi bathi: “Umuntu bekasikhuphelani eGibhide nazosibulalisa ngomrhawu thina nabantwabethu kanye nefuywethu na?”

₄Yeke uMosi walila kuSomnini wathi: “Ngizokwenzani ngabantwaba? Sekusele kancani bona bangikghadlhe ngamatje.”

₅USomnini wathi kuMosi: “Dlula phambi kwabantu, uthathe abanye babaphathi bakwa-Israyeli bese uphatha idondolo owabetha ngalo iNayili, ukhambe. ₆Qala, ngizakujama lapho phambi kwakho edwaleni elisentabeni yeRhorebe. Ubethe idwalelo bese kuphuma amanzi ukuze abantu basele.”

Yeke uMosi wenza njalo phambi kwabaphathi bakwa-Israyeli. ₇Wathiya indawo leyo bona yiMasa neMeriba ngombana ama-Israyeli bekamsola begodu azizinya uSomnini ngokuthi: “SineKosi nasinje na?”

₈Kwavela ama-Amalekhi alwa nama-Israyeli eRefidimu. ₉UMosi wathi kuJotjhuwa: “Sikhethela amadoda bese uphuma nawo niyosahlela ama-Amalekhi kusasa. Mina ngizakujama esiqongolweni sentatjana ngiphethe idondolo lakaZimu.”

₁₀UJotjhuwa wenza njengombana uMosi amyalile, walwa nama-Amalekhi. UMosi, u-Aroni noRhuri bakhuphukela esiqongolweni sentatjana. ₁₁Bekuthi njalo lokha uMosi naphakamisa isandla sakhe nedondolo ama-Israyeli adlondlobale, kuthi nasehlisako kudlondlobale ama-Amalekhi. ₁₂Kodwana imikhono kaMosi yadinwa. Nje-ke u-Aroni noRhuri bathatha ilitje balisunduzela ngaphasi kwakhe. Wahlala phezu kwalo. U-Aroni noRhuri bamphahla baphakamisa izandla zakhe ngokuzidlheganisa. Ngaleyondlela isandla sakhe sahlala siphakeme njalo bekwatjhinga ilanga. ₁₃UJotjhuwa wahlula ama-Amalekhi ngobukhali besabula.

₁₄USomnini wathi kuMosi: “Tlola lokhu encwadini kube sikhumbuzo nikutjho eendlebeni zakaJotjhuwa bonyana ngizokutjhabalalisa nya ukukhunjulwa kwama-Amalekhi ngaphasi komthunzi welanga.”

₁₅UMosi wakha i-aldari walithiya wathi: “USomnini ulitshwayo lami.” ₁₆Godu wathi: “Ngambala isandla sami siphethe itshwayo lakaSomnini! Iye, uSomnini uzakulwa nama-Amalekhi iinzukulwana ngeenzukulwana.”