Ukwahlukaniselwa kwamazibulo
1USomnini wayala uMosi wathi: 2“Ngihlukanisela woke amazibulo. Koke okuvele qangi esibelethweni kwa-Israyeli, kungaba mumuntu namkha ifuyo kungekwami.”
3UMosi wathi ebantwini: “Khumbulani ilangeli eniphuma ngalo eGibhide, ekumbeni yobukhoboka ngombana uSomnini unikhupha endaweni le ngamandla wesandla sakhe. Ngalokho ningagomi isikwa esinengumelo ngelangeli. 4Namhlanje, ngenyanga ka-Abibi, niphuma eGibhide. 5Lokha uSomnini nanifikisa enarheni yamaKanana, amaRhithi, ama-Amori, amaRhivi namaJebusi owafunga kiboyihlomkhulu bonyana uzanipha yona, inarha egeleza ibisi neliju, nihlale nigidinga ngenyanga le umkhuba wokulotjha olandelako:
6“Nizagoma isikwa esinganangumelo amalanga alikhomba. Kuthi elangeni lobukhomba nigidingele uSomnini umnyanya. 7Isikwa esinganangumelo sizagonywa amalanga alikhomba. Akukameli bonyana kufunyanwe isikwa esinengumelo phakathi kwenu, ngitjho nehlama enengumelo ingeze yafaniswa enarhenenu yoke. 8Nizakutjela amadodanenu mhlokho nithi, ‘Kungebanga lalokho uSomnini asenzela khona nasiphuma eGibhide.’
9“Umkhuba lo uzakuba sikhumbuzo kini. Njengenyongo esandleni nanjengomkhala ehloko uzanikhumbuza bonyana uSomnini wanikhupha eGibhide ngesandla sakhe esinamandla. Umthetho kaSomnini lo awube semlonyenenu njalo. 10Ngalokho nizakuphetha isimiswesi ngesikhathi sakhona esifaneleko qobe mnyaka.
11“Lokha uSomnini naniletha enarheni yamaKanana njengombana afunga kini nakiboyihlomkhulu bona uzaninikela yona, 12nihlukanisele uSomnini woke amazibulo wefuywenu aduna. Koke okuduna okuphume qangi esibelethweni kuzakuba ngokwakaSomnini. 13Elinye nelinye izibulo lakadumbana nilihlenge ngemvana namkha ngembuzana, nakungasinjalo nilephule intamo. Woke amazibulo wabantu hlangana namadodanenu niwahlenge.
14“Nakube ngokuzako indodanakho iyakubuza ithi, ‘Baba, kutjho ukuthini lokhu?’ uzakuthi kiyo, ‘USomnini wasikhupha eGibhide ekumbeni yobukhoboka ngesandla sakhe esinamandla. 15Lokha uFaro nakhunyalala angafuni ukusitjhaphulula, uSomnini wamadlha woke amazibulo enarheni yeGibhide. Kwaba mazibulo woke wabantu newefuyo. Ngalokho nginikela uSomnini woke amazibulo aduna wefuyo aphume qangi esibelethweni, kodwana indodanami elizibulo ngiyayihlenga.’ 16Umkhuba lo nawo uzakuba sikhumbuzo kini. Njengenyongo esandleni nanjengomkhala ehloko uzanikhumbuza bonyana uSomnini wanikhupha eGibhide ngesandla sakhe esinamandla.”
UZimu usindisa abantu bakhe elwandle lomGaba
17Lokha uFaro natjhaphulula abantu bona bakhambe, uZimu azange abarhole ngendlela yangenarheni yamaFilista nanyana bekuyindlela efitjhani leyo ngombana uZimu wathi: “Abantu bazakuthi nabamele balwe epini, bazisole bona basukeleni eGibhide hle babuyela khona.”
18Ngalokho uZimu wenza bona abantu babhode ngendlela yerhalawumbeni banqombe ngelwandle lomGaba. Abantu bakwa-Israyeli baphuma enarheni yeGibhide ngeengaba. 19UMosi wathatha amathambo kaJosefa ngombana uJosefa wafungisa abantu bakwa-Israyeli wathi: “UZimu uzanikhambela, nina-ke nithwale amathambami niwasuse lapha.”
20Basuka eSukothi bahloma amatende e-Ethamu magegana nerhalawumba. 21USomnini wakhamba phambi kwabo ngesika yelifu emini bona ibarhole, ebusuku yaba yisika yomlilo bona ibakhanyisele. Ngaleyondlela baphumelela ukukhamba ubusuku nemini. 22Isika yelifu emini nesika yomlilo ebusuku azange isuke phambi kwabantu.
